Статут ВКЛ (1566)/5

← РОЗДѢЛЪ 4-Й О СУДЬЯХЪ И О СУДѢХЪ

РОЗДѢЛЪ ПЯТЫЙ О ОПРАВѢ ПОСАГОУ 1566

РОЗДѢЛЪ ШЕСТОЙ О ОПЕКАХЪ →

Прапануем да спампаваньня!

АРТЫКУЛЪ 1.

Которымъ обычаемъ отецъ выдаючы дѣвку свою замужъ маеть обваровати и впевнити записанья вѣна отъ зятя. Тежъ уставуемъ, ижъ кождый обыватель того панства которого кольвекъ будучы стану, выдаючы дочку свою замужъ и даючи за нею посагъ або выправу подле доброе воли своее, наипервей нижли дѣвку выдастъ, маеть отъ зятя взяти записъ подъ печатью его и подъ печатьми людей добрихъ, которымъ онъ на третей части имѣнья своего лежачого оный посагъ або выправу совито описати маеть потомужъ яко нижей описано; а потомъ оный записъ тотъ же зять на первыхъ рокохъ земскихъ передъ судомъ земскимъ оного повѣту, въ которомъ осѣлости маеть, оповѣдати и въ книги земскіе записати маетъ, таковая отправа маеть быти въ кождого права задержана. А пакли бы отецъ выдаючы дѣвку замужъ передъ выданьемъ ее вѣна и отправы отъ зятя своего не одержалъ; таковая дѣвка по смерти мужа своего внесенье тратитъ, хотя бы и великую суму за собою внесла. А ведже предсе яко шляхтянце дѣти або близкіе повинни будуть за вѣнецъ дати тридцать копъ грошей, если бы замужъ пошла; а гдѣ бы замужъ пойти не хотѣла, тогды межы дѣтьми и близкими въ имѣньяхъ мужжнихъ будеть равную часть имѣнья держати ажъ до смерти своей; естли же бы оного шляхтича имѣнье тридцати копъ грошей не стояло, тогды тежъ водлугъ того зъ оного имѣнья маеть выдѣлена быти четвертая часть, которую будетъ держати только до живота своего, хотя за другого мужа пойдетъ.

АРТЫКУЛЪ 2.

Якъ маеть мужъ жонѣ вено записати. Тежъ уставуемъ, хто бы хотѣлъ записати вѣно жонѣ своей, тогды маеть, ошацовавшы вси имѣнья свои, на третей части, чого стоитъ, маеть совито противко того внесенья записати вѣно жонѣ своей, такъ яко бы сума описаная тое третье части. И коли будетъ тая жона его на третей части имѣней мужнихъ вѣно описаное отъ него мѣти, а онъ бы потомъ умеръ, а дѣти по собѣ зоставилъ, а тая жона пойдетъ за другого мужа, а если дѣти всхочуть або близкіе ее съ тое третее части имѣнья за живота ее вывѣновати; тогды мають всю суму пенезей, яко будеть въ листѣ описано, заплатити, тожъ тое имѣнье къ рукамъ своимъ взяти. А естли же будутъ дѣти ждати смерти матки своее, не всхочуть выкупити; тогды повинни будуть одно внесенье, што въ домъ ихъ внесла, по смерти ее заплатити тому, кому она отпишеть, а привенку, што будеть записалъ отецъ ихъ на противко внесенья, совито платити не повинни, а она тежъ не маеть никому того привенку записовати, кромѣ только вольна будеть отписати внесенье свое, а естли бы никому не отписала а дѣтей не мѣла, тогды маеть тое внесенье вернено быти въ домъ той, съ которого вышла. Вольно тежъ кождому жонѣ своей отписати речы свое рухомые такъ яко и кождому обчому, то естъ: золото, серебро, шаты и иншые речы, кромъ зброи стада и челеди неволное быдла дворного; а ведже и того всего яко имѣнья лежачого третюю часть жонѣ отписати вольно, абы седечы на имѣнью мѣла чимъ службу нашу господарскую и земскую съ третее части имѣнья заслуговати. А дѣти и близкіе кгды будуть съ тое третее части скуповати; тогды тые вси речы яко зброя челядь стадо и быдло мають при имѣнью зоставити, а гдѣ бы тые речи утратила, тогды зъ вена ее мають за то ошацовавшы вытрутити часу откладанья пенязей. А такъ подлѣ уставы нашое мають ся заховати вси подданые наши и на потомные часы, а хто бы надъ звышей тое уставы нашое учинилъ, а што неслушнѣ жонѣ своей записалъ; таковыхъ записовъ не хочемъ мѣти моцныхъ мы сами и потомки наши Великіе Князи Литовскіе. А для того жъ отецъ еще не выдавши дѣвки своей замужъ маеть первей того смотрити, естли бы того зятя своего третяя имѣнья совито стояти могла противко внесенья дочки его, на чомъ бы ее противъ того веновати мѣлъ. А гдѣ бы тая часть не стояла противко внесенья; тогды маеть отецъ за тую суму пенезей, што бы по ней мѣлъ дати, купити имѣнье и дочцѣ своей за то дати; а зять предсе жонѣ своей за то, што бы особно взялъ суму якую, маеть отправу вчинити на третей части имѣнья своего властивого, а того имѣнья, которое отецъ купивши дочцѣ своей дастъ, мають сполу уживати ажъ до живота своего мужнего, а по животѣ мужнемъ она яко свое властное маеть одержати весполокъ зъ веномъ своимъ.

АРТЫКУЛЪ 3.

По смерти отцовской дѣвки якъ мають зъ имѣнья выправованы быти. Уставуемъ, если бы отецъ за жывота своего выдалъ одну дѣвку свою замужъ, а въ томъ умеръ, а по собѣ зоставившы еще колко дѣвокъ; тогды и тые дѣвки водле опису або тестаменту его мають быти выправованы, яко имъ будеть описано, або зъ готовизны заставленое. А гдѣ бы сумы описаное а ни назначоное не было готовизны, и не могъ бы братъ такъ великое сумы по нихъ дати яко за першою дано; тогды ошацовавшы четвертую часть имѣнья своего отчызного, ничого съ того имѣнья не втратившы; и тымъ сестрамъ своимъ выправу равно всимъ дати, иле ихъ будеть, окромъ если бы братъ ихъ розумѣлъ, ижъ четвертая часть имѣнья ихъ отчызного болшое важности, нижли бы имъ на ровные части такъ много яко першой сестрѣ выправы пришло, то будеть на воли его. А пакли бы братъ або стрыеве суму имъ зоставленую утратили; тогды водлѣ опису будуть повинни яко властный долгь отдати и заплатити.

АРТЫКУЛЪ 4.

0 вдовѣ венованой, якъ се мають противко ее дѣти лѣта маючые обходити. Вдова которая сѣдить на вдовьемъ столцы, а будеть ли венована отъ мужа своего, а сынове мають зуполные лѣта; тогды она маеть осѣлость только на венѣ своемъ, а сынове мають припущоны быти ко всимъ имѣньямъ и скарбомъ отцовскимъ, которые мають службу земскую заступовати; а естли бы была не венована, тогды маеть быти захована, яко вышей есть описано.

АРТЫКУЛЪ 5.

Вдовы безплодные, которые дѣтей не мають. Обачившы есьмо то, ижъ которые вдовы безплодные сѣдятъ навдовьемъ столцы, многіе се шкоды отъ нихъ дѣлають Речи Посполитой, а то тымъ обычаемъ ижъ службы земскіе отъ ихъ не бывають служоны, такъ яко бы мѣли быти, и тежъ ближнимъ много имѣнья утрачають; уставуемъ такъ, ижъ которая вдова безплодная, а будетъ ли венована отъ мужа своего, тогды маеть осѣсти только на вѣнѣ своемъ, а имѣнья мають на ближнимъ спасти; а естли бы небыла венована отъ мужа своего, тогды маеть на третей части имѣнья сѣдѣти, поки за мужъ пойдеть, тогды близшіе мають вѣнецъ ее платити, яко естъ вышей, если будеть не вдовою замужъ пришла.

АРТЫКУЛЪ 6.

Который бы кольвекъ осѣлый и неосѣлый оженился въ Литвѣ. Тежъ уставуемъ, ижъ бы который кольвекъ оселый и неоселый оженился въ Литвѣ и побралъ по жонѣ имѣнья; тогды часу войны и каждое потребы Великого Князства Литовского противъ кождому непріятелю того панства зъ имѣней жоны своее, и зъ якого жъ кольвекъ набытья досталъ бы имѣнья въ томъ панствѣ, повиненъ будеть самъ съ того службу военную земскую служити и заступовати, и тымъ се не вымовляючы, же ему жона не записала. И хто бы съ таковыхъ якимъ же кольвекъ обычаемъ набывшы и маючи имѣнье у Великомъ Князствѣ Литовскомъ и въ земляхъ ему належачихъ, а войны которіе бы кольвекъ не служилъ, яко вышей описано; тогды онъ и жона тые имѣнья тратятъ на Речъ Посполитую.

АРТЫКУЛЪ 7.

О дѣвкахъ, которые бы безъ воли родичовъ замужъ идуть, або бы мѣли пойти. Гдѣ бы которая дѣвка безъ воли отцовское и матчины ишла за иужъ; таковая отпадываеть отъ посагу и отъ имѣнья отчизного и материстого, а естли бы одна была у отца, тогды отчызна на близкихъ спадываеть мимо таковую дѣвку.

АРТЫКУЛЪ 8.

О дѣвкахъ, которые по смерти родичовъ своихъ безъ воли братьи або стріевъ за мужъ идуть. Уставуемъ, естли бы дѣвка остала отца и матки, по смерти ихъ родичовъ своихъ, не доросши лѣтъ своихъ, або тежъ и доросши лѣтъ замужъ пошла безъ воли братьи або стріевъ своихъ, а не будеть ли братьи рожоное мѣти або стріевъ, або близкихъ своихъ; таковая отпадываеть отъ посагу имѣнья своего отчызного и материстого и спадковъ, што бы напотомъ на нее спасти мѣло. А естли бы она мѣла лѣта свои, а братья або стріеве ее задерживаючи ее не хотѣли бы замужъ выдати; тогды однакожъ своволнѣ не маеть ни за кого ити, лечъ маеть дати знати до вряду черезъ кровныхъ вѣдомость, а врядъ ей маеть дозволити замужъ пойти; а она естли зъ волею вряду або близкихъ замужъ пойдетъ за ровного собѣ шляхтича, тогды таковая имѣнья не маеть тратити, а вѣдь же дѣвка маеть мѣти лѣта зуполные петнадцать лѣтъ, а тотъ хто ее поиметь вольно ему будеть доходити маетности жоны своее. А братья або стріеве и которіи кольвекъ близкіе маючи сестри въ опецѣ своей, поколь ихъ замужъ выдадуть, мають ихъ учтиве на всемъ ховати, держечы при нихъ нѣвесту старую статечную; а естли бы учтивѣ ховати не хотѣли, тогды таковые дѣвки могуть на части своей, съ которое имъ выправа маеть быти, сами сѣдети подъ справою опекуна отъ вряду имъ приданаго до того часу, поколь замужъ пойдуть, а идучи замужъ выправа имъ съ того дому маеть быти водлѣ поступку вышей описаного.

АРТЫКУЛЪ 9.

Хто бы з двѣма або съ трема жонами дѣти мѣлъ. Уставуемъ, естьли бы которая вдова замужъ пошла, и дѣти въ мужа першое жоны нашла и съ тымъ мужемъ другихъ дѣтей набыла, тогды по смерти мужней зъ обоима детьми того мужа своего во имѣнью ровную часть и въ скарбѣ маеть мѣти; а естли бы дѣтей не мѣла, тогды зъ дѣтьми мужа своего першое жоны его ровную часть только во имѣньяхъ лежачихъ будеть мѣти, але въ скарбехъ и въ рухомыхъ речахъ мѣти не маеть, окромъ внесенья своего, и тежъ естли бы што зъ ласки ей мужъ записалъ нѣкоторую часть имѣнья лежачого, на той она маеть сѣдѣти только до жывота своего, если замужъ не пойдетъ, а если бы замужъ пошла, тогды тую ровную часть имѣнья маеть дѣтемъ первое жоны его зоставити, а тые дѣти венца ей не повинни будутъ дати.

АРТЫКУЛЪ 10.

О вдовѣ, которая зостанетъ зъ дѣтьми недорослыми мѣтъ. Уставуемъ, которая вдова зостанеть по мужу своемъ зъ дѣтьми недорослыми, а хотѣла бы на вдовьемъ столцы сѣдети и дѣти въ опецѣ своей мѣти, а будеть ли оселость добрую мѣти або вено отъ мужа своего оправеное; тогды таковая вдова маеть на вдовьемъ столцы на всихъ имѣньяхъ зъ дѣтьми сѣдѣти, если бы опекуны уставленые отъ мужа ее не были. А естли бы оселости добрые або вѣна отписаного не мѣла, тогды маеть дати по собѣ рукоемство доброе люсей оселыхъ, таковая ку опецѣ маеть быти припущона. А гдѣ бы она и потомъ будучи на вдовьемъ столцы дѣтемъ имѣнья скарбы утрачала; тогды стріеве або близкіе мають ее притегнути передъ урядъ земскій на рокъ певный, яко на завитый, и доведуть ли того, же утрачала, маеть опеку и имѣнья и дѣти пустити кревнымъ, а сама зостати на оправѣ своей; а не будеть ли мѣти оправы, тогды мають ей выдѣлити ровную часть межи дѣтьми, которую маеть держати и ее вживати до живота своего, або покуль замужъ пойдеть, а по жывотѣ ее тая часть ее маеть спасти на дѣти. А вѣдьже утрата отъ нее на имѣньяхъ иншая не можетъ се показовати: одно естли бы непобожными податками винами серебщизнами людей у въ оныхъ имѣньяхъ обтяжала, гумна и иные статки домовые неряднѣ роспрашала, або частые и непотребные калацѣи мѣвала, и слуги непотребные ховала, а ничого въ домъ дѣтиный не прибавляла. А гдѣ бы стріевъ и иншихъ кревныхъ не было, тогды мы Господаръ, а въ небытности нашой у Великомъ Князствѣ Литовскомъ ино панове рада наша каждый у своемъ воеводствѣ для таковое утраты мають зъ рамени нашого господарскаго опекуновъ оселыхъ на тое мѣстце уставити, которіе дѣти имѣнья скарбы и ее самую у въ опецѣ своей мѣти будуть а не допущати большей утраты чинити. А въ томъ часѣ намъ тую утрату по ней обачатъ, она бы што дѣтемъ утратила; тогды будеть винна тую всю шкоду дѣтемъ своимъ платити зъ вѣна або зъ властного имѣнья своего, а не будеть ли мѣти имѣнья або вѣна, тогды оные рукоимцы будуть повинни шкоду дѣтемъ платити.

АРТЫКУЛЪ 11.

О дѣвкахъ и вдовахъ, которіе за простыхъ людей замужъ идутъ. Уставуемъ, которая бы дѣвка або вдова, будучы стану шляхецского, маючы имѣнья отчызные або материстые, пошла замужъ за простого стану человѣка не шляхтича; таковая отъ всихъ имѣней своихъ якъ отчызныхъ такъ материстыхъ вѣчности отпадываеть, але тые имѣнья на близкихъ мають прійти, а по вдовѣ на дѣти и тежъ на близкихъ ее, которые дѣти яко близкіе предсе будуть повинни таковой дѣвцѣ або вдовѣ за тые имѣнья ее отложыти суму пенезей подлѣ шацунку статутового, але по половицы, то естъ даючы за кождую службу людей пять копъ грошей, а иншые кгрунты сумы по половицы, яко въ томъ статутѣ о томъ шырей написано, а вѣно описаное все тратятъ, и не повинни будуть дѣти и близкіе таковой вѣна откладати.

АРТЫКУЛЪ 12.

О вдовѣ, которая бы по смерти мужа своего за другого хотѣла пойти. Хочемъ мѣти, абы малженство въ почтивости было заховано и для вѣдомости плоду, абы кождая вдова шляхтянка по смерти иужа своего до шести мѣсецей за другого мужа не смѣла пойти; а которая пойдеть, тогды вѣно отъ мужа своего описаное тратитъ, а пакли бы вѣна описанаго не мѣла, тогды заплату до скарбу нашого дванадцать рублей грошей заплатити маеть.

АРТЫКУЛЪ 13.

О спадки, которые заровно на сына и на дочки приходять, и о внесенью матчиномъ, если бы кому не записала. Тежъ уставуемъ, ижъ всякіе материстые такъ лежачіе и иншые речи рухомые, тежъ внесенье матчино, которое бы никому не было записовано, то все маеть въ ровный дѣлъ пойти межи всихъ дѣтей якъ сыновъ такъ и сестръ, нижли спадки отчизные на сыновъ на близкихъ по мечу приходять такъ, яко на иншомъ мѣстцу шырей о томъ написано.

АРТЫКУЛЪ 14.

О поровнанья внесенья розныхъ жонъ передъ раздѣломъ дѣтиного имѣнья. Тежъ уставуемъ, кгды бы одинъ шляхтичъ мѣлъ колко жонъ, а оные жоны мѣли бы ровное внесенье свое въ сумахъ пенежныхъ; тогды сынове, колько ихъ будеть зъ оныхъ жонъ, вси имѣнья отчизные мають на себе на ровные части подѣлити. А естли бы которое жоны внесенья большей нижли иншыхъ жонъ; напервей передъ роздѣломъ имѣней своихъ выровнати оное болшое внесенье матки братьи своей, ровное внесенье подѣливши, заплатити, тогды жъ имѣнья отчизные на ровные части межи себе подѣлити.

АРТЫКУЛЪ 15.

Если бы которая вдова замужъ пошла. Уставуемъ, если бы которая вдова замужъ пошла, а первей будучи за первымъ мужемъ своимъ вѣно оправленое отъ мужа своего мѣла; тогды отъ другого мужа вѣна записаного мѣти не може, нижли бы тотъ мужъ ее другій вмеръ, а дѣти по собѣ зоставилъ, тогды она межи дѣтьми своими ровную часть у въ имѣнью взяти маеть, а на томъ до жывота мѣшкати^[1]. Тогды отъ близкихъ маеть на вдовьемъ столцу на третей части зостати, а по животѣ ее и тая третяя часть маеть спасти на близкихъ^[2], заховатися водлѣ того, яко вышей о томъ написано.

АРТЫКУЛЪ 16.

О имѣнью, на которомъ мужъ жонѣ отправу чынить. Уставуемъ тежъ, ижъ хто кольвекъ описавшы отправу жонѣ своей на которомъ имѣнью своемъ учинившы, того имѣнья своего никому иншому никоторимъ правомъ а ни способомъ записовати а ни въ чужіе руки задавати не можеть, хотя и призволенье отъ жоны показовалъ, безъ очевистого передъ врядомъ сознанья ее; а и врядъ тежъ кождый на таковомъ вѣнованомъ имѣнью никому отправы никоторое чинити не маеть, окромъ добровольного и очевистого передъ врядомъ самое панее вѣнованое призволенья.

АРТЫКУЛЪ 17.

О безплодной жонѣ. Кгды бы которая жона будучы замужемъ безплоднѣ умерла, маючы певное внесенье за выправою отъ родичовъ своихъ, а того бы имѣнья никому не записала, таковое внесенье зась въ тотъ же домъ, съ которого вышло, вернутися маеть родичомъ ее. А которая бы жона незплоднѣ умершы мѣла внесенье и выправу певную отъ братьи съ четвертое части, а никому бы того не записала, а еще бы сестра ее была невыпосажона и за мужъ не выдана; тогды таковое внесенье не приходитъ засе на братью, але на сестру которая бы еще замужъ не выдана была; або если бы оное внесенье отъ сестры своее братья собѣ взяти хотѣли, тогды вмѣсто того сестрѣ невыданой зо всее четвертое части, чого стояти будеть посагъ и выправу дати повинни. Кгды жъ четвертая часть водлугъ давныхъ правъ особливѣ на выправѣ дѣвокъ замужъ отложона безъ всякое розности, хотя бы ихъ было и на болѣй або тежъ и одна ^[3].

АРТЫКУЛЪ 18.

О розводехъ малженскихъ передъ судомъ духовнымъ. Тежъ уставуемъ, ижъ розводъ малженскій маеть быти передъ судомъ духовнымъ обоего стану водлѣ правъ нашихъ хрестіянскихъ: если мужъ зостанеть виненъ зъ розсудку права духовного, тогды жона останеть на оправѣ отъ него описаной; а пакли бы жона винна найдена, тогды внесенье и оправу свою тратить. А вѣдьже если бы розводъ слушный доводомъ для кревности, ижъ ся малженство въ невѣдомости кревности стало, або для иншыхъ причынъ, которые бы се передъ правомъ духовнымъ показали, ижъ бы слушный розводъ мѣлъ быти; тогды при розводѣ вѣнокъ при мужу и внесенье при жонѣ зостати маеть.

1. Въ трет. ред. стат. «А если бы одно дитя зостало; тогды отъ того дитяти альбо отъ ближнихъ маетъ на вдовьемъ».
2. «А ведже сѣдечи на вдовьемъ столцу, не маетъ того имѣнья утратити, але се вовсемъ».
3. Въ трет. редакціи Стат. «а если бы отецъ колко дочекъ за своего живота выдалъ, а еще бы одна або колко ихъ невыданыхъ зостало; тогды той албо тымъ позасталымъ, не зо всее четвертое части, але водлугь ихъ права и личбы съ части тое четвертое выправа дана быти маетъ».