Пасля навальніцы

З пляцоўкі Вікікрыніцы
Jump to navigation Jump to search
Пасля навальніцы
Верш
Аўтар: Якуб Колас
1921
Крыніца: http://yakubkolas.ru/paslya-navlnitsy


Навальніцы няма, навальніца сышла,
       Хмары далей паціснулі ў свет,
І страхлівая цьма, дажджаная імгла
       Разам з ёю пайшлі ў адзін след.

Хоць грыміць яшчэ гром і зямельку трасе,
       Хоць маланка жахліва гарыць,
Над раўком-капяжом ў саламянай страсе,
       Як сляза, яшчэ кропля дрыжыць;

Але глухне раскат, і маланка радзей
       Палыхае ў гняўлівых клубках…
Заспакойся ж, мой брат, і глядзі весялей,
       Бо смяецца ўжо сонца ў палях!

(1921)