Pierszy pramień (1929)/63

63. U szkołu
Верш
Аўтар: Якуб Колас
1929 год

Іншыя публікацыі гэтага твора: У школку (Колас).

Прапануем да спампаваньня!

63. U szkołu.

Jarka na kaminku smolny korcz pałaje; baćka na kałodcy łapać wyplataje. Łataje chałacik na usłonie matka: u szkołu zaŭtra pojdzie jich synok Jhnatka

Syn waśmiochhadowy korczyk padkładaje, z baćkawaj raboty woczak nia spuszczaje. Świetłaja haloŭka myślami zaniata. Mnoha ŭsiakich dumak u waczoch Jhnata!

„Nu Jhnat, hladzi brat, nia durej, wuczysia! Hodzie żyć biaź dzieła — za bukwar waźmisia. Budź starannym, synku, staniesz czaławiekam, budziesz ty czytać szto tam nam — ciomnym naumiekam — ŭ knihach piszuć, szto my ŭ świecie znaczym. Bo my sami ciomny, świetu my nia baczym. Słuchaj, szto nastaŭnik hawaryć tam budzie pra nawuku, knihi i ab ciomnym ludzie. A starannym budziesz, da nawuki zdatny, ja pradam karoŭku i każuch astatni, — dalej jdzi ŭ nawuku, tolki, brat, wuczysia… Dyk hladzi, synoczak, szczyrańka waźmisia! Na hulniu pustuju pluń, machni rukoju, kab i ja i maci cieszyliś taboju.“