Завіруха (1929)/Кавалю

Кавалю
Верш
Аўтар: Міхась Чарот
1929 год

Іншыя публікацыі гэтага твора: Кавалю.

Прапануем да спампаваньня!

КАВАЛЮ

Куй, каваль! Жалеза гнецца…
Іскры хай лятуць далёка,
Хай стук молата нясецца,
Сэрцы ранячы глыбока.

Хай твой стук народ пачуе
І прачнецца, як адзін…
Працы боль і ён адчуе…
Куй мацней ты: „бом!“ ды „дзін!..“

К табе прыдуць на ўспамогу,
Нібы вырастуць з зямлі,
Бо ў жыцыці куюць дарогу
Людзкой долі кавалі.

Куй, каваль! Няхай прачнецца,
Хто ‘шчэ сьпіць чароўным сном, —
Да іх хутка данясецца
Песьня молата: „дзін!“ „бом!..“

20-VIII 1920 г.