Вянок (1927)/У зачарованым царстве/Перад паводкай

← Зімой

Перад паводкай Верш Аўтар: Максім Багдановіч 1927 год

∗ Падымі угару сваё вока →

Іншыя публікацыі гэтага твора: Перад паводкай.

Прапануем да спампаваньня!

ПЕРАД ПАВОДКАЙ.

Праясьняецца пагода,
Бо вярнулася вясна.
Ўсё чакаеш, што прырода
Ўстрапянецца ада сна.

І пад птушы крык і гоман,
Даўшы хвалям вольны ход,
Прыпадыме бацька Нёман
На хрыбце магутным лёд.

Зазьвіняць жалобна крыгі,
І бурлівая вада
Сьнег, размоклы ў час адлігі,
Змые з луга без сьляда.

Дык разьлійся-жа раздольна
Ў чыстым полі і гаю,
І красой паводкі вольнай
Душу выпрастай маю!