Хрэстаматыя новай беларускай літэратуры (1927)/III/Б/Зьмітрок Бядуля/З ранейшых вершаў/Прыйдзеце

← Вавілон

Прыйдзеце Верш Аўтар: Змітрок Бядуля 1927 год

Волат →

Іншыя публікацыі гэтага твора: Прыйдзеце.

Прапануем да спампаваньня!

Прыйдзеце.

Прыйдзеце вы, добрыя… Вечна кахаючы,
Шчасьце вы сьвету даруйце!
І гора-нуду і пракляцьці ахвяраю
Вашай руйнуйце!..

Прыйдзеце вы, сьветлыя… Днём сямісонечным
Наша жыцьцё атуляйце!
І цені магільныя з ночнай паганшчынай
Ветрам пускайце!..

Прыйдзеце вы, шчырыя, сэрцам адкрытыя…
Праўда хай служыць вам мэтай!
І гніль фарысеяў^[1] і хітрасьць распусьнікаў
Счэзнуць са сьвету!..

Прыйдзеце вы, моцныя²), бурамі званыя!..
Ворагам гібель грымеце!
І з нашай дарогі зыйдуць злыя шкоднікі…
Хутка прыйдзеце!!

---

---

1. Кніжнікі, вучоныя багасловы ў старой Юдэі. У хрысьціян слова гэтае сталася адзнакай людзей няшчырых, якія гавораць адно, а робяць другое.