|
Польшча панскае культуры,
Польшча — блеск Еўропы —
Залівае турмаў муры
Кроўю „хамаў хлопаў“!
На намыленай вяроўцы
Новы „цуд“ Варшавы —
Строяць мудрасць сваю змоўцы,
Ладзяць баль крывавы.
Страх, трывога ў панскім сэрцы —
Вецер дзьме з усходу —
І рыхтуюць крыважэрцы,
На ўсход паходы.
Рып і скрогат надмагільны
На астрожных брамах,
Кат ваенны і цывільны…
Кроў… магілы-ямы.
Вар‘яцее ў дзікім шале
Бельведэрскі рыцар,
Часы жудасці паўсталі,
Бы ў век інквізіцый.
Кропка ў кропку, слова ў слова,
Не змяніўшы моды,
Ідуць следам Мураўёва
Панства ваяводы.
Па засценню здзек, расправа
Дэфензіўных катаў…
Гонар, пан Пілсудскі, слава
Панскім тваім пятам…
Гром арганаў у касцёлах —
Набажэнства „ксендзаў“,
А па местах і па сёлах
Бродзіць голад, нэндза.
Ходзіць крыўда з хаты ў хату,
Сее помсту-злобу
І куе, рыхтуе катам
Гвозд у вечка гроба…
Непакой у панскім сэрцы —
Час іх сходзіць, гіне:
Не спыніць вам, крыважэрцы,
Большэвіцкай плыні.
1931 г.
|
Прапануем да спампаваньня!
