Барвенак (1924)/Трывогі і надзеі/Безьзямельнік

З пляцоўкі Вікікрыніцы
Нядольны сьпеў Безьзямельнік
Верш
Аўтар: Алесь Гурло
1924 год
Змаганцу
Іншыя публікацыі гэтага твора: Безьзямельнік (Гурло).

Спампаваць тэкст у фармаце EPUB Спампаваць тэкст у фармаце RTF Спампаваць тэкст у фармаце PDF Прапануем да спампаваньня!




БЕЗЬЗЯМЕЛЬНІК.

Ў чыстым полі на раздольлі
Разгуляцца-б мне з канём,
Ды ня дала доля поля —
Абазвала гультаём.

Рупнасьць маю, зухам дбаю;
За што-ж скрыўдзіла мяне —
Я ня знаю, не згадаю,
Ня прысьню і навет ў сьне…

Да работы ёсьць ахвота,
Сілы маю — хоць адбаў;
Ад цямноты да цямноты
Я-бы рупна працаваў.

Каб мець плуга, коней цугам
Я-б пусьціў па цаліне —
І ўсе недругі і другі
Пазайздросьцілі-бы мне.

А з пілою ці касою
Хто-бы справіўся са мной:
Ўміг сьцяў хвою, а з расою, —
Шамацеў-бы я травой.

А на ніве сьпелай жнівам —
Спрыт сярпа ў руцэ маёй;
Нешчасьліва і зьвягліва
Доля зіркае зьмяёй.

Хоць ня маю сошкі, дошкі,
Ні хацінкі, ні двара,
Але маю крэпкі ножкі,
І пайду шукаць дабра.

Надта дзікі сьвет вялікі, —
Я бадзяцца не ахвоч…
Рукі моцны: дзерці лыкі,
Плясьці лапці я ня проч.

Сьвітка тчэцца з тонкай ніткі, —
Я сярмягу буду ткаць;
Долю брыдку, як ракітку,
Буду сілай дабіваць!..

1910 г.