Pierszaje czytannie dla dzietak biełarusoŭ (1906)/I/10
| ← 9. Žurawiel i Čapla | 10. Kuryca i piatuch Беларуская народная казка Аўтар: Цётка 1906 год |
11. Cyhan → |
| Іншыя публікацыі гэтага твора: Курыца і пятух (Цётка). |
Прапануем да спампаваньня!
10. Kurýca i piatúch.
Kurýca i piatúch znajšlí pabíty harščók. Pierawiarnúli daharý dnom, ulézli ŭ jahó dy dawaj skakáć. Skáčuć, skáčuć, ažnó lacić múcha. Pastúkała ŭ harščók: stuk, stuk, i pytájeć: chto tam skáčeć?
Kurýca z piatuchóm.
— A ty chto?
— Paniénka Muchóŭskaja.
— Prósim pamahčý u skókach.
Skáčuć, skáčuć, až lacíć bonk[1]. Stúknuŭ u harščók: stuk, stuk! i pytájeć: Chto tam skáčeć?
Kurýca s piatuchóm,
Paniénka Muchóŭskaja.
— A ty chto?
— Paníč Bančukóŭski.
— Prósim pamahčý u skókach.
Skáčuć, skáčuć, až s pad płótu wyskákiwaje žába. Žába pastúkała u harščók: stuk, stuk! Chto tam skáčeć?
Kurýca s piatuchóm,
Paniénka Muchóŭskaja,
Paníč Bančukóŭski.
— A ty chto?
— Páni Bałatóŭskaja.
— Prósim da skókaŭ.
Skáčuć, skáčuć, až z narý wyskakiwaje mýška. Mýška pastúkała u harščók: stuk, stuk! Chto tam skáčeć?
Kurýca s piatuchóm,
Paniénka Muchóŭskaja,
Paníč Bančukóŭski,
Páni Bałatóŭskaja.
— A ty chto?
— Páni Narčykóŭskaja.
— Prósim da skókaŭ.
Skáčuć, skáčuć, až z lésu wybieháje zájčyk. Zastúkaŭ łápkami u harščók: stuk, stuk! Chto tam skáčeć?
Kurýca s piatuchóm,
Paniénka Muchóŭskaja,
Paníč Bančukóŭski,
Páni Bałatóŭskaja,
Páni Narčykóŭskaja.
— A ty chto?
— Pánski Smakúnčyk.
— Prósim da skókaŭ.
Skáčuć, skáčué, až z lésu wybieháje lisica. Zastúkała u harščók. Stuk, stuk! Chto tam skáčeć?
Kurýca s piatuchóm,
Paniénka Muchóŭskaja,
Paníč Bančukóŭski,
Páni Bałatóŭskaja,
Páni Narčykóŭskaja,
Pánski Smakúnčyk.
— A ty chto?
— Pánski Adziewánčyk.
— Prósim da skókaŭ.
Skáčuć, skáčuć, až z lésu wyłázie miadźwiedź. Zastúkaŭ u harščók: stuk, stuk! Chto tam skáčeć?
Kurýca z piatuchóm,
Paniénka Muchóŭskaja,
Paníč Bančukóŭski,
Páni Bałatóŭskaja,
Páni Narčykóŭskaja,
Pánski Smakúnčyk,
Pánski Adziewánčyk.
— A ty chto?
— Ja kumíšče Miadźwiedźíšče, ŭsich zadušýšče, ja was padušú!
I tut miadźwiedź prycísnuŭ łápaju harščók. Harščók razlaciéŭsia na kuskí, a skakuný razlaciélisia na ŭsié staróny: kurýca z piatuchóm pad pieč, paniénka Muchóŭskaja i paníč Bančukóŭski burčučý palacièli da chlawá, pani Bałatóŭskaja šlópnulasia ŭ bałóta, Narčykóŭskaja ŭ nórku, zájčyk u póle, a lisíca da lésu.
Kumíšče Miadźwiadzišče astáŭsia adzín nad pabítym harščkóm.
- ↑ awadzień.