Матчын дар (1929)/На чужыне/25

← 24. ⁂ За тысячу вёрст ад радзімага краю

25. ⁂ Эх, сягоньня, ў гэту ночку Верш Аўтар: Алесь Гарун 1929 год

26. На сьмерць →

Іншыя публікацыі гэтага твора: Эх, сягоння, ў гэту ночку…

Прапануем да спампаваньня!

25.

∗
∗     ∗

Эх, сягоньня, ў гэту ночку
Я ўцяку адгэтуль проч!
Шэрым воўкам па лясочку, —
Хай дагоніць, хто ахвоч!

Хай тагды сярод дарогі
Станець хто — ня будзе рад:
Чорны вуж абкруціць ногі, —
Буду вужам, буду гад!

Хай тагды шукаюць ў лесе
Цёмных, вузкіх, воўчых троп!
Як арол у паднябесьсе,
Я ўзьлячу над земскі строп.

Ў небе роўным, чыстым шляхам,
Яснай зоркай палячу
І скачуся па-над дахам
Роднай вёскі і ўскрычу:

— Гэй, хто ёсьць тут! Люд галодны,
Люд пакутны! Да мяне!
Станьма, брацьця, ў шых паходны —
Наша гора праміне.

Досыць нам з нядолі віці
Ценкі жыцьця свайго пас.
Слухай, люд: прынёс я віці,
Хто за мною, брацьця? — Час!

Ўстануць, рушаць: „Проч з дарогі!
Хто нам хоча заступіць?
Мы пайшлі, мы, люд убогі,
Ўсё узяць, ці ўсё згубіць“…

Думкі, думкі-звадыяшкі,
Ах, ня мучайце мяне!
Вам ўсё гульні, а мне цяжка,
Мне няволя ня міне…

Увагі

25. Эх, сягоньня, ў гэту ночку.

15 р. …„па-над дахам“. У выданьні 1918-га году стаяла „“на-пад дахам. Выпраўлена на падставе аўтографу („сшытак“, стар. 102).