Збор твораў (Колас, 1928—1929)/I/2/IV/Сябром

← Толькі стогне зямля

Сябром Верш Аўтар: Якуб Колас 1928 год

Ліпы старыя →

Іншыя публікацыі гэтага твора: Сябрам (Колас).

Прапануем да спампаваньня!

СЯБРОМ

Гэй, сябры мае!
Дзе вы, родныя?
Віхры лютыя,
Непагодныя

Разагналі вас
Ва ўсе стораны,
І дарогі вам
Пазавораны.

Сьцежкі вузкія,
Палыном зарасьлі,
І нічога вам
Ня відно ў далі.

Няма хат у вас,
Ні вуглоў сваіх,
І змоўк голас ваш,
І ваш сьмех заціх.

А за што, за што
Вам ганьбу далі?
За што гоняць вас
Прэч з свае зямлі?

Эх, сябры-браты!
Самі знаеце:
Агню палкага
Іскры маеце.

Ня тушэце-ж вы
Той агонь сьвяты,
Асьвятляйце ім
Родны край, куты…

Што-ж? Няхай віхры
Надрываюцца,
Няхай ворагі
Насьміхаюцца.

Хоць на дзераве
Зжоўкла ўся ліства, —
Вясна вярнеца,
Адрасьце трава.

1908 г.