Я казак — не казак…

З пляцоўкі Вікікрыніцы
Jump to navigation Jump to search
Я казак — не казак…
Верш
Аўтар: Янка Купала
Крыніца: http://rv-blr.com/vershu/view/24833


Я казак — не казак,
Што нагайкай сьвісьціць,
А казак, што калісь
Знаў, як волю любіць!

Што гуляў за Дняпром
Ад зары да зары,
Ў вольнай Сечы грымеў,
Як парогі ў Дняпры.

Што на бел-сьвет сьпяваў
Песьні з поўных грудзей
І гасьцінна прымаў
Зь сьвету вольных людзей.

Што умеў пастаяць —
Паляцець у паход —
І за волю сваю,
І за ўвесь бедны род.

Што кароны пікой
І пасады ўстрасаў
А законы крывёй
Самаўладцам пісаў!

(1911)