Вольха (Купала)

З пляцоўкі Вікікрыніцы
Jump to navigation Jump to search
Вольха
Верш
Аўтар: Янка Купала
14.VIII.1906
Крыніца: http://rv-blr.com/vershu/view/80


Шуміць маркотна вольха
Над рэчкаю бурлівай,
Аброслая на доле
Бадылямі, крапівай.

Над ёй сінее неба
І сее непрыветы:
То студзяць яе зімы,
То паляць яе леты.

Абломлівае вецер
Галіны без сумленьня,
Падточывае рэчка
Жылястае карэньне.

Пацешыцца, як птушкі
Пяюць вясной агнісьце;
Жалобу жаляў носіць,
Як разьдзяецца зь лісьцяў.

Дні многія праходзяць,
Найбольш непагадліва,
Шуміць маркотна вольха
Над рэчкаю бурлівай.

14.VIII.1906.