Барвенак (1924)/Чары каханьня/Бяссонная ноч

← ⁂ (Салавей заліўся…)

Бяссонная ноч Верш Аўтар: Алесь Гурло 1924 год

Так хочацца верыць →

Іншыя публікацыі гэтага твора: Бяссонная ноч.

Прапануем да спампаваньня!

БЯССОННАЯ НОЧ.

Ня сьпіцца мне… Што гэтаму прычынай?..
Хачу заснуць, а думка не дае,
І воблік мілае каханае дзяўчыны
Ва ўсёй прыгожасьці ўспамінкам устае.

Змарыла вочы мне салодкая драмота,
Хачу заснуць спакойным, ціхім сном,
А не магу — мне душна ад самоты…
Я заўтра убяру каханую вянком,

Я ёй скажу, што мы з ёй неразлучны,
Што ў нас душа і сэрца, як адно,
І запяём мы з ёю звонка, мілагучна
Аб тым, што нас чакае ўжо даўно.

І пацалункам шчырым мне за гэта
Яна, каханая, заплаціць, як даўней.
Я ўвесь ў агні… Мо кепская прымета?
Заснуць, заснуць, заснуць-бы мне скарэй!..