Насоўвае пушча…

З пляцоўкі Вікікрыніцы
Jump to navigation Jump to search
Насоўвае пушча…
Верш
Аўтар: Уладзімір Жылка
1923


 * * *

Насоўвае пушча

         Магутнай зялёнай сцяной.
Ўваходжу у гушчу
         Высока узняўшыхся хвой

Павага й зацішша,

         Прасветы ў павеці жывой.
І вецер калыша
         Страмкіх верхавін галавой.

Салодка паверыць

         Ў разложысты шум над табой
І, сцішаным, мераць
         Пуціну павольнай ступой.

І слухаць бязмоўна

         Чароўнасць трывожнай душой,
Грудзямі да поўна
         Ўдыхаці стыхіі спакой.

(1923)