Збор твораў (Колас, 1928—1929)/I/2/V/Вячэрнія хмаркі

← З боку ад жыцьця

Вячэрнія хмаркі Верш Аўтар: Якуб Колас 1928 год

Перад судом →

Іншыя публікацыі гэтага твора: Вячэрнія хмаркі.

Прапануем да спампаваньня!

ВЯЧЭРНІЯ ХМАРКІ

Сонейка заходзіць,
І кладуцца цені,
І плывуць хмурынкі
Ў ціхім задуменьні.

Белыя валокны
Сонейкам заліты.
Вольны ім дарогі,
Сьцежкі ім адкрыты.

Хмаркі залатыя!
Вы — прастору дзеці,
Ходзіце вы вечна
Па ўсім белым сьвеце.

Праплывеце-ж, хмаркі,
І над родным краем,
Над сялянскім полем,
Над зялёным гаем,

І заплачце, хмаркі,
Дробнымі сьлязамі
Над мужычай нівай,
Над яго лугамі.

Загрымеце громам,
Стаўшы цёмнай хмурай,
Толькі-ж не пабеце
Жыта градам, бурай,

Хмаркі залатыя,
Сонца, неба дзеці!
Вы прывет мой шчыры
Ў вёску занясеце.

1910 г.