Збор твораў (Купала, 1925—1932)/I/Гусьляр/Кругаварот

Кругаварот
Верш
Аўтар: Янка Купала
1925 год

Іншыя публікацыі гэтага твора: Кругаварот (Купала).

Прапануем да спампаваньня!

КРУГАВАРОТ

Нічога вечнага на сьвеце
Няма для шумнага жыцьця,
Здарэньні, многія сталецьці
Ідуць пад века забыцьця.

Ўстае рой новых пакаленьняў;
Старыя сходзяць на той сьвет;
Нягодны ўнуку ўжо тварэньні,
Якія меў на ўслугах дзед.

Марнеюць сільныя народы;
Бяруць слабейшыя гару;
Нянавісьць, бітвы, непагоды
Туманяць радасьці зару.

Ня раз крывавыя паляны
Ў душу чуткую ліюць жаль,
За бліскам славы разгуканы
Дух чалавека рвецца ўдаль.

Ствараюць з золата бажышчы,
Ідуць адны к ім на паклон,
Другіх шамочаць бед ігрышчы,
Нясецца стон з усіх старон.

Нязнанай сілай правіць сьветам
Пачатак, бытнасьць і канец;
Народ таўпехаецца ў гэтым,
Як стада зблуканых авец.