А ты, сіраціна…

З пляцоўкі Вікікрыніцы
Jump to navigation Jump to search
А ты, сіраціна…
Верш
Аўтар: Янка Купала
1913
Крыніца: http://rv-blr.com/pages/book_contents.jsp?idLit=2673#29513


      …А ты, сіраціна, жыві,
Як ветрам лісток адарваны, —
        Ні мейсца табе на зямлі,
Ні радасьці зь песень жаданай,

        Нясі сваю ношку жыцьця
Між наспаў-курганаў магільных,
        Бязь веры ў свой цэль, без пуцьця,
Расплаканы ў жальбах бязьсільных.

        Як цень з таго сьвету, ідзі,
Ня знаючы ў долі сірочай
        Ні сэрца зь дзявочай грудзі,
Ні сонечнай ласкі дзявочай.

        Жыві і сьні сны аб вясьне,
Ды думай адно, сіраціна.
        Што нават ніхто не ўздыхне
Калісь над тваёй дамавінай.

(1913)