Нашы дні (1937)/Да 11-е гадавіны

Да 11-е гадавіны
Верш
Аўтар: Якуб Колас
1937 год

Іншыя публікацыі гэтага твора: Да 11-й гадавіны Кастрычніка.

Прапануем да спампаваньня!

ДА 11-е ГАДАВІНЫ

Ідуць гады сталёвым шыхам,
Гады змагання, перамог,
Стаіўся вораг і прылёг,
На край Советаў чмыша ліхам…
Паціху, злоснікі, паціху:
Не пераступіце парог!

Трашчаць усюды вашы гмахі,
Праела моль стары каптан.
Вам не падняць гнілых сутан,
І не ўратуюць вас ні плахі,
Ні вашы цёмныя замахі,
Ні служак здрадніцкі абман.

Ўстае, расце, мацнее хваля,
Шырэй, дужэй яе разгон,
Імя тэй хвалі — легіён.
Зальюцца ў грозным перавале
Свой час аджыўшыя скрыжалі,
Бо новы пішацца закон…

Ідуць гады напорным крокам,
Гады змагання, перамог.
Ідуць мільёнамі дарог…
Сябры! сачыце пільным зрокам —
Жаданы край ўжо не далёка,
А вораг сілы ўсе напрог!

1928 г.