Завіруха (1929)/Песьня Першага Мая

З пляцоўкі Вікікрыніцы
Сьвята Песьня Першага Мая
Верш
Аўтар: Міхась Чарот
1929 год
Аратаму
Іншыя публікацыі гэтага твора: Песьня Першага мая (Чарот).

Спампаваць тэкст у фармаце EPUB Спампаваць тэкст у фармаце RTF Спампаваць тэкст у фармаце PDF Прапануем да спампаваньня!




ПЕСЬНЯ ПЕРШАГА МАЯ

Вітайце дзень Першага Мая,
Працоўнай сям‘і ўсе народы,
І хваляй ад краю да краю,
Хай песьня нясецца свабоды.

Вітайце ўсе новае сьвята,
Хто жыў у пакуце, ў няволі,
Хто плакаў, стагнаў ад няволі,
Крыж цяжкі — у дзень гэты зьняты.

Вас, брацьця ў няволі, вітаем!..
Мы прыдзем да вас на ўспамогу:
Мы вольны. Мы песьні сьпяваем,
Мы кветкамі сьцелем дарогу.

Дзень гэты — днём будзе вялікім,
Як сонца ўсім роўна засьвеціць,
Старцы засьпяваюць і дзеці,
Іх гімны пальлюцца бяз ліку.

Вітайце дзень Першага Мая,
Адзеньце прыгожае ўбраньне…
Хай кожны з вас кветкі трымае, —
Адзнакі вясны сьвяткаваньня.

Паложце вянкі на галовы,
Аблітыя золатам сонца,
Хай музыка йграе бясконца…
Вітайце дзень Вольны і Новы.

Дзень сьвята, вялікага сьвята, —
Дзень працы сьвятой вызваленьня!
Бог крыўды, бог зьдзеку расьпяты…
Дзень сьветлых ідэй адраджэньня!.

Сьпеў майскі — народ уздымае,
Працоўную раць ён гартуе…
Час прыдзе — ўвесь сьвет засьвяткуе
Вялікі Дзень Вечнага Мая!

1921 г.