Нашы дні (1937)/Песняй вітаю я вас

← Песні аб імперыялістычнай вайне

Песняй вітаю я вас Верш Аўтар: Якуб Колас 1937 год

Дзед-калгаснік →

Іншыя публікацыі гэтага твора: Песьняй вітаю я вас.

Прапануем да спампаваньня!

ПЕСНЯЙ ВІТАЮ Я ВАС

Леглі шырока нівы калгасаў.
Глянеш — разлог, далячынь.
Стужак дарожных роўныя пасы
Мераюць смужную сінь.

Ходзіць паважна дбалы араты,
Трактар — палёў гаспадар,
Дужы і ў працы спорны, заўзяты,
Ходзіць, гамоніць абшар.

Скінуты межы, свет разгароджан —
Далеч, бязмежны прастор.
Яснае заўтра, дзень наш прыгожы,
Досвіткаў тысячы зор!

Змоўкла ў прасторах песня старая,
Скаргі адвечны палон:
Вольная праца нас адарае
Песняю радасных дзён.

Песні гавораць — жыць стала лепей,
Песні, як мак, расцвілі,
Поўняцца імі горы і стэпы
Нашай Совецкай зямлі.

Плаваюць песні звонам-разлівам,
Песні расквечаных дзён,
Песням вясёлым, песням шчаслівым
Хочацца ўторыць у тон.

Марш перамогі ў радасным гудзе.
Хіба-ж не радасць наш час?
Краю Совецкі, новыя людзі!
Песняй вітаю я вас!

1936 г.