Kazimier Swajak (1931)/V

← IV. Swajak i Fr. Bahušewič. Padabienstwa i rožnica

V. Paśmiertnaja spadčyna K. Swajaka
Літаратуразнаўчая праца
Аўтар: Адам Станкевіч
1931 год

Прапануем да спампаваньня!

V. Paśmiertnaja spadčyna K. Swajaka.

Paśmiertnaja spadčyna Swajaka ahułam dawoli značnaja. Mnoha z tworaŭ jahonych užo wyšli drukam i stalisia ŭlasnaściaj biełaruskaha hramadzianstwa i narodu ahułam, a mnohija jašče lažać spakojna ŭ rukapisach i čakajuć na swajho wydaŭca.

Da drukawanych užo tworaŭ Swajaka naležać: Maja Lira (zbornik wieršaŭ), Hołas dušy (malitaŭnik dla biełarusaŭ katalikoŭ), Čarku daj, bracie… (filozofična-etyčnaje apawiedańnie wieršam u dusie chryścijanskim), Janka Kancawy (wiaskowaja drama ŭ piacioch dziejach), Alkahol (narysy ab škodnaści alkaholu), Kupalle (Fantazija-misteryja, asnutaja na biełaruskaj mitolohii), mnoha wieršaŭ, tworaŭ poetyckich prozaj, aforyzmaŭ, artykułaŭ, razwažańniaŭ i h. d. drukawanych u „Biełarusie“, „Krynicy“, u kalendaroch i inš.

Da niedrukawanych dahetul tworaŭ Swajaka naležać nastupnyja: Dzieja majej myśli (dniaŭnik Swajaka, u jakim jon zapiswaŭ roznyja štodziennyja zdareńni žyćciowyja, charaktaru pierawažna ahulna hramadzkaha, a takža swaje dumki, pieražywańni, šukajučy ŭsiaho hetaha značeńnia i sensu ŭ światle filozofična- chryścijanskaj dumki), ab relihijnaj unii na Biełarusi (filozofičnyja i histaryčnyja narysy), wieršy, filozofična-relihijnyja razwažańni, prajekty i sproby wieršaŭ i h. d. Urešcie korespondencyja ŭ polskaj mowie z paniaj Jadwihaj Bancer na temy filozofičnyja i relihijnyja.

Praŭda, kali ŭsie twory Swajaka ŭ celaści pakažacca świetu, tady tolki možna budzie narysawać sapraŭdy poŭny abraz duchowy paeta z usimi jaho asabliwaściami, z usimi padrabiaznaściami; chočačy adnak paznajomicca z asnaŭnymi rysami duchowaha wobliku Kazimiera Swajaka, z peŭnaściaj možna hetaha dakanać na padstawie adnej tolki Swajakowaj „Majej Liry“, u jakoj całkom jasna wyjawiŭ jon siabie, jak biełaruskaha paeta ideoloha, jak hłybokaha chryścijanina i filozofa.

U hetych narysach ab K. Swajaku my tak-ža apirajemsia pierawažna na „Liry“ i tolki častkowa karystajem z inšych tworaŭ jahonych.