Байкі, гумар, сатыра/Сатыра, гумар/Пакрыўджаны злодзей

Пакрыўджаны злодзей
Сатыра
Аўтар: Баляслаў Друцкі-Падбярэскі
1928 год

Іншыя публікацыі гэтага твора: Пакрыўджаны злодзей (Друцкі-Падбярэскі).

Прапануем да спампаваньня!

Пакрыўджаны злодзей.

Неяк у цёплы вечар лета,
На кватэру да паэта,
Які выйшаў у блізкі лес —
Злодзей праз вакно улез.

Шмыгануў ён туды-сюды:
Пуста хоць зарэж усюды!
З рэчаў ува усёй кватэры
Крывы стол, на ім паперы,
Кніжкі старыя, газэты; —
Пара крэслаў, табурэтаў;
У кутку стаіць тапчан,
Міска нейкая ды збан…
На падлозе ўсё акуркі,
Каўбасы „гарбатняй“ скуркі,
Крошкі хлеба, сямяцьцё, бруд…
Што украсьці можна тут?
Нечым ўсьцешыць на’т і вока!

Злодзей тут ўздыхнуў глыбока,
Плюнуў дый скаваў са злосьцяй:

— Вось і лезь к такому ў госьці!
Нічога, жулік, сам ня мае
А кватэру замыкае,
Быццам нейкі багацей,
І толькі ўводзіць ў грэх парадачных людзей!