Збор твораў (Купала, 1925—1932)/I/Гусьляр/Зьнямога

← Ці ты ўзойдзеш калі, сонца?

Зьнямога Верш Аўтар: Янка Купала 1925 год

За годам год →

Іншыя публікацыі гэтага твора: Зьнямога (Купала).

Прапануем да спампаваньня!

ЗЬНЯМОГА

Плача сонца маладое
Над плянэтай над старою,
Іскры сыплюцца цурком,
Што ня тымі пуцінамі
Ходзяць леты за лятамі
Ў вечным зладзе з курганом.

Безнадзейна, бястрывожна,
Ціха, зважна, асьцярожна
Хаос гнёзды ўе свае, —
Вара зельле-калатуху,
Пое, зводзе князя-духа,
Перадыху не дае.

Сьвіты, захады крыляцца,
На аднэй таўкуцца кладцы,
Цемра вабе згубным дном;
Плача сонца маладое
Над плянэтай над старою,
Іскры сыплюцца цурком.

---