Збор твораў (Купала, 1925—1932)/I/Гусьляр/Я нясу вам дар…

← Жалейка

⁂ (Я нясу вам дар…) Верш Аўтар: Янка Купала 1925 год

Гусьляр →

Іншыя публікацыі гэтага твора: Я нясу вам дар…

Прапануем да спампаваньня!

∗
∗     ∗

Я нясу вам дар.
Братніх скіб і сяліб,
Смутных сосен і ліп,
Думак дар, сэрца жар, —
Вольных, звонкіх песень чар.

Гэй! нясу вам дар!
Гэй! гэй! гэй!

Хай-жа песьня ўсюды льлецца,
Ў сэрцах вашых адгукнецца,
Зьзіханецца, ўскалыхнецца,

Як звон той,
Як свой!

А хто брат мне тут і друг,
Ладзь-наладзь душу і слух,
І за песьняй думкай скоч,
Там, дзе Нёман, Дзьвіна, Буг
Точуць наша поле, луг,
Дзе шумяць у сьвет далёкі
Белавежа, Налібокі,

Дзень і ноч,
Думкай скоч!

Прымі дар, сэрца жар,
Вольных, родных песень чар!
Гаю, гаю, гэй!!

---