Дні вясны (1927)/Кветкі красы/На дарогах крыжавых

← ⁂ (Вечна ўвечар вецер з сьвістам…)

На дарогах крыжавых Верш Аўтар: Язэп Пушча 1927 год

⁂ (Песьня цьвіце…) →

Прапануем да спампаваньня!

НА ДАРОГАХ КРЫЖАВЫХ

На дарогах крыжавых
сівер з ветрам лямантуе.
Гэй-жа вы,
гэй-жа вы!
Ў поле з вамі паляту я.

Сьніцца мне прастор
і завеі у даліне.
Хоць да зораў там прастой
пры асьнежанай яліне.

Ой-ды ў садзе
роніць цьвет-бель вішня.
Завяду-ж я струны,
завяду ды на завейны строй.
Мне ня рваць адцьвіўшай
руні,
мне краса ўмывае скронь.

Я ня знаю, каго цешыць?..
(Воўк увосень вые).
На ўсіх сьцежках
ды завеі,
ўсё завеі
Сьнегавыя.
Хто, ну хто заве іх?

Яны сэрца не атуляць, —
анямець-бы ў іхнім шуме.
Загубілі песьню залатую,
загубілі ў суме.

На дарогах крыжавых
сівер з ветрам лямантуе.
Гэй-жа вы,
гэй-жа вы!
Ў поле з вамі паляту я.

15-I — 26 г.