Суседзі (1932)/Фашысцкі фокстрот
| ← Міністэрскае паляваньне | Фашысцкі фокстрот Фэльетон Аўтар: Анатоль Вольны 1932 год |
Вясёлы народ → |
Прапануем да спампаваньня!
ФАШЫСЦКІ ФОКСТРОТ…
Спаткаўся аднойчы літоўскі дыплёмат з латыскім.
Літоўскі дыплёмат падумаў і нарэшце сказаў латыскаму:
— Люблю я вас, латышоў, за тое, што ў вас вялікі культурна-нацыянальны ўздым, за тоё, што ўсё ў вас латвійскае…
— Ды што вы!! — самадавольна засароміўся латвіец.
— Сапраўды — дадаў літовец. — Скажам, вашыя рыскія шпроты. Гэта-ж па ўсім сьвеце шпротамі Латвія грыміць… Зноў-жа вашыя кількі пад гарэлку — першая рэч…
Літовец, ад вялікага напружаньня разумовых сіл, выцер халодны пот і змоўк…
Дыплёматы памаўчалі, пакуль думаў латыш. Нарэшце, апошні сказаў:
— … І ў вас, у літоўцаў, культурны ўздым і вас усё нацыянальнае…
— Ды што вы? — у сваю чаргу засароміўся і літовец.
— Сапраўды! — дадаў латыш. Паглядзець, скажам, як літоўцы фашысцкі фокстрот вытанцоўваюць, альбо скажам, ваш апошні нацыянальны пераварот, таксама добра быў выкананы…
Ня гледзячы на ўсю жывасьць розуму літоўскага дыплёмата, дзякуючы чаму думкі яго пераскаківаюць адна другую ня спыняючыся, літоўскі дыплёмат абражана адказаў:
— Я вам сумленна пра латыскія нацыянальныя шпроты казаў, а вы мне пра замежны фокстрот, які літоўцы толькі выконваюць, як іх навучылі па-замежамі… Зноў-жа я вам сумленна пра латыскую нацыянальную культуру, а вы пра дзяржаўны пераварот, які літоўцы толькі выканалі…
І ўсё болей абураючыся, літовец дадаў:
— „Нацыянальны“ пераварот? А яшчэ дыплёмат? Кільнік няшчасны, а не дыалёмат…
■