Збор твораў (Купала, 1925—1932)/I/Гусьляр/Вясна

Вясна
Верш
Аўтар: Янка Купала
1925 год

Іншыя публікацыі гэтага твора: Вясна (У вянку з пралесак…).

Прапануем да спампаваньня!

ВЯСНА

У вянку з пралесак,
У сьвятлянай шаце
Ходзе борам-лесам,
Полем, сенажацяй.

Сонцу-яснагрэю
Расплятае косы,
Раніцамі сее,
Як брыльлянты, росы.

Сьцелецца травіцай,
Ветрыкам шапоча,
Коціцца крыніцай,
Рыбкаю плюскоча.

Весела міргае
Сошцы і баронцы,
Зернятка хавае
Ў сьвежай баразёнцы.

У гайкі заходзе,
Шапаціць лісткамі;
Гутарку заводзе
З белкамі, дзятламі.

Роднае прысельле
Вырай любіць вуча,
Лад вядзе ў капэлі
Грамады пявучай.

Сяміцьвет — вясёлкай
Зьзяе над далінкай,
Ходзе за кароўкай,
Гляне і ў хацінку.

Дзяцюку, дзяўчыне
Блогасна ўсьміхнецца,
Штось на вуха кіне,
Закалоце сэрцам.

І усюдых гэтак —
Полем, сенажацяй,
У кароне з кветак,
У сьвятлянай шаце.