Збор твораў (Купала, 1925—1932)/V/II/Плача восень

← Васеньнім вечарам

Плача восень Верш Аўтар: Янка Купала 1928 год

У досьветак →

Іншыя публікацыі гэтага твора: Плача восень.

Прапануем да спампаваньня!

ПЛАЧА ВОСЕНЬ

Плача восень за вакном,
Сьлёзы плюскаюць аб шыбы,
Абняла трывожным сном
Няпрытульныя сялібы.

Плача восень, стогне ў сьне,
З пушчай з ветрамі галосіць,
Як-бы дзе каго кляне,
Ці аб шчасьці моліць, просіць.

Плача восень ноч і дзень,
Сьлёзы плюскаюць аб вокны,
А па хаце чорны цень
Лазіць, тчэ свае валокны.

Гэта ходзіць, бродзіць сум,
Душу мучыць ў сваіх сетках,
І трывожыць сказы дум,
Дум аб шчасьці і аб кветках.

1915 г.

---