Вецер (Жылка)

Вецер Верш Аўтар: Уладзімер Жылка 1922 Крыніца: http://rv-blr.com/vershu/view/6662

Прапануем да спампаваньня!

Вецер ўварваўся праз весьніцы,
Пыл на дварэ крутануў.
«Вер, што жаданае зьдзейсьніцца»
Ласьцячы вуха, шапнуў.

Шпаркі і сьмелы ў захопленьні,
Лёгка праскочыў праз плот,
Штось зашумеў між каноплямі,
Борзда мінуў агарод.

Там жа, дзе жыта з пшаніцаю
Сьпеляць свае каласы,
Блытаў, віхрыўся дурніцаю
І перабег на аўсы.

Лесу пабачыўшы цёмнага
Хмура-задумны аблік,
Быццам спужаўся таёмнага,
Сьцішыўся, зьменшыўся, зьнік…

(1922)