Прывет вам, племя маладое,
Зямель совецкіх яснацвет.
Дарога ваша — шлях герояў,
У новы дзень бліскучы след.
Як сонца першыя ў паходзе,
Стыхіям злым наперакор,
Ішлі вы з песняй, як разводдзе,
На штурмы скал і дзікіх гор.
Ішлі вы, юнасць-чарадзеі
З‘яднанай сілай грамады,
Перамагаючы завеі,
Дажджы і суш і халады.
І голас вашай песні звонкай
Лавіў прастор нябёс, зямлі,
І ціш балот, і шчыт сасонкі,
Дзе густа збіліся камлі.
Усюды, дзе патрэбна зброя,
Каб перашкоды ўсе скрышыць;
Вы неслі сэрца маладое
І жар юнацкае душы.
І было крэпка ваша раме,
І не стамлялася рука,
Бо Ленін быў заўсёды з вамі
Быў з вамі гарт большэвіка.
І вам дарогу саступалі
Пустэлі, пушчы і снягі,
Бо даручаў таварыш Сталін
Вам комсамольскія сцягі.
Прывет вам, войска маладое,
Загартаванае ў баях.
Дарога ваша — след герояў,
Былінны эпас — зорны шлях.
Ідзіце-ж гэтак-жа і далей!
Прывет вам, родныя, прывет!
Пад комсамольскай гулкай хваляй
Ці-ж устаіць варожы свет?
1935 г.
|