Матчын дар (1918)/Роднаму краю/Песьня-звон

Песьня-звон
Верш
Аўтар: Алесь Гарун
1918 год

Іншыя публікацыі гэтага твора: Песьня-звон.

Прапануем да спампаваньня!

Песьня-звон.

Гэй ты, маці, родна мова,
Гэй, ты звон вялікі, слово,
Звон магучы,
Звон блыскучы,
З срэбра літы,
З злота зьбіты,
Загрымі ты,
Загрымі!
Гэй, званар, званар, мой пане,
Бій у звон, як змогі стане,
Без спачынку,
Без упынку,
Потам зьліты,
Ім умыты, —
Бій, звані ты,
Бій, звані!
Гэй, гусьляр, пясьняр, мой браце,
Грай, сьпявай у полі, у хаце,
Дзе гарота,
Дзе галота,
Дзе нісыты,
Дзе ніумыты.
Ім спыні ты,
Жаль спыні!
Струны хай грымяць і рвуцца,
З болю, з гневу. Хай сьмяюцца
Разам з імі,
Ні чужымі,
Голас чысты,
Залацісты,
З імі зьлій ты,
З імі зьлій!…