Вянок (1927)/У зачарованым царстве/Падымі угару сваё вока

∗ Падымі угару сваё вока
Верш
Аўтар: Максім Багдановіч
1927 год

Іншыя публікацыі гэтага твора: Падымі угару сваё вока…

Прапануем да спампаваньня!

∗
∗ ∗

Падымі угару сваё вока —
І ты будзеш ізноў, як дзіця,
І адыйдуць-адлынуць далёка
Ўсе трывогі зямнога жыцьця.

Ціха тучу блакіт закалыша,
У душы адрасьце пара крыл, —
Узьляціць яна ў сінюю вышу
І ў струях яе змые свой пыл.

Там ня трэба ні шчасьця, ні ласкі,
Там няма ні нуды, ні клапот.
Ты — царэвіч цудоўнае казкі,
Гэта хмара — дыван-самалёт!