Збор твораў (Купала, 1925—1932)/II/Сваім і чужым/Падсякайце тое дрэва…

⁂ (Падсякайце тое дрэва…)
Верш
Аўтар: Янка Купала
1926 год

Іншыя публікацыі гэтага твора: Падсякайце тое дрэва…

Прапануем да спампаваньня!

∗
∗ ∗

Падсякайце тое дрэва,
Што ў корні ўсыхае;
Не ўважайце таго сэрца,
Што жалю ня мае.

Страшце птушку, праз якую
Свойская загіне;
Забывайце песьню, што вам
Вораг ваш накіне.

Ой, гадуйце, падлівайце
Гай жывы, зялёны:
Сэрцу добраму давайце
Добрыя паклоны.

Паважайце тую птушку,
Што крыўды ня робе;
Ня цурайцесь роднай песьні
Ў шчасьці і ў жалобе.