Лапці

З пляцоўкі Вікікрыніцы
Jump to navigation Jump to search
Лапці
Верш
Аўтар: Янка Купала
Крыніца: http://rv-blr.com/vershu/view/901



Не праклінайце
Лапцяў ліповых,
Не пагарджайце
Лапцяў лазовых.

Зь імі шануйце
Цяжкую працу, –
Лапатнік корміць
Пана з палацу.

З часам жа лапці –
Гаю, ой, гаю! –
Выпра дастатак
З нашага краю.

Людзі абуюць
Боты, камашы;
Прыйдзе загуба
На лапці нашы.

Але адзін хоць
Мусіць застацца,
Ў цэркве завісьне
Дый на падкладцы.

Вушкам, аборай,
Скурай пад сподам
Памяткай будзе
Прышлым народам.

Будзе ён сьведчыць,
Як у няволі
Кепска жывецца
Ў хаце і ў полі.

Як людзей сотні
Лапці цягалі,
Каб багачы ўсе
Ў золаце спалі.

I пройдуць леты,
Многія векі,
Зьменяцца людзі,
Можа, і – рэкі.

Лапаць жа будзе
Ў цэркве вісеці,
Люд аб ім будзе
Песенькі пеці.

(1905–1907)