1914-ты

З пляцоўкі Вікікрыніцы
Jump to navigation Jump to search
1914-ты
Верш
Аўтар: Янка Купала
1914
Крыніца: http://rv-blr.com/literature/2673#29803


Сыходзіш ты туды, скуль не прыходзяць,
Але сваіх не забярэш сьлядоў…
О год! такіх, як ты, час рэдка родзіць,
О год! ты першы гэткі зь між гадоў.

Прыйшоў ня з згоды і свабоды весьцяй
І — не ўзьвялічыць праўду між людзьмі, —
Жыцьцё мільёнаў ты прыйшоў затрэсьці,
Шлях вымасьціць свой трупамі, касьцьмі.

Кастлявай зморай з гібелі сталецьцяў
Ты, як пракляцьце, будзеш вызіраць,
І будзе маці страшыць табой дзеці,
Ды клікаць той — хто ўздумае ўміраць.

«Не забіваці» — ты стрывожыў права,
На сэрца і душу наклікаў цьму;
Людзей на зьвераў пошасьцяй крывавай
Ператварыў і здаў насьледніку свайму.

Га! Хай жа льецца кроў, дымяць пажары,
Няхай пад крыжам плача сірата!
Крывавы бог крывавыя ахвяры
Сабраць павінен зь сьвету дачыста.

Аж прыйдзе іншы год з рукою лёгкай
Агледзіны рабіці новых дзён,
Дзе меч нявідзімага Бога-рока
Напіша бескрывавы свой закон.

(1914)