Збор твораў (Колас, 1928—1929)/I/1/I/Жніўныя песьні

← Заход сонца

Жніўныя песьні Верш Аўтар: Якуб Колас 1928 год

Закліканьне вясны →

Іншыя публікацыі гэтага твора: Жніўныя песьні (Колас).

Прапануем да спампаваньня!

ЖНІЎНЫЯ ПЕСЬНІ

Жарыць сонца бяз літосьці,
Варам пыша ад палёў,
Трэцца жыта ў пыла на просьце,
Зерне сыплецца далоў.

Хоць-бы хмарка дзе на небе,
Хоць-бы рэдзенькі цянёк…
І бяз часу ў цьвёрдай глебе
Сьпее грэчка і лянок.

Душна ў полі і маркотна.
Постаць жоўтая хлябоў
Ціхім шолахам гаротна
Просіць жнек і сярпоў.

Вось прышлі і жнейкі ў поле.
Заскакаў крывы сярпок,
І панёсься на прывольлі
Жнейчын звонкі галасок.

Сакавіты і пявучы,
Як вясенька малада,
А тон жаласны, цягучы,
Поўны жальбы і нуды.

І панёсься ён мяжою,
Вольны будзячы прастор,
Потым скаргаю-сьлязою
Ў неба вырваўся, замёр.

Колькі смутку ў песьні жніва!
Хто той смутак парадзіў?
Ці жыцьця лёс нешчасьлівы,
Ці ты, журба нашых ніў?

Ці ты, поле, грунт няплодны,
Горам песьню абвілі,
Каб аб краю нашым родным
Мы забыцца не маглі?

1912 г.