Купальская песьня

← Песьня аб князю Вітаўце

Купальская песьня Верш Аўтар: Вацлаў Ластоўскі 1923 год Крыніца: Часопіс «Крывіч», № 4, верасень-кастрычнік 1923 г., б. 4

Прапануем да спампаваньня!

Купальская песьня.

(На Народныя матывы).

Ішла Купалка сялом, сялом,
Закрыўшы вочкі пяром, пяром;
На Івана Купала,
На Івана Купала!
Закрыўшы вочкі пяром, пяром,
Вітала хлопцаў чалом, чалом;
На Івана Купала,
На Івана Купала!
Вітала хлопцаў чалом, чалом,
Сьвятліла ночкі агнём, агнём;
На Івана Купала,
На Івана Купала!
Сьвятліла ночкі агнём, агнём,
Пляла вяночкі шаўком, шаўком;
На Івана Купала,
На Івана Купала!
Пляла вяночкі шаўком, шаўком,
Слыла Купалка цяплом, дабром;
На Івана Купала,
На Івана Купала!
Слыла Купалка цяплом, дабром,
Славу Купальлю пяём, гудзём,
На Івана Купала,
На Івана Купала!

---