Асёл і яго цень

З пляцоўкі Вікікрыніцы
Jump to navigation Jump to search
Асёл і яго цень
Верш
Аўтар: Янка Купала
Крыніца: http://rv-blr.com/vershu/view/29693


Асёл, убачыўшы ў вадзе
Ў крынічнай свой асьліны цень,
Зьдзівіўся, стаў, далей ня йдзе,
Глядзіць ды думае, як пень.

Які тут чорт намаляваў
Мяне інакшым, як я ёсьць?
Такія вушы падаваў,
Так пакрывіў на сьпіне косьць!

I, каб сябе не аглядаць
Ды разагнаць сваю нуду,
Ён капытом давай мяшаць
З гразёю чыстую ваду.

(1914)