Статут ВКЛ (1566)/4

← РОЗДѢЛЪ ТРЕТІЙ О ВОЛЬНОСТЯХЪ ШЛЯХЕЦКИХЪ И О РОЗМНОЖЕНЬЮ ВЕЛИКОГО КНЯЗСТВА ЛИТОВСКОГО

РОЗДѢЛЪ 4-Й О СУДЬЯХЪ И О СУДѢХЪ 1566

РОЗДѢЛЪ ПЯТЫЙ О ОПРАВѢ ПОСАГОУ →

Прапануем да спампаваньня!

АРТЫКУЛЪ 1.

О выбиранью судей въ повѣтѣ.

Уставуемъ, ижъ въ тыхъ повѣтѣхъ, которые суть нижей росписаны, и въ кождомъ таковомъ повѣтѣ, гдѣ еще до сихъ часовъ не обраны, зособна мають быти судья подсудокъ и писаръ, которые такъ и тымъ обычаемъ мають быть выбираны и на таковые уряды установлены. На первей маемъ мы Господаръ часъ певный зложити и то листы нашими по всихъ таковыхъ повѣтехъ ознаймити, гдѣ въ кождомъ повѣтѣ княжата панове рада наша, также рицерство и шляхта вси, хто кольвекъ якого стану будетъ тамъ имѣнья свои мѣти, зъѣхатися мають до двора, которій на посродку того повѣту будетъ, и тые которые ся зъѣдутъ не ждучи никого, хтобы въ повѣтѣ имѣнье маючи пріѣхати не хотѣлъ, ку тому року мають выбрати зо всее шляхты того повѣту братьи своее на кождый врядъ таковый, на судейство чотырохъ людей добрихъ, на подсудство другихъ чотырохъ, на писарство третихъ чотырохъ людей добрыхъ, цнотливыхъ, ростропныхъ въ правѣ у мѣстныхъ^[1], роду шляхецского, въ томъ повѣтѣ добрѣ оселыхъ, не иное вѣры только Хрестіянское; и выбравшы ихъ, тыхъ выбраныхъ черезъ листы свои намъ Господарю ознаймити мають, а мы съ тыхъ всихъ дванадцати особъ выберемъ трехъ до того повѣту на врядъ земскій, на судъ судою и подсудка и писара.

Которіе отъ насъ выбраные и потверженые на першыхъ рокохъ судовыхъ передъ повѣтовымъ воеводою, або въ небытности воеводиной передъ кашталяны, а въ земли Жомоитской передъ старостою Жомоитскимъ, при зобранью шляхты, што ихъ тамъ въ томъ часѣ будеть, маеть судья подсудокъ и писаръ присегнути тыми словы:

Я присегаю Пану Богу во Троицы единому, ижъ въ томъ повѣтѣ водлѣ Бога справедливе подле права и статуту сего писаного Великого Князства Литовского, водлугъ жалобы и отпору, ничого не прикладаючи ани уймуючи, буду сознавати и записы пріимовати, не фолкгуючи высокимъ и подлымъ станомъ на достойностяхъ и на врядехъ седячимъ, на богатого ани на вбогого, на пріятеля кровного заховалого, ани на непріятеля, на тутошнего, не на гостя не смотречи, не съ пріязни не зъ вазни не зъ боязни не за посулы и дары, ани сподеваючися на потомъ дарованья и якого нагороженья, и не радечи сторонѣ, а ни боячися казни помсты и погрозокъ, але самого Бога и его светую справедливость и право посполитое и сумнѣнье свое передъ, очима маючи, тежъ роковъ николи не омѣшкиваючи, кромъ великое правдивое и зложное хоробы; а якъ то справедливе присегаю Богу, такъ ми Боже помози; а естли несправедливе,— Боже ми не поможы.

А писаръ земскій маеть по Руску литерами и словы Рускими вси листы и позвы писати, а не иншымъ языкомъ и словы, и такъ маетъ писаръ присегати.

Я, N, присегаю Пану Богу въ Троицы единому на томъ, ижъ справедливе водлѣ Бога и того права писаного и подлугъ мовенья и споровъ сторонъ, ничего не прикладаючы ани уймуючы, у суду записовати и радити судьи и подсудку вѣрнѣ и справедливе, подлѣ сознанья сторонъ и споровъ на судехъ и освѣдченья и оповѣданья судового и сказанья судового, и въ книги судовые вписовати буду а пилновати и догледовати, абы подлѣ сее присеги моее справедливе были вписованы, не маючы баченья на высокіе а ни подлые станы на достойностяхъ седячыхъ, на богатого, ани на вбогого на пріятеля кровного заховалого, ани на непріятеля, на тутошнего, ани на гостя, не съ пріязни не зъ вазни не за посулы и дары, а не боечыся вазни и помсты и погрозокъ, не ждучы нагороженья, але самого Бога и его светую справедливость и право посполитое передъ очима маючы, и сумнѣнье свое добрѣ а побожнѣ справуючы, такъ ми Боже поможы.

А потомъ, кгды бы который съ тыхъ на початку и знову отъ насъ теперъ выбраные умеръ, судья, подсудокъ, або писаръ, а трафило се бы то въ небытности нашой; тогды тые, которые на тыхъ урядѣхъ зостануть, мають о томъ дати знати воеводѣ своему, а въ земли Жомоитской старостѣ Жомоитскому; а воевода маеть черезъ листы свои старостамъ врадникамъ и шляхтѣ того повѣту, а староста Жомоитскій тивуномъ шляхтѣ и всякого стану оное Жимоитское земли обывателемъ часъ зложити, на который зъѣхавшися вси станы оного повѣту и до такового двору нашого, яко вышей описано, мають на мѣстце того умерлого чотырохъ особъ таковыхъ же, яко и первымъ выменено, обрати и намъ черезъ листы свои отворотные за печатью воеводиною ознаймить; а мы потомъ съ тыхъ чотырохъ одного, который се намъ видѣти будеть, выбравшы на мѣстцѣ того умерлого судьи подсудка або писара, которого съ тыхъ въ тотъ часъ потребовати будуть, не отволочнѣ установити. А гдѣ бы на судство обрали подсудка або писара земского; тогды на тое мѣстце тамъ же за разомъ на тотъ врядъ обобравшы къ намъ послати мають; а тотъ, кому тотъ врядъ дамо, потомъ на першыхъ рокохъ судовыхъ будеть повиненъ первей на мѣстцу тамъ передъ тымъ воеводою або кашталяномъ и передъ старостою оного суду такъ, яко вышей описано, присегнути, тожъ потомъ врядомъ своимъ владнути и справавовати. И такъ мають вжо вѣчными часы въ повѣтехъ около выбранья тыхъ врядниковъ справоватися и заховати.

АРТЫКУЛЪ 2.

О моцы и владности судей, ижъ кождый и кождого стану повиненъ передъ нами становитися, и о томъ, хтобы передъ насъ не сталъ.

Тежъ уставуемъ и даемъ моцъ вѣчными часы, звирхностью владности нашое господарское съ прозволеньемъ пановъ радъ нашихъ и всихъ становъ всихъ земль того панства нашого Великого Князства Литовского, тымъ врядомъ повѣтовымъ въ кождымъ повѣтѣ судьи и подсудку на роки зложоные позывати передъ себе, судити и справовати всихъ пановъ радъ духовныхъ и свѣцскихъ, княжатъ, пановъ хоруговныхъ, шляхту и бояръ о земскіе речы зъ имѣней однако одностайно, хто одно кольве въ томъ повѣтѣ имѣнья свои мѣти будеть, жадного не выймуючы ани зъ суду имене ихъ не выпущаючы, кромъ насъ Господара и врядниковъ зъ имѣней нашихъ, а не ихъ имѣней, тыхъ они судити не могуть, толко мы Господаръ, або тотъ кому то подъ часомъ воли нашое злецымъ. А хто бы кольвекъ маючи имѣнье свое въ томъ повѣтѣ передъ ними се становити не хотѣлъ на часы певные, яко то нижей на своемъ мѣстцу постановлено, за позвы не хотѣлъ, або и ставшы съ початку а до конца розсудку и сказанья ихъ не слухаючы прочь отъ суду отышолъ, не хотечы быти права послушнымъ; на таковые хто кольвекъ будеть, такъ высокого яко и низшого стану, даемъ моцъ зуполную оному вряду земскому судьи и подсудку, ижъ мають подле сего права и артыкуловъ нижей о томъ постановеныхъ и написаныхъ поступокъ и сказанье и отправу чинити противъ кождому, яко хто у во што упадетъ, ажъ до остатнего стопня права. Нижли тотъ судъ земскій толко тыхъ артыкуловъ судити не маеть и моцы мѣти не будеть, которіе нижей у артыкулѣ двадцатомъ суть описаны и замковому суду злецоны обычаемъ и способомъ о поступкахъ описанымъ. А выписы и листы судовые маеть писаръ рукою своею подписывати а не выдавати сторонѣ, ажъ передъ судьею и подсудкомъ вычтетъ первей нижли до книгъ уписавши.

АРТЫКУЛЪ 3.

О пересудахъ судьи подсудку або писару.

Тежъ уставуемъ, ижъ кгды бы судъ земскій и которій же кольвекъ врядъ нашихъ кому што на комъ присудилъ; тогды отъ презыску того, хто зыщетъ, судья и подсудокъ мають брати отъ копы одному грошу, и съ того пересуду судьи два грошы а подсудку третій грошъ. Нижли што се дотчыеть, долгу хтобы платити не хотѣлъ, ажъ за позвы съ права; тогды не тотъ пересудъ платити маеть, хто зыщетъ свою суму, але тотъ, хто позычилъ а безъ права заплатити не хотѣлъ, таковый самъ долги и пересудъ платити повиненъ будетъ, окромъ долковъ по умерлой руцѣ. А што се дотычеть того, хто се отъ кого оттяжетъ; тогды памятного яко отъ великое такъ и отъ малое речы не повиненъ дати большей только чотыри грошы. А писару земскому и кгродскому такій доходъ: отъ кождыхъ позвовъ по грошу, за вписованье въ книги грошъ, отъ выпису съ книгъ грошъ, и оповѣданья крывды писарю грошъ, а отъ судовыхъ листовъ и выписовъ за кождый позовъ, кгды отсужонъ будеть, по два грошы; а черезъ то яко вышей описано, бы тежъ наиболшей письма и працы было и речъ наиважнѣйшая, писари не мають больше брати отъ листу паркгаминового, естли сторона потребуеть съ привѣсистыми печатьми, за працу писару дванадцать грошей, а паркгаменъ шнуры и воскъ сторона будеть повинна дати.

АРТЫКУЛЪ 4.

О возныхъ присезѣ и врядѣ ихъ.

Уставуемъ, хотечи мѣти, абы въ правѣ земскомъ завжды порядокъ и справа обычайнѣ шла, даемъ моцъ, абы воеводове въ кождомъ повѣтѣ судовомъ, гдѣ книги лежать, а староста Жемоитскій тамъ въ той земли Жомоитской возныхъ выбирали пострыгали уставляли тежъ шляхту людей добрихъ вѣры годныхъ цнотливыхъ оселыхъ въ томъ же повѣтѣ, такъ много яко бы ихъ потреба указовала водлѣ повѣту и шырокости его а потребы людской, а принявшы отъ его присегу въ рейстра свои вписовати и листы свои таковымъ вознымъ давати мають, и присега имъ маеть быти выдана тыми словы: Я, N, присегаю Пану Богу въ Троицы Единому на томъ, ижъ будучи мнѣ вознымъ маю вѣрнѣ и цнотливѣ и побожнѣ на томъ врядѣ заховатися, позвы справедливе относити и отдавати тежъ правдиве зозновати то, на што буду посланъ, кгвалты бо и огледавши и раны правдивѣ до книгъ врядовыхъ сознавати, и все иншое справовати, што належытъ врадови моему, не за посулами ани пріязнью ани за непріязнью ани за боязнью, одно водлѣ Бога и светое справедливости, такъ ми Боже поможы.— А завжды возный посланый зъ уряду што кольвекъ справовати будеть, при кождой таковой справѣ мають мѣти при собѣ сторону двохъ шляхтичовъ, о которіе не возный але сторона старатися и ихъ собѣ набывати маеть.

АРТЫКУЛЪ 5.

Справа и врадъ возного.

А то врядъ возного: позвы носити и ими позывати, хотя безъ вѣдомости врядовое, и рокъ складати водлугъ старого обычаю, а заповѣдити ижъ бы отъ права не уѣжджали, свѣдкомъ водлѣ сказанья у суду присегу выдавати, при освѣдченью всякомъ быти, увязывати зъ выроку и съ првданья судьи и подсудка за листы ихъ, а кгвалты розбои раны головщызны оглядывати и до книгъ врядовыхъ, отъ которого вряду будеть посланъ, сознавати, и завжды маеть мѣти при собѣ при кождой таковой справѣ двухъ шляхтичовъ для подпору вызнанья и свѣдецства своего, а вѣдже бои грабежы и крывды раны и иншые шкоды тымъ подобные меншые а не крывавые, которые самъ одинъ и безъ стороны шляхты огледати и безъ посланья врядового на то ѣхати можеть, однакожъ безъ жадного омѣшканья то все до книгъ врядовыхъ маеть сознати, а сознане возного въ книгахъ такъ будеть моцно, яко бы самъ возный очевисто сталъ. А гдѣ бы возный до книгъ не доѣхавшы и сознанья не вчынившы умеръ, а не было бы то въ книгахъ; тогды оная шляхта сторона и по смерти оного возного маеть стати и подперети сознанья его. А гдѣ бы возный што кольвекъ такового непристойнаго справовалъ, албо ижъ бы неправдивѣ сознавалъ, альбо врядомъ своимъ ку шкодѣ которое стороны фальшовалъ, шафовалъ за якою жъ кольвекъ причиною; тогды за доводомъ ничымъ только горломъ маеть быти каранъ. А што се дотычеть доходу возному, отъ кого што маеть брати, то естъ коли гдѣ на которую справу поѣдеть, тогды отъ мили по грошу у въ одну сторону, а што назадъ поѣдеть, за то ничого брати не маеть; а если мили не поѣдеть, только на мѣстцы позвы дастъ огледывати кгвалту ранъ або прислухиватисе чого будеть предсе, ему отъ того грошъ, а отъ свѣдченья грошъ; а гдѣ на увязованье поѣдеть зъ тыхъ же людей, въ которые се увязывати будеть, зъ службы по грошу брати маеть, а съ пустовщызны таковое, которую пашуть, по пол-грошу, а отъ пол-службы а отъ сумы пенезей отправуючы се отъ копы по два пенези брати будеть.

АРТЫКУЛЪ 6.

Хто бы возного за посланьемъ и за листы вряду замкового и земского на справтъ сбилъ, або листы въ него отнемшы содралъ.

Уставуемъ тежъ, хто бы возного на справѣ за листы воеводъ вряду замкового або повѣтового збилъ, або листы отъ него отнемшы содралъ, и тымъ врядъ не учтилъ; тогды тотъ за доводомъ слушнымъ маеть возного навезати совито водлѣ стану его, а не замку албо у дворѣ повѣтовомъ шесть недѣль седѣти, а сторону которую бы при возномъ сбито маеть также за слушньшъ доводомъ навезати водлѣ стану, якого будеть.

АРТЫКУЛЪ 7.

Абы особы врядовые сами судили а нихто иншый на ихъ мѣстцу.

Уставуемъ, абы судья и подсудокъ сами черезъ себе ани черезъ свои намѣстники суды и роки отправовали, окромѣ того еслибы который зъ нихъ самъ захоралъ, альбо бы тежъ свои власные потребы мѣлъ; тогды маеть человѣкомъ добримъ, цнотливымъ, вѣры годнымъ, и въ правѣ умѣстныхъ шляхтою такъ же въ томъ повѣтѣ оселомъ, мѣстце свое засадити. А вѣдьже тотъ судья або подсудокъ, который се форымъ мѣнилъ быть, на другихъ рокохъ подъ тою жъ присегою, которую на врядъ свой присегалъ, маеть повѣдити, ижъ правдиве немоцонъ былъ, а не ку зволоцѣ права а ни ку чыей шкодѣ тою се форобою вымовлялъ. А гдѣ бы судья або подсудокъ безъ правдивое и обложное немоцы роковъ судовыхъ омѣшкивалъ, а то бы се колко кроть показывало, таковый врядъ свой тратить. А писаръ можеть подписка, або одного або и двохъ або колко ему будеть потреба, при собѣ мѣти, а пилнѣ самъ завжды догледати, абы вѣрнѣ а правдивѣ не проволокаючы але за разомъ до книгъ записывано было, а гдѣ бы се што такового въ правѣ отъ нихъ мылило, неповинна будеть шляхта подписковъ смотрѣти, але на самомъ писару за оною помылкою шкоды своее доходити мають. А гдѣ быхмо зъ тыхъ врядника земского судью подсудка або писара на справы земскіе або въ посельствѣ послали; тогды до зверненья того маемъ злетити и засадити мѣсце его человѣкомъ добримъ, шляхтичомъ въ томъ же повѣтѣ оселымъ; а тотъ маетъ первей въ томъ же повѣтѣ на рокохъ першыхъ передъ урядомъ замковымъ на томъ присегнути, ижъ до зверненья оного врядника справедливость людскую правдиве отправовати будеть.

АРТЫКУЛЪ 8.

О судьяхъ, якіе мають быти обираны.

Уставуемъ, ижъ на тые вряды яко на судейство на подсудковство и писарство не мають быти выбираны духовные особы, а ни старостове державцы, а ни тивунове того повѣту, а ни хоружые и ни хто таковый, хтобы въ томъ повѣтѣ нашомъ врядникомъ былъ; але таковые и такъ мають быти выбираны яко вышей описано.

АРТЫКУЛЪ 9.

Яко и при комъ позвы позыватися мають, и якъ и гдѣ то освѣдчыти, и што возному за проѣздъ давати.

Тежъ хтобы на кого позвы взялъ и тыми позвы позывати его хотѣлъ, тогды позвы колько ихъ будеть, маеть очевисто давати и позывати можеть очевисто при костелѣ у суду и на кождомъ мѣстцу, гдѣ бы кольве его зостати и найти могъ, черезъ возного; а гдѣ бы ихъ очевисто дати не могъ, тогды на имѣнью того, съ которого се крывда дѣеть, маеть положыти въ дворѣ томъ, або у ворота уткнути; а естьли въ томъ имѣнью, съ которого кривда дѣеть, двора оного пана не было и ку жадному двору того пана оное имѣнье не прислухало, яко то бываетъ села данники на Руси и инде въ томъ панствѣ нашомъ, тогды тые позвы предсе што до наиблизшаго двора тое волости оного пана несены и въ ономъ дворѣ, яко о томъ вышей описано, врядовнѣ покладаны быти мають, и рокъ, который за тыми позвы зложыть, маеть на обоихъ позвехъ написати, абы и позваная и поводовая сторона року вѣдоми певны и пилны были. А кгды бы возный писати не вмѣлъ; тогды будеть повиненъ оного позванья сознанье на письмѣ подъ печатью своею дати и на рокохъ судовыхъ передъ врядомъ земскимъ сознати, которое сознане за слушное у права принято быти маеть.

АРТЫКУЛЪ 10.

О печати нашой господарской земской и тежъ о печатехъ врядовыхъ, которими што печатано маеть быти.

Тежъ мы Господаръ даемъ подъ гербомъ того панства нашего Великого Князства Литовского, погонею, печать до кождого повѣту, тую печать писаръ земскій присяжный въ себе самъ а не хто иншый ховати маеть, которою печатью и подъ тытуломъ нашимъ позвы мають быти печатованы а выдаваны, а иншые никоторые листы выписы и сознанья кромѣ только самихъ позвовъ тою печатью не маеть быти печатовано; але будуть печатованы всякіе листы того вряду земского судовые выписы и сказанья печатьми судьиною подсудковою, а подписованы рукою того жъ писара земского.

АРТЫКУЛЪ 11.

О книгахъ земскихъ, въ кождомъ повѣте гдѣ будутъ хованы.

Уставуемъ тежъ, хотечы то мѣти, и приказуемъ, абы въ кождомъ таковомъ повѣтѣ, гдѣ судъ земскій будеть, въ замку альбо у дворѣ нашомъ, судья подсудокъ и писаръ земскій посполъ зъ шляхтою выбрали збудовали и патрыли таковое мѣсто, гдѣ бы завжды книги земскіе безпечнѣ отъ всякое пригоды были захованы. А кгды роки ихъ сужоны будуть, по выволанью роковъ мають книги еще не мней тры дни лежати, при которыхъ быти мають не отъѣждаючы судья подъсудокъ и писаръ для сознанья и выписовъ бранья и для иншыхъ потребъ шляхецскихъ; а разъѣжджаючися мають тые книги вложыти и заховати въ скриню моцную за трема замками, отъ которыхъ одинъ ключъ будеть у судьи другой у подсудка а третій у писара, а печатьми своими запечатовати мають. А передъ роками тотъ урядъ яко судья такъ подсудокъ и писаръ за три дни мають пріѣхати и списати въ реестръ позвы для того, хто кого первей позвалъ, абы тежъ тотъ а не иный былъ первей сужонъ. А кгды зъ реистру тры разы вызовуть, а не отзоветца тотъ кого волають; таковый маеть быти сказанъ, яко бы не сталъ. Тымъ же обычаемъ и поводовая сторона маеть розумѣно быти, ижъ волавшы сторонъ одного дня и другого, а третего дня волавшы, сторона не уставаючая року маеть быти сказана за нестанье свое.

АРТЫКУЛЪ 12.

Хто бы за позваньемъ позвы на першые другіе и третіе роки не сталъ безъ причыны слушное.

Уставуемъ тежъ, хто бы будучы позванъ на першыхъ рокохъ не сталъ, и причины слушное нестанья своего у суду не оповѣдалъ; таковый маеть сторонѣ на другихъ рокохъ, первей нижли у судъ уступитъ, заплатити нестаного копу грошей, а суду дванадцать грошей, то естъ судьи осмъ грошей а подсудку чотыри грошы. А гдѣ бы о тое жъ на другіе роки также будучи позванъ у права не сталъ; тогды сторонѣ маеть заплатити три рубли грошей, а суду двадцать и чотыри гроши. А естли бы также на третихъ рокохъ судовыхъ о тоежъ будучы позванъ у права не сталъ; таковый вжо въ речи своей упадываеть и тую речъ, о которой былъ позванъ на тые три роки судовые, вѣчиѣ тратитъ; а судъ на таковомъ упорномъ тое о што позванъ будеть шкоды и наклады правные сказати маеть. А гдѣ бы сторона позваная ставшы на рокохъ третихъ упоромъ своимъ тыхъ винъ за нестанье свое платити не хотѣла; тогды о што позвана будеть въ речи своей упадываеть такъ, яко бы и на вси роки не стала, а судъ маеть на таковомъ упорномъ тое, о што былъ позванъ, сказати.

АРТЫКУЛЪ 13.

Хто бы за хоробою або за послугою нашою земскую за позвы стати не хотѣлъ.

Тежъ уставуемъ, хто бы былъ позванъ на роки судовые першіе другіе и третіе, а зашла бы его хороба, або послуга наша земская и припалые потребы земскіе, або сеймъ вальный, або тежъ повѣтрее моровое, для которыхъ бы на тыхъ трехъ рокахъ судовыхъ стати не могъ; тогды за таковымъ нестаньемъ яко нестаного платити такъ и речы тратити не маетъ, нижли особъ суду и сторонѣ маеть дати знати: если жъ бы послуга наша земская або потреба тежъ припала земская, тогды черезъ листы наши и пановъ радъ нашихъ, если бы хороба, тогды листомъ своимъ отворонымъ черезъ у моцованого пріятеля або слугу своего, а сеймъ и повѣтрее моровое то само собою кромъ обсыланя вымовляеть. А вѣдже тотъ, который се форобою закрываеть, потомъ на першыхъ рокохъ за припозванемъ стороны поводовое маеть се отприсегнути, яко правдиве былъ немоцонъ, а если бы присегнути не хотѣлъ, тогды въ речы своей опадываеть. А если бы на третихъ рокохъ за форобою не сталъ, тогды на тыхъ третихъ рокохъ маеть судъ земскій послати до него вознаго и при немъ двохъ шляхтичовъ, передъ которыми тотъ форый на томъ маеть присегнути, ижъ по вси тые роки форъ былъ и за тою форбою стати не моглъ; а кгды присягнеть, на онъ часъ отъ всихъ винъ вышей описаныхъ будеть воленъ, а кгды бы присегнути не хотѣлъ, таковый оный выны маеть платити. И хотя бы предсе форъ былъ, вжо будеть повиненъ самъ черезъ себе або черезъ умоцованого своего на четвертыхъ рокохъ на конецъ усправедливитися не вымовлячисе форобою. Пакли жъ бы и въ четвертыхъ рокохъ черезъ умоцованого усправедливитися не хотѣлъ, тотъ вжо въ речы той, о которую позванъ, упадываетъ и вѣчнѣ то сказано быти маеть.

АРТЫКУЛЪ 14.

Хто бы кого позвавшы на роки судовые, самъ безъ слушное причины не сталъ.

Уставуемъ тежъ, хто бы кого позвавшы ку праву, а будучы стороною поводовою, безъ слушныхъ причинъ, яко вышей о позваномъ описано, и не даючы о собѣ причины слушное суду и сторонѣ знати не далъ, и самъ съ доводомъ своимъ не сталъ; тогды оному позваному, гдѣ бы хотѣлъ его о то другій разъ позвати, маеть первей за нестанье свое справу и накладъ его заплатити, тожъ потомъ о свое мовити. А пакли бы и другій разъ позвалъ о тую жъ речъ, и самъ же и повторе не сталъ; тогды тую речъ, о што позвалъ, тратитъ, а позваный тотъ, хто року и права за позвы пилнуеть, вжо отъ того часу о што позванъ на вси пришлые часы будеть воленъ ^[2]. А если бы сторона поводовая ставшы и у право уступившы, маючы споръ зъ стороною обжалованою на правѣ зъ якихъ припалыхъ причынъ, о которыхъ передъ правомъ не вѣдала, а брала се еще на якій иный доводъ, которого на тотъ часъ ку праву на судѣ зъ собою мѣти не могла, або о немъ не вѣдала, а просила бы на отложене на другіе роки судовые; тогды судъ маеть того допустити, а тымъ речы своей не тратить, а на другихъ рокохъ судовыхъ естли бы самъ не сталъ, або доводу не ставилъ, тогды речъ свою тратитъ. Такъ тежъ и сторона позваная если бы на тыхъ рокохъ и за такъ короткимъ часомъ ему за позвы зложонымъ не могла правдивѣ за якою слушною причиною пристойною и вѣдомою листовъ або заводцы мѣти, и брала бы се въ таковыхъ рокохъ и артыкулехъ на другіе роки; тогды судъ маеть ей того допустити, а вѣдьже на тыхъ другихъ рокохъ будеть повинна зо всимъ готова быти, и то передъ судомъ яснѣ показати, ижъ тотъ рокъ собѣ одержала и впросила не на проволоку якую сторонѣ поводовой, але ижъ безъ того быти не могло. А гдѣ бы се то у суда показало, ижъ неслушнѣ ку кривдѣ и проволоцѣ сторонѣ противной таковый рокъ хто собѣ одержалъ, маючы то мѣти на першыхъ рокохъ; таковый повиненъ сторонѣ шкоды, которые за отволокою его принела, на чомъ присягнеть, платити будеть. Шаблон:Примечания

АРТЫКУЛЪ 15.

Хто бы кого черезъ судъ або еднане ку праву позвалъ.

Уставуемъ, хто бы съ кимъ мѣвшы право и утратившы которую речъ на правѣ або еднаньи, а по судѣ зъеднавшы о то за се его до права позвалъ, и по правѣ тое жъ речы за се знову искалъ и того доходилъ; таковый будеть повиненъ заплатити сторонѣ семь копъ грошей, судьи двѣ копе грошей, а подсудку копу грошей, а тотъ судъ и единанье предсе при моцы зостати маеть.

АРТЫКУЛЪ 16.

Ижъ въ позвѣхъ нихто не маеть ни на кого речей неучтивыхъ писати и образливыхъ доброй славѣ.

Уставуемъ тежъ, ижъ въ позвѣхъ нашихъ земскихъ тые, которые ихъ беруть, не мають писати речей доткливыхъ ку почтивости; а гдѣ бы позвалъ такъ, тогды на такіе позвы сторона позваная ставшы не повинна отповѣдати, ажъ се онъ на другихъ рокохъ на позвѣхъ своихъ поправить, нижли што се дотычеть наѣздовъ домовыхъ, кгвалтовъ бѣлымъ головамъ, выжоги, разбоевъ и иныхъ злочынствъ, которые артыкулы на врядъ нашъ замковый судъ а не земскій належать, о то каждый подлѣ учынку такового можеть въ позвехъ меновите написати.

АРТЫКУЛЪ 17.

Хто имѣнья свои въ розныхъ повѣтехъ маеть, а доколка судовъ розныхъ зъ имѣней розныхъ на одны роки за разомъ будетъ позванъ.

Уставуемъ, естли бы хто съ подданыхъ нашихъ въ розныхъ повѣтехъ имѣнья свои мѣлъ и до розныхъ судовъ былъ позванъ, а роки бы на одинъ часъ въ тыхъ повѣтѣхъ, до которыхъ естъ до суду позванъ, притрафили; тогда маеть въ томъ повѣтѣ стати, до которого естъ о большую речъ припозванъ. А вѣдже сутяжымъ своимъ маеть черезъ листъ свой и черезъ возного и шляхту людей добрихъ стороннихъ и суду повѣтовому, у которого се не становитъ, о собѣ дати вѣдати, ижъ для лепшое и большое речы, о которую естъ позванъ до иншого повѣту, тамъ не становится; а однакожъ съ тыхъ книгъ, у которого се суду становилъ, взявшы выписъ на другихъ рокохъ маеть показати передъ судомъ, у которого се не становилъ, иже се правдиве болшою справою вымовлялъ, тогды нестанного неповиненъ 6удеть платити. А вѣдже на третихъ рокохъ не маеть се болшою справою вымовляти, але се повиненъ становити и въ отказѣ быти яко на завитомъ року, естли не самъ черезъ себе, тогды черезъ умоцованого своего подъ утратою тое речи, о которую позванъ; а предсе оного суду, гдѣ первей и повторе се становилъ, маеть выписъ передъ урядомъ показати.

АРТЫКУЛЪ 18.

Што бы се стало пры бытности нашой и при дворѣ нашомъ, которимъ обычаемъ то маеть сужоно, а хто бы черезъ заказ ^[3] утъхалъ; о гостяхъ чюжоземцахъ.

Уставуемъ тежъ, гдѣ бы при бытности нашой господарской въ томъ панствѣ нашомъ Великомъ Князствѣ Литовскомъ, гдѣ кольвекъ будучи намъ дворомъ нашимъ, учинилъ хто кому кгвалтъ бой раны або якую шкоду; тогды тотъ обвиненый учинившы то при дворѣ нашомъ не маеть се повѣтомъ вымовляти, ани позвы брати и ими се закрывати. Але заразомъ черезъ дворенина нашого будеть повиненъ передъ нами або передъ тымъ урядомъ нашимъ дворнымъ Великого Князства Литовского родичомъ, кому то отъ насъ злецоно будеть, заповѣданый, ставшы усправедливитися передъ урядомъ нашимъ кождому тутъ же и тутошнимъ правомъ безъ року, только за заказомъ, не вымовляючи ани закриваючисе правомъ своимъ. А пакли бы которому чужоземцу при насъ Господары, або хотя и въ небытности нашой, въ которомъ мѣстѣ або подъ которымъ урядомъ у котораго тубылца сталсе кгвалтъ бой разбой зраненье отнятье кгвалтовное маетности его, што кольвекъ съ тыхъ поменныхъ речей; тогды обвиненый въ тыхъ речахъ безъ позву, а мѣщанинъ и простый человѣкъ безъ року, не проволокаючы ничымъ повиненъ усправедливити за заказомъ передъ нами и передъ воеводами врядники нашими замковыми и дворными, а мѣщанинъ мѣшкаючы подъ правомъ Майдеборскимъ передъ мѣскимъ урядомъ. А естли бы хто съ подданыхъ нашыхъ на жалобу гостиную былъ заповѣданъ, а прочъ уѣхалъ; тогды на имѣнье его зъ листомъ нашимъ дворенинъ нашъ маеть быть посланъ, або врядъ замковый маеть послати зъ листомъ своимъ, хотя бы его на имѣнью не было, предсе тотъ листъ на имѣнью его маеть быти положонъ и рокъ зложонъ, ку праву за двѣ недѣли стати, а онъ наконецъ не вымовляючисе будеть повиненъ на тотъ часъ стати и усправедливити, а гдѣ бы предсе на тотъ день ему зложоный не сталъ, тогды маеть быти то на немъ, о што жалоба естъ, водле доводу сказано и отправа дана. Шаблон:Примечания

АРТЫКУЛЪ 19.

О тыхъ, которые не маючы въ томъ повѣтѣ або врядѣ нашомъ осѣлости и тамъ, пріѣхавшы зъ стороны або зъ иного повѣту, збытокъ учинилъ.

Тежъ уставуемъ, ижъ хто кольвекъ зъ иное земли чужоземецъ або хтожъ кольвекъ неосѣлый въ томъ панствѣ нашомъ Великомъ Князствѣ Литовскомъ, пріѣхавшы въ который кольвекъ повѣтъ, гдѣ осѣлости не маеть, або подъ врядъ и до мѣстечка нашого, учынилъ тамъ кому кгвалтъ бой раны шкоду и якій же кольвекъ збытокъ; тогды тамъ же а негдѣ индей на врядѣ нашомъ замковомъ, або гдѣ бы замку не было, въ дворѣ нашомъ сужонъ и сказованъ быти маеть и оправа на немъ чынена. А вѣдже естли бы въ другомъ повѣтѣ по недалеку осѣлость свою мѣлъ або пана, кому служыть, повѣдилъ; такового зъ осѣлости его або передъ его паномъ, кому служыть, правомъ ужывати маеть; а однакожъ слуга панскій неосѣлый, вчынившы кгвалтъ и зраненье, маеть задержанъ быти на замку або на врядѣ двора нашого, а оный о собѣ маеть дати знати пану своему, а гдѣ бы панъ справедливости не вчынилъ, о то самъ до вряду позваный отповѣдати повиненъ, а позывати о то до вряду замкового.

АРТЫКУЛЪ 20.

Што мають судити воеводове старостове державцы, и о ихъ позвехъ.

Уставуемъ тежъ, хотечы мѣти и даючы моцъ, абы воеводове, старостове и державцы нашы, кождый въ повѣтѣ и врядѣ своемъ, судили и справовали и позвы свои давали о тые артыкулы меновите тутъ описаные: то естъ о наѣздъ кгвалтовный на домы шляхецскіе, кгалтъ въ мѣстехъ нашихъ, о пожогу и разбои по дорогахъ, о квалтоване паненъ и невѣстъ, о злодѣйство, о фалшъ, о голову шляхецкую, яко вышей написано о нихъ. А въ не бытности ихъ намѣсники ихъ зъ судьею замковымъ присяглымъ осѣлымъ мають судити и моцъ мѣти будуть справовати и кончыти подле права и сего статуту всему панству нашому Великому Князству Литовскому отъ насъ даного. А гдѣ бы хто на горячомъ учынку тыхъ вышъ мененыхъ артыкулъ которого жъ кольвекъ стану былъ пойманъ, тогды тотъ безъ позву маеть быть сужонъ; а пакли бы заразомъ на горячомъ таковомъ учынку не былъ пойманъ, тогды вжо позвы ку праву маеть быти припозванъ, а позву таковому не маеть быти рокъ дальшый отъ поданя только за двѣ недѣли. А если бы за тыми позвы на рокъ стати не хотѣлъ, тогды врядъ тотъ о томъ намъ маеть дати знати черезъ листъ свой, а мы тому не фолькгуючы, безъ всякое проволоки, и откладанья на иншый часъ, але заразомъ взявшы о томъ отъ того вряду нашого вѣдомость, такового обвиненного и вряду нашого непослушного маемъ зъ земли панствъ нашихъ Великого Князства Литовского казати выволати, и не маемъ ему на тое выволане поднесенья чынити и давати, ажъ бы се первей зъ стороною жалобливою росправилъ.

АРТЫКУЛЪ 21.

О судъи замковомъ.

Уставуемъ, ижъ воеводове, старостове и вси державцы замковые и дворовъ нашихъ повѣтовыхъ мають зособна кождый зъ нихъ на врядѣ своемъ выбрати человѣка доброго шляхтича въ томъ же повѣтѣ осѣлого прысяглого, который уставичнѣ повиненъ будеть посполу зъ урядомъ замковымъ судити и справовати вси речы судовые, которые замку або вряду нашому приналежати будуть. А если бы што недойзрѣньемъ ихъ на томъ урядѣ въ справѣ ихъ поблудило; тогды за отозваньемъ стороны на таковыхъ врядниковъ, яко намѣстника своего и судью замкового и писара, воеводове старостове и державцы повѣтовые съ тымъ вышейописаными врядниками своими замковыми справедливости учынити не хотѣлъ, або сами суду своего справедливости его на правѣ уближенье чынили; тогды таковый врядъ нашъ маеть передъ насъ листомъ нашимъ позванъ быти, на который рокъ тотъ врядъ нашъ маеть передъ нами за листомъ нашимъ самъ албо черезъ умоцованого своего стати, а мы на томъ року таковому укривжоному безъ отволочную справедливость учынити маемъ. А рокъ таковому позванью, естли будемъ въ здѣшнемъ панствѣ нашомъ Великомъ Князствѣ Литовскомъ, чотыри недѣли, а если въ Корунѣ Польской, тогды осмь недѣлъ складанъ быти маеть.

АРТЫКУЛЪ 22.

Роки завитые въ которыхъ речахъ мають быти складаны.

На первей хто кого позоветь о заставу ку бранью пенезей, хотя сторона позваная не станеть, предсе судъ не маеть откладати на дальшые другіе роки, але на першомъ року яко на завитомъ, первей выслухавшы доводы стороны поводовое, маеть сказанье и ввязане стороне поводовой дати, а взявшы отъ него пензи при врядѣ и при книгахъ судовыхъ мають быти положоны до того часу, ажъ сторона позваная ихъ возметь. Другое о отнятье имѣней и выбитье спокойного мѣшканья. Третее о слугу якогожъ кольвекъ стану, або человѣка невольника, который бы, пану своему шкоду учынившы, втекъ прочъ до кого и найденъ былъ въ него и припорученъ ему або враднику его, а онъ бы зъ нимъ справедливости не чынилъ, а если онъ на томъ року не станеть; тогды судъ за доводомъ слушнымъ стороны поводовое маеть сказанье вчынити, и того зъбѣга ему присудити, не откладаючы на другіе роки и дальшый часъ. Четвертое о мыто мостовое и гробелное и перевозы шляхецскіе всякихъ становъ, кгды хто на комъ або подданомъ чіемъ неслушнѣ возметь, маеть позваный на першомъ року яко на завитомъ стати; а естли же не нестанеть, тогды сторонѣ жалобливой нестаньемъ у вину впадываеть, яко около мытъ мостовыхъ и гребленыхъ неслушныхъ вышей описано естъ; а если бы то врядники або мытники наши вчынили, тогды зъ мытниковъ подскарбій земскій зъ урядниковъ нашихъ мы Господаръ справедливость чынити маемъ. Пятое хто бы ѣзами або млынами, гатьми, мостами рѣки портовые гамовалъ, проходу або дороги слушные не вчынившы, а то тымъ бы се кому шкода стала; таковый будучы позванъ на першомъ же року яко на завитомъ маеть се становити; а пакли бы не сталъ, тогды судъ земскій маеть сказанье вчынити и съ заплаченьемъ шкодъ, а средсе суду въ таковыхъ млынахъ або ѣзохъ и мостахъ зъ уряду дороги и пропусты направены и волно вчынены будуть. Шостое если бы хто добровольне записалъ и рокъ въ листѣ своемъ ознаймилъ, а не вчынилъ бы тому досыть; тогды за позвы на першомъ року яко на завитомъ естьли не станеть, во все упадываеть водлѣ листу або запису своего, асудъ вжо (маеть) отправу вчынити подлугъ листу жадныхъ роковъ не складаючы. Семое о раздѣлъ имѣней и маетности всякое межы братьею и сестрами и близкими, также черезъ позвы маеть быть рокъ завитый тымъ обычаемъ и на поручники, а поручнику зъ истцомъ, по комъ ручыли, маеть быти завитый рокъ.

АРТЫКУЛЪ 23.

О сбиванью позвовъ.

Уставуемъ, тежъ хто кого позвы позоветъ, а сторона бы позваная ку тому се року не знала; тогды сторона поводовая позву и року маеть доводити выписомъ съ книгь сознанья возного, а естли бы не довела, тогды позваная сторона не повинна отповѣдати. Къ тому тежъ и на таковые не повинна отповѣдати, если бы хто значнѣ и меновите чого у позвѣ не написалъ и не доложылъ; а еще тежъ неповинна отповѣдати на таковый позовъ, который бы былъ скробанъ, и не мають таковые позвы мѣстца мѣти, которые бы были скробаны, а звлаща естли бы се одинъ съ другимъ не згожалъ въ датѣ або въ чомъ кольвекъ, албо ижъ въ немъ не было даты написано. Над то постерегаючы того, абы хитростью якою для збитья позву, проволокаючы кому право самъ позваный, маючы позвы въ рукахъ своихъ, скробалъ и даты направовалъ, уставуемъ, ижъ кгды бы таковый позовъ отъ обжалованого на правѣ былъ положонъ; тогды сторона поводовая маеть вознымъ на него довести, ижъ ему далъ позовъ цѣлый и не скробаный въ датѣ и во всемъ згодливый, а по таковомъ доводѣ позваный повиненъ ему отповѣдати. А иными никоторыми прычинами позвы не могуть быть сбиты, а вины заплатити поводовой сторонѣ копу грошей а судови дванадцать грошей. Вѣдже въ позвѣ, гдѣ бы одинъ артыкулъ былъ збить причинами вышей описаными; тогды предсе на другіе артыкулы правные сторона повинна отповѣдати.

АРТЫКУЛЪ 24.

О позвѣхъ, якъ долго трывати мають.

Уставуемъ тежъ, ижъ кождые позвы вряду земского трывати далѣй и въ моцы своей быти не мають, только на одны роки судовые, передъ которыми ихъ взято, и для того тые речи, на которые се тыми позвы позывати будеть, у въ оныхъ позвехъ меновите мають быти описаны.

АРТЫКУЛЪ 25.

Хто бы кого отъ суду земского съ повѣту своего до иного права вызвалъ.

Уставуемъ хотечы мѣти, абы нихто никого о речъ суду земскому належачую до иного права замкового и ни до которого иншого отъ своего повѣтового земского суду не смѣлъ вызывати, а хто бы кого до суду замкового або комисарского и до которого кольвекъ иного вряду и суду, кромъ артыкуловъ вышей мененыхъ суду замковому або дворному належачыхъ, вызвалъ; тогды позваный не повиненъ ни передъ кимъ се становити и таковыхъ позвовъ послушнымъ быти, але еще тотъ, хто позвы взялъ и ими позывалъ, за то ижъ мимо судъ свой смѣлъ то учынити, маеть заплатити судьи копу грошей, подсудку полкопы грошей, а сторонѣ тры рубли грошей, окромъ того хто бы записомъ своимъ отступуючы повѣту своего въ якій иншый судъ доброволнѣ подалъ.

АРТЫКУЛЪ 26.

О таковыхъ, которые не маючы въ повѣтѣ осѣлости кого бы тамъ осѣлого позвалъ.

Тежъ уставуемъ, кгды бы хто не маючы въ которомъ повѣтѣ осѣлости, другого кого тамъ осѣлого позвалъ, а шло бы имъ обудвумъ объ одну речъ, тоть позваный осѣлый може заразомъ не отповѣдати и въ право се не вдавати, ажъ бы се оный противникъ его неосѣлый тамъ поддалсе и обовязалсе, тежъ ему въ той речы, кгды жъ объ одну речь идетъ, тамъ жо въ его повѣтѣ отповѣдати и всправедливити не беручы се до своего повѣту; а кгды се подъ то поддастъ и на то обовяжетъ, тогды предсе оный позваный за тыми жъ позвы на онъ же часъ напередъ будегь повиненъ ему се усправедливитися.

АРТЫКУЛЪ 27.

О рокохъ, на которыхъ судья подсудокъ и писаръ зъѣжджатися мають и позваные передъ ними повинни се становити. Тежъ уставуемъ, ижъ судъ земскій маеть быти три кроть до году, то естъ три роки судовые, на которомъ се будуть повинни судья подсудокъ и писаръ на одно мѣстце до замку або двора нашого, которые мѣстца вышей суть описаны, зъѣжджатися, а тамъ мѣшкати двѣ недѣли, если много справъ, а если меншъ справъ, тогды поки росправять и розсудять, а позваные и поводовые будуть повинни передъ ними се становити, а обычаемъ и способомъ нижей въ особливыхъ листцахъ и артыкулехъ описанымъ. Роки мають быти сужоны: первые отъ святое Троицы Рымского свята, и на завтрей се въ понедѣлокъ почнуть; другіе въ осень на день Светого Михайла Рымского жъ свята, и также на завтрее почнуть; третіе зимѣ по Божъемъ Нароженью, о трехъ кролехъ святѣ Рымскомъ, которые на завтрее тежъ судитисе на завтрее зачнуть; червертые въ другомъ году также на день Святое Троицы Рымского свята и на завтрее се почнуть. А судья подсудокъ писаръ маеть суды справовати и на судѣхъ сѣдѣти кождого дня отъ поранку до не испорное годины, а позвы судити поряднѣ зъ реестру не гледечы на особу и нефолкгуючы въ томъ никому, але который первей позвалъ, тотъ на первей сужонъ быти маеть, а которые се на тые роки позвали, тыхъ всихъ на початку роковъ писаръ повиненъ въ реестръ вписати и зъ реестру до права волати будеть. А вѣдже подъ тымъ часомъ роки сужоны быти не мають, наипервей естли бы соймъ вальный Великого Князства Литовского былъ зложонъ, тогды передъ соймомъ за чотыри недѣли роки судомъ устати мають; другое естлибы тежъ листы военные зашли, ино для готованья на войну за шесть недѣль не мають быти роки сужоны, а вѣдже естли бы въ томъ часѣ на войну не выѣхали, тогды на потомъ предсе мають роки за тыми жъ позвы и подъ таковою жъ моцъю сужоны быти; третее естли бы, чого Боже уховай, въ томъ повѣтѣ повѣтрее моровое было, а то бы значнѣ показовало, подъ такимъ часомъ также роки не мають быти сужоны, а по томъ часѣ, яко повѣтрее моровое оминеть, маеть врядъ въ томъ повѣтѣ, гдѣ судъ есть, роки выволати, а тые, которымъ бы была потреба, мають се справовати за тыми жъ позвы своими на другихъ рокохъ, которіе по томъ повѣтрею выволаные близко припадати будуть.

АРТЫКУЛЪ 28.

О позвѣхъ и о року, якій за позвы будеть складанъ, а кождый жалобу свою меновите маеть на позвтъ описати, и о збиванью позвовъ.

Тежъ уставуемъ, ижъ хтобы до кого мѣлъ якое дѣло о крывду албо о якую кольвекъ речъ, тотъ маеть отъ писара земского того повѣту позвы взяти подъ печатью нашою, отъ насъ тому повѣту даною, и въ тыхъ же позвѣхъ жалобу свою достаточнѣ и меновите выписати, а чого въ позвѣ не доложыть, на то сторона позваная отказывати неповинна. Вѣдже гдѣ бы сторона сама хотѣла собѣ позвы написати; тогды кгды принесеть готовые написаные водлѣ права, писаръ, отъ него взявшы доходъ свой грошъ, записовати ихъ будеть повиненъ, и тыми позвы передъ кождыми роками судовыми мають се позывати, даючы ихъ очевисто и кладучы на имѣньяхъ ихъ, съ которыхъ се кривда дѣеть. А кого очевисто позовуть, рокъ чотыри недѣли, а кому на имѣнью положать, шесть недѣль маеть быти складанъ, не отъ даты позву въ немъ описаное, але отъ того часу и дня яко на имѣнью положоны будуть, а меншые и близкіе роки не мають быти за позвы складаны. А пакли бы хто на першыхъ рокохъ судовыхъ не сталъ; тогды на другихъ и на третихъ рокохъ позвовъ и артыкуловъ въ немъ описаныхъ ничымъ сбивати не можеть, ани будеть мочи, але повиненъ будеть отказовати, естли бы тежъ хто кому грабежъ могуть вчынилъ, ино о грабежъ позывати передъ роки за двѣ недѣли.

АРТЫКУЛЪ 29.

Которые бы се дѣели якіе кривды отъ врядниковъ слугъ и подданныхъ чыихъ кольвекъ.

Уставуемъ, естли бы тежъ княжатомъ панятомъ радомъ духовнымъ и свѣцкимъ, шляхтѣ и кому кольве съ подданыхъ нашыхъ, имъ самымъ бояромъ слугамъ людемъ отъ врядниковъ, слугь бояръ и подданыхъ также князскихъ, пановъ радъ, пановъ хоруговныхъ, шляхты кривды якіе кольвекъ въ чомъ дѣели; тогды маеть сторона жалобливая (взявшы) листь нашъ господарскій або отъ суду земского повѣтового, въ которомъ оный и имѣнья ихъ будеть, ѣхати зъ вознымъ до того пана, отъ чыего врядника и бояръ слугь и людей кривды кому се дѣяти будеть, справедливости просечы и жалобы своее реестръ маеть дати. А гдѣ бы самыхъ пановъ въ тыхъ имѣньяхъ ихъ не было, ино врядниковъ ихъ, абы они на слугь бояръ люДей пана своего справедливость чынили. А рокъ праву не маеть быти далшый отъ нихъ покладанъ одно двѣ недѣли. Если бы панове сами такъ и врядники ихъ права дати и справедливость вчынити не хотѣли; тогды сторона жалобливая маеть позвы отъ суду земского взяти по того пана, съ чыего будуть имѣнья кривды дѣяти, и позвы на роки судовые его позвати, абы самъ сталъ и тыхъ, отъ кого се кому кривда будеть дѣяти, поставилъ. А вѣдже въ небытности того пана въ томъ мѣньи не маеть его сторона жалобливая нигдѣ индей шукати, але на томъ жъ имѣнью позвы положыти маеть; а судъ земскій повѣтовый будеть повиненъ межы ними того досмотрѣти и справедливость вчынити. А гдѣ бы позваный самъ або черезъ умоцованого своего стати и тыхъ врядниковъ бояръ и слугъ людей своихъ, кому вина дана, поставити не хотѣлъ; тогды судъ повиненъ ку таковымъ непослушнымъ заховатисе водлугь сего статуту, яко о томъ въ томъ же судейномъ роздѣлѣ у артыкулѣ двадцатомъ естъ описано. А если бы тотъ панъ и хтожъ кольвекъ самъ або врядники ихъ комужъ кольвекъ у кривдахъ ихъ рокъ справедливости зложылъ, а на року зложономъ справедливости вчынити не хотѣлъ безъ слушное правное причыны; тогды такового пана и слугь судъ земскій въ томъ судити маеть, а онъ тому, кому обѣцавшы справедливость учынити, а не вчынилъ, за разомъ у суда сторонѣ рубль грошей заплатити маеть. А вѣдже если бы се то показало на правѣ, ижъ тотъ панъ чынилъ оному справедливость слушную, але онъ ее упоромъ своимъ не принялъ и на ней не переставалъ, и отъ того суду земскому притягнулъ; тогды тотъ того рубля грошей платити не повиненъ будеть, але еще тотъ упорный самъ оному тотъ рубль грошей тутъ же заразомъ у суда заплатити маеть. Отъ того часу панъ шляхтичъ яко листовъ нашихъ або врядниковъ ихъ о учынене справедливости обнесенъ будеть, и такового урядника слугъ и подданныхъ его въ тотъ часъ тамъ застато очевисто и припоручоно было и то доведено; тогды тотъ оного врядника и слугъ и подданыхъ своихъ маеть у вѣдомости мѣти, и за позвы повиненъ будеть ихъ въ суду земского на року зложономъ становити. А вѣдже если панъ при прошеню права врядника слуги и подданого своего у вездѣ имати и до вряду близшого притягнувшы, если бы неосѣлый былъ, правомъ зъ нимъ обыходити, а панъ его въ томъ боронити не маеть.

АРТЫКУЛЪ 30.

Яко стороны у суду заховатися мають за позвы.

Тежъ уставуемъ, хотечы то мѣти, абы у суду жалобы отпоръ поряднѣ безъ сваровъ и непотребного забавенья и проволоки шли, такъ уставуемъ, ижъ напередъ сторона поводовая не чынечы жалобы, але вмѣсто жалобы маеть дать на правѣ позовъ чести и позву своего слушнымъ доводомъ подпирати, а сторона позваная маеть на тотъ позовъ яко на жалобы отказывати и справоватися. Въ которомъ спорѣ если бы сторона поводовая што противъ него услышала, на што бы размышленье потребовала; тогды судья отступленье и пораду зъ ее пріятяли маеть допустати, а будеть ли повторей таяжъ сторона взычанья часу на порадку просити, и того судьи повторе боронити не мають, также тежъ и обжалованой сторонѣ по два-кроть одного дня толко яко и поводовой сторонѣ размышленя на часъ не маеть судъ боронити, а болшъ того свару и споровъ и отволокъ судъ не маеть допущати. А кгды вжо на обѣ сторонѣ справу свою передъ судомъ выповѣдять, а судья съ подсудкомъ потребовали сами собѣ въ томъ розмышленья; тогды мають первей сторонамъ поменути, абы все, што бы на правѣ покладати и отказовати мѣли, мовити и учинити. А кгды вжо то все учинятъ и писаръ то спишеть тогды; вжо надъ то стороны ничого большей прикладати не будуть мочы, ани судъ того пріймовати и писати казати не мають, але судья и подсудокъ мають ся намышляти. Если бы того дня або завтрей розмыслитися не могли, и до третего дня то все взяти на поряду и розмышленье могуть, а третего дня вжо судъ конечное сказанье будеть повиненъ чинити водлугь жалобы и отпору сторонъ, ничого не прикладати ани выймовати. А въ томъ часѣ кгды судья и подсудокъ намышляютца, стороны естли бы хотѣли взяти собѣ на вгоду и еднанье, тогды того они имъ допустити мають. А мы, Господаръ воеводове и врядники наши судья и подсудокъ и судъ замковый або дворный и нихто иный ничого съ головы и зъ умыслу своего судити и сказовати не мають и не будугь мочы, только водле статуту сего, яко въ немъ стоить выображоно.

АРТЫКУЛЪ 31.

О заступованью въ суду одному за другого.

Тежъ уставуемъ, хотечы мѣти абы такъ было на вси потомные часы, ижъ коли бы хто кого другого о которую колвекъ речъ въ суду заступилъ; тогды тотъ вжо будетъ повиненъ самъ безъ жадныхъ позвовъ, на тотъ часъ за тою жъ жалобою зъ суда не сходечы, за него отказовати и усправедливитися. А заступованье инакшое не маеть быти только очевистое, у права ставшы заступити, не черезъ листы и прокураторы. А гдѣ вжо очевисто у права ставшы заступить; тогды позваный або обжалованый отъ того воленъ, а поводовая сторона будеть о томъ съ тымъ заступцею мовить, и речи свое на немъ доводить листы и выписы и оповѣданье, и все тое право и доводъ, которіе поводовая сторона противъ обжалованое стороны въ томъ правѣ мѣла, маеть противко тому заступцы ити и у права мѣстце мѣти такъ яко противъ обжалованому; и мы заступцу за имя обжалованого будемъ розумѣти, и заступца не маеть собѣ до повѣту ани до суду своего належачого откладати и брати, але повиненъ будеть самъ або при собѣ маючы прокуратора того жъ часу, скоро заступитъ, отказывати и до конца усправедливитися.

АРТЫКУЛЪ 32.

О злеценью речы и отдаванью моцы инымъ за себе у права мовити.

Уставуемъ тежъ, ижъ кгды бы хто за позвы або на которомъ року припаломъ не могъ на правѣ быти, такъ за хоробою яко и за иными нѣкоторыми прычынами и потребами своимы; тогды прокуратора або умоцованого своего можеть у мѣсто себе у права мѣти. А вѣдже умоцованый або прокураторъ инакшый иначей установленъ и у права пріймованъ быти маеть, абы ему очевисто злецылъ речъ свою передъ врядомъ которымъ кольвекъ, тымъ земскимъ або замковымъ, и съ того вряду выписъ съ книгъ маеть взяти. А княжата панове рада и панове хоруговные врядники наши шляхты, которіи суть печатей значныхъ, могуть въ речахъ потребахъ своихъ прокураторовъ и умоцованыхъ до права слати зъ листы своими отвороными, припечатовавши ихъ печатью своею и рукою своею власною подписавшы, хто писати умѣеть; за таковыми листы умоцоваными и выписы врядовыми судъ прокуратору маеть допустити у права мовити и справовати, а который бы самъ писати не умѣлъ, тогды передъ врядомъ маеть до книгъ сознанье вчынити. А гдѣ бы тежъ хто зъ шляхты вряду близкости або за хоробою своею до вряду ѣхати и порученья прокуратору очевисто передъ врядомъ сознаньемъ своимъ дати не могъ; тогды тежъ таковый можетъ листомъ отворонымъ до вряду прокуратора умоцованого послати и ему речъ свою злецити, въ которомъ листѣ при печати своей маеть о приложенье печатей шляхтича вѣры годного просити, тогды таковый листъ, въ которомъ поменившы речъ, о што идетъ, остатокъ на позовъ указати зыскъ и трату доложити, и такъ вжо за нимъ прокураторъ моцный у права быти маеть.

АРТЫКУЛЪ 33.

Хтобы самъ не могъ, або не умѣлъ у права мовити.

Уставуемъ тежъ, хто бы очевисто у права стоечы не могь або не умѣлъ самъ мовити або речы своее справовати, поручылъ устнѣ кому иному речъ свою мовити; тогды таковому злеценья инакшого листовного не будеть потреба, але судья злеценемъ устнымъ маеть его за моцного приняти, хотя и неосѣлого. Къ тому кгды бы хто, не могучы самъ справовати речы своее у суда и не вмѣючы мовити, прокуратора потребовалъ; тогды судъ повиненъ ему зъ уряду прокуратора дати, и казати прокуратору отъ него мовити, а речъ его справовати. А въ вображенью маестату нашого господарского обѣцуемъ прокуратора обвиненой сторонѣ дати. За се будеть повиненъ судъ зъ ураду дати прокуратора, и дармо казати ему мовити отъ убогихъ сиротъ и вдовъ немаетныхъ и тымъ тежъ, которыи бы або за пріязнью або тежъ убозтвомъ своимъ прокуратора мѣти и сами речы своее за недостаткомъ своимъ въ суду справовати не могли.

АРТЫКУЛЪ 34.

О прокураторохъ, якіе мають быти и якихъ тежъ судъ маеть пріймовати.

Уставуемъ тежъ, ижъ о имѣнья и всякіе иные речы лежачые рухомые не маеть быти прокураторомъ жаденъ чужоземецъ и неосѣлый у Великомъ Князствѣ Литовскомъ; а вѣдже кому идетъ о горло о честь, въ таковой речы можеть собѣ прокуратора чужоземца и неосѣлого мѣти и отъ себе установити. А судья подсудокъ и писаръ такъ тежъ и тые, которые только духовные имѣнья держать, прокураторовать не мають; а однакожъ и тые вси вышъ помененые въ речахъ своихъ властныхъ сами черезъ себе и чрезъ прокураторовъ своихъ справовати могуть.

АРТЫКУЛЪ 35.

О каранье фальшывыхъ и подступныхъ прокураторовъ, и къ тому ижъ волно сторонѣ прокуратора своего у права подперети, и самому мовити, и другого прокуратора на его мѣстце установити.

Уставуемъ тежъ, ижъ кгды бы который прокураторъ поднявшысе кому речъ его мовити и справовати, а вывѣдывшисе на немъ тое справы и листовъ его огледавшы, выдалъ его въ томъ сторонѣ противной, або до тое стороны его противное присталъ, и отъ него за се напротивко тому, кому се первей обѣцалъ и поднялъ речы мовити, а то бы на него якимъ явнымъ и слушнымъ доводомъ доведено было; тогды таковый, естли есть шляхтичъ, честь тратить, а не шляхтичъ горло тратитъ. А хтобы тежъ у права стоечы хотѣлъ отставити прокуратора, а самъ свою речъ мовити, або другому прокуратору речъ свою злецити; то ему вольно будеть.

АРТЫКУЛЪ 36.

Причыны нестанья прокураторовъ, ижъ то имъ и сторонамъ ихъ шкодити не маеть.

Тежъ уставуемъ, ижъ кгды бы прокураторъ передъ роком права не могучы сторонѣ своей о форобѣ своей дати знати, ижъ бы иншого на его мѣстце послала, або ѣдучы вжо на дорозѣ рознемогсе форобою обложною, такъ же бы самъ на рокъ до суду быти не могь; тогды то яко сторонѣ той, чыю справу на себе взялъ въ речахъ тыхъ, такъ тежъ и прокуратору ничого шкодити не маеть, а хотя бы третіе роки остатніе або рокъ завитый былъ, предсе ничого тратити не будеть. А вѣдже прокураторъ въ той форобѣ скоро се рознехожеть, маеть до вряду близшого о собѣ дати знати, и потомъ врядовнѣ тое форобы довести, а обмогшысе потомъ на першыхъ рокохъ будеть повиненъ присегнути, ижъ правдиво за обложною форобою на тотъ часъ становитисе не могъ. Такъ тежъ слуги посланые отъ пановъ, которыхъ бы на роки до суду пославыхъ въ дорозѣ фороба великая и обложная зашла, по тому жъ будуть повинни заховатисе яко вышей описано. А вѣдьже естли бы прокураторъ або посланецъ и слуга таковый о форобѣ своей дати вѣдати и присегчы на другихъ рокохъ учинити не хотѣли; тогды судъ не дбаючы о таковыхъ вымовкахъ ихъ, сказанье маеть чынити ведле сего статуту. Такъ тежъ если бы хто кольвекъ хотечы кому шкоду учынити, а прокураторъ се учинилъ и листы отъ него подъ печатью его справилъ, а тогды бы ему сторона не поручыла, а за тымъ што кому утратилъ; таковый судъ не маеть быти держанъ, а тотъ прокураторъ, хто бы то учынилъ, ничимъ иньшъ только горломъ маеть быти каранъ.

АРТЫКУЛЪ 37.

Чого прокураторъ безъ стороны своее справовати не можеть.

Тежъ уставуемъ, ижъ прокураторъ за моцъю жадныхъ записовъ и никоторого вызнанья ни отъ кого не маеть у суду чынити и пенезей записаныхъ брати и съ нихъ квитовати, не маючы при собѣ стороны своее. А вѣдже естли бы хто не иогучы або не поспѣючы до вряду по пенези ѣхати, а хотѣлъ черезъ кого иного тые пенези брати и квитовати; тогды иначей не можеть и не маеть только черезъ такового прокуратора або слугу своего, кому особливою на то моцъ и порученье листомъ своимъ подписанымъ рукою своею дасть, або передъ врядомъ близшымъ поручыть, и выписомъ того вряду моцнымъ его на та меновите учынить, таковый моцный можеть пенези брати и моцъ мѣти будеть квитовати.

АРТЫКУЛЪ 38.

Ижъ нихто съ бронями передъ судъ приходити не маеть.

Уставуемъ тежъ грозно приказуючы, абы нихто съ подданыхъ нашихъ княжатъ пановъ радъ, почоншы отъ вышшого ажъ до нижшого стану, яко сами панове такъ и слуги ихъ при панахъ своихъ и безъ пановъ пріятель за пріятелемъ, не смѣлъ въ зброяхъ кафтанахъ и съ такими бронями, то естъ съ древомъ зо щепомъ зъ ручницою зъ лукомъ и съ кушою и зъ иными всякими, до суду замкового земского приходити и при собѣ мѣти; а вѣдже кордъ и мечъ то при собѣ мѣти можеть и носити. А который бы черезъ сее росказанье наше важылсе съ таковыми бронями передъ судъ прійти, таковый (въ подл. пробѣлъ) и ознайменемъ вряду нашого маеть намъ Господару заплатити дванадцать рублей грошей, а предсе судъ его справы не маеть до того часу, поки будеть съ таковою бронею до суду приходити. А если бы предсе упоромъ своимъ не хотѣлъ отъ себе таковое заказаное брони отложити и тамъ зъ нею у суду былъ; тогды судъ заховуючы сторону жалобливую послушную, а другая бы сторона противная чынила сему росказанью нашому, досыть маеть подлѣ права поступокъ сказанье напротивко упорному учынити, такъ яко бы тежъ и въ правѣ не стоялъ.

АРТЫКУЛЪ 39.

Хто бы кого передъ правомъ словомъ або рукою сегнулъ, попхнулъ, або ранилъ.

Тежъ уставуемъ, коли хто будучы стану шляхецскаго, стоечы передъ судомъ уступившы речы своее, одинъ на другого словами се неучтивыми торгнулъ; тогды за то маеть зъ сказанья того суду вмѣсто вины сѣдети не замку близшомъ шесть недѣль. А естли бы пхнулъ або рукою ударилъ, а хотя бы и не вдарилъ; тогды маеть заплатити сторонѣ вмѣсто навезки дванадцать рублей грошей, а за вину сѣдѣти шесть недѣль. Пакли бы корда меча або шабли и якое кольвекъ брони безъ слушное причыны добылъ, хотя бы и не ранилъ; таковый руку тратитъ, кгды бы ранилъ, тогды ничымъ иншымъ только горломъ маеть быти каранъ. А вѣдже хто бы свовольнѣ далъ причину кому словы и рукою початокъ учынилъ, а тотъ бы у въ оборонѣ примушоный початкомъ его брони своее добылъ, ранилъ и забилъ; такій таковое покуты и каранья не повиненъ терпѣти. А хто бы тежъ кольве ранившы кого передъ судомъ утекъ, таковый маеть быти зъ земли выволанъ.

АРТЫКУЛЪ 40.

Хто бы на судѣ судью подсудка и писара такъ вряду земского яко и замкового зсоромотилъ, збилъ, ранилъ, або забилъ.

Уставуемъ тежъ, если бы хто кольвекъ пришедшы до суду замкового або земского словы доткливыми славѣ и почтивости его зсоромотилъ; таковый за то виненъ будетъ на замку близшомъ шесть недѣль у везенью сѣдѣти. А если бы ранилъ або забилъ; таковый маеть горломъ каранъ быти, а головщына близкимъ зъ имѣнья его маеть быти плачона, вѣдже обвиненый въ такихъ речахъ позванъ быти маеть передъ насъ Господара, а коли зъ суда такъ найдетсе, тожъ въ томъ по судѣ зъ выроку нашого такъ каранъ быти маеть.

АРТЫКУЛЪ 41.

О томъ, гдѣ бы судья подсудокъ и писаръ такъ замковый яко и земскій седечы кого на судѣ зсоромотилъ, або се на него рукою торгнулъ.

Тежъ уставуемъ, ижъ кгды бы хто съ того вряду нашого такъ замкового яко и земского, сѣдечы на судѣ, кого словы неучтивыми зсоромотилъ; тогды маеть о то позвы нашими передъ насъ позванъ быти, и будеть ли то на него слушнымъ доводомъ переведено, тогды маеть на замку нашомъ шесть недѣль сѣдѣти. А естли бы судья подсудокъ и писаръ самъ квалтъ мѣстцу нашому и суду учынилъ, а кого ранилъ або забилъ, тогды маеть быти каранъ горломъ, а близкимъ зъ имѣнья его головщызна плачона быти маеть.

АРТЫКУЛЪ 42.

Если бы хто, на роки пріѣхавшы до суду земского або замкового, кого другого часу роковъ зранилъ, кгвалтъ або шкоду якую кому учынилъ.

Уставуемъ тежъ, естли бы хто, на роки пріѣхавшы до суду земского або замкового, и часу того поколь роки будуть, кому заступившы на господу кгвалтъ або находку вчынившы, кого зранилъ и притомъ якую кольвекъ шкоду учынилъ, а шкодный того жъ часу утекъ се до суду и то обжаловалъ; тогды судъ замковый и земскій або дворный нашъ господарскій тамошній обжалованого будеть повиненъ вознымы обослати, абы онъ не зъѣжджаючы прочъ передъ судомъ сталъ и обжалованой сторонѣ се справилъ, который безъ позву виненъ будеть стати и того жъ часу на тыхъ же рокохъ справитисе. А пакли бы не росправившысе зъѣхалъ; тогды за непослушенство маеть до суду заплатити три копе грошей, а сторонѣ жалобливой другую три копе грошей, а заплатившы маеть стати яко на завитомъ року и сторонѣ се усправедливити. А пакли бы на першыхъ рокохъ яко на завитомъ не сталъ, або и ставшы въ отказѣ быти не хотѣлъ; тогды судъ замковый або дворный, не чынечы жадное проволоки сторонѣ жалобливой, такъ о зраненье яко и о вси шкоды сказанье на тыхъ першихъ рокохъ учынити маеть.

АРТЫКУЛЪ 43.

Ижъ позваный не маетъ розрывати права речми непотребными.

Уставуемъ, если бы позваная сторона, будучы у права, а отступившы отъ позву, сторонѣ поводовой што такового нового задала, або тежъ зъ стороны до того се правомъ своимъ приповѣдала, хотечы право розорвати а проволоку вчынити; таковой сторонѣ то у суда ити не можеть, маеть судъ отложыти то на сторону, а предсе сторонѣ поводовой справовати чынити водле позву, о то о што позвано, и то кончыти и сказанье чынити водле права. А въ таковыхъ новоприпалыхъ речахъ, естли будуть суду земскому приналежати, судъ маеть имъ казати, абы се о то знову на иншые роки позвали. А естли бы се што такового межы ними о почтивость дотыкало; судъ маеть имъ обѣма сторонамъ рокъ передъ нами Господаремъ станью зложыти, которого будеть сторона обжалованая потребовати, и черезъ выписъ съ книгъ рокъ намъ Господару ознаймити, на который рокъ зложный обѣ двѣ стороне безъ жадныхъ позвовъ мають се передъ нами Господаремъ становити.

АРТЫКУЛЪ 44.

Яко братью недѣлную або вчастниковъ, то есть себровъ, позывати.

Уставуемъ, если бы колко братьи або вчастниковъ держали адно имѣнье себреное, люди тяглые або подданые, а кому бы се кольвекъ отъ того имѣнья людей кривда дѣела въ рухомыхъ речахъ, а они бы яко зъ себе такъ и съ таковыхъ людей справедливость чынити не хотѣли; тогды жалобливая сторона листъ врядовый черезъ вознаго также врядовнѣ посланого на томъ имѣнью положыти маеть, абы се той жалобной сторонѣ справедливость стала. А если бы се той жалобной сторонѣ справедливость не стала; тогды усихъ учасниковъ о то передъ судъ позвы позвати маеть ни на томъ же имѣнью позвы положыти, а хотя бы се оные учасники не зъѣхали, тогды судъ на рокахъ судовыхъ будеть сказанье подлѣ права на имѣнью чынити подлугъ того, яко о томъ о рокохъ судовыхъ написано.

АРТЫКУЛЪ 45.

Ижъ врядниковъ нашихъ зъ ихъ врядовъ нихто судити немаеть одно мы сами Господаръ.

Тежъ уставуемъ, ижъ врядниковъ нашихъ, то естъ воеводъ старостъ державецъ замковъ и дворовъ нашихъ и тивуновъ зъ ихъ врядовъ, которые отъ насъ держать, кому бы кодьвекъ кривда се дѣяла або видѣла, не маеть ихъ нихто судити одно за позвы нашими мы сами Господаръ. Але зъ имѣней своих я если бы кому якую кривду учынили; тогды передъ судомъ земскимъ будуть повинни становитися и отповѣдати.

АРТЫКУЛЪ 46.

О мѣщанехъ и о людехъ нашихъ и кривдахъ ихъ отъ шляхты.

Уставуемъ, если бы хто съ княжатъ пановъ шляхты всякого стану акъ и съ подданыхъ ихъ учынилъ кривду якую кольвекъ мѣщаномъ нашимъ мѣстъ нашихъ, гдѣ права Майдеборскаго не мають, такъ тежъ и людемъ имѣней нашихъ господарскихъ; таковыхъ о учыненье справедливости воеводове старостове и державцы наши мають сами або врадники ихъ, разъ обослати листомъ своимъ, а гдѣ бы его на имѣнью не было, тогды возный маеть листъ на имѣнью его положити, абы самъ зъ себе и съ подданыхъ своихъ справедливость учынилъ. А если за тымъ першымъ обосланьемъ справедливости не вчынилъ, врядъ нашъ маеть у суду земского позвы взяти и таковыхъ позвати на роки судовые, которые въ томъ повѣтѣ будуть, который на первшыхъ рокохъ яко на завитомъ року подъ страченьемъ права маеть стати и подданыхъ своихъ поставити; а судъ маеть, яко съ тымъ самимъ паномъ, такъ и съ поддаными его, отъ которыхъ бы ся мѣщаномъ або людемъ нашимъ кривда дѣела, яко на завитомъ року справедливость учынити, и справа въ чомъ бы противъ мѣщанъ и людемъ нашымъ стали винни, кождый грабежъ, на чомъ доводъ слушный учынять, зъ навезкою казати заплатити.

АРТЫКУЛЪ 47.

О мѣщанехъ права Майдеборскаго.

Тежъ уставуемъ, если бы которому зъ мѣщанъ нашихъ права Майдеборскаго которая кривда дѣела отъ князей пановъ земянъ, а они бы сами доброволнѣ усправедливити не хотѣли; тогды такового кождого мѣщанинъ маеть до суду земского повѣтового позвати, и далей поступовати противко ему подлѣ поступку права и статуту земского.

АРТЫКУЛЪ 48.

О учасникохъ, яко мають близкости имѣнья доходити лежачого.

Тежъ о речъ сполечную, которую жъ кольвекъ вси учасники весполъ у права мовити и се доходити мають, а одинъ безъ другого самъ чынить а ни ку кривдѣ иншыхъ учасникохъ своихъ никоторое речы сполечное притягивати не можеть. А вѣдже естли бы иншые участники вси посполу которое речы сполечное у права доходити а ни о ней мовити не хотѣли; тогды тотъ, который доходить всхочетъ, маеть о то припозвати оныхъ участниковъ своихъ на роки судовые передъ врядъ повѣтовый, въ которомъ оные участники его осѣлостями своими будуть, а въ небытности ихъ самыхъ, тогды позвы на имѣньяхъ ихъ положыти, складаючы рокъ очевисто чотыры недѣли, а заочнѣ шесть недѣль. А хто бы съ таковыхъ участниковъ за першыми позвы не сталъ, тогды того другими позвы о тое жъ на другіе роки позвати; а естли бы и за другими позвы на другихъ рокохъ не сталъ, тогды и въ третее яко на завитый рокъ позвати; а гдѣ бы за третими позвы и на третихъ рокохъ судовыхъ яко на завитомъ року хто не сталъ, тогды вжо оный вчастникъ, который речи сполечное доходити усхочеть, самъ одинъ можеть доходити и безъ иныхъ вчастниковъ, а позваный будеть повиненъ вжо ему самому, хотя бы иншыхъ учасниковъ не було при немъ, отказовати. И иншые вчастники, которые бы и за третими позвы передъ урядомъ становити не хотѣли; тые позваного, если правъ зосталъ, о тежъ напотомъ у право поволокати а ни на немъ того доходити не мають, а ни тежъ учасника своего, которій бы того дошолъ, частей своихъ у права доходити не могуть, и кгды жъ вже отъ того за непослушенствомъ и нестаньемъ своимъ черезъ трои роки отпали, выймучы таковыхъ учасниковъ, до которыхъ бы за троими позвы для далекого отъѣханья яко по чужыхъ сторонахъ по рыцерству и наукахъ ихъ, а вѣдомость о таковомъ позванью ихъ подлѣ доводу слушного ихъ и узнанья судового прійти не могла. А вѣдже абы небытностью таковыхъ учасниковъ тотъ участникъ, который бы того доходити хотѣлъ, для продлуженья напотомъ не шкодовалъ, а если бы добрѣ оселый иожеть самъ одинъ того доходити, описавшысь позваному на осѣлости своей; а естли бы того права отсужонъ былъ, ино вжо оные учасники его повторе на немъ того жъ права поискивати а ни доходити не мають, и естли бы поискивали и хотѣли, тогды онъ самъ отъ нихъ у права заступовати боронити своимъ накладомъ маеть и повиненъ будеть.

АРТЫКУЛЪ 49.

О заповѣди и о заруки о речъ сужоную.

Тежъ уставуемъ, хто бы на комъ правомъ што презыскалъ, то естъ имѣнье люди або земли якіе жъ кольвекъ кгрунты лежачые; тогды маеть ему въ то увязанье справа дано быти, а зарука зъ уряду заеть быти положона, абы тотъ, хто на правѣ упустилъ въ то се черезъ тое не вступовалъ и увязыванья не боронилъ. А пакли бы увязыванья не допустилъ албо се по ввязыванью въ то вступовалъ; тогды тую заруку зъ уряду положоную маеть платити половицу на насъ Господара а половицу сторонѣ жалобливой, а вѣдже зарука болшая не маеть быти только водле важности тое речы, о што идеть, а тотъ, кому што присужоно, предсе то маеть держати.

АРТЫКУЛЪ 50.

Хто бы послѣ права и присяги того жъ искалъ, што передъ правомъ утратилъ.

Тежъ уставуемъ, если бы хто чого искалъ, а пустилъ бы его на присегу, або тежъ съ права была бы ему всказана присяга, а онъ бы присегнулъ а потомъ бы онъ што его обжаловалъ, хто бы колвекъ тое жъ речы на немъ и чого жъ кольве, што правомъ утратившы, у другое того искалъ, менуючы ижъ бы несправедливе присегнулъ, и хотѣлъ на того, который присягнулъ, доводити; тогды таковый доводъ водлѣ права не маеть ему быти допущонъ, але ижъ по присезѣ тоежъ речы искалъ, которую у права утратилъ, маеть чотыри недѣли на замку нашомъ сѣдети, а шкоду оправити, на чомъ слушный доводъ сторонѣ укажетъ и учинитъ. А гдѣ бы ничого такового не примовляючы словы не соромотечы только речы сужоное у другій разъ искалъ; тогды сѣденья не будеть повиненъ, только маеть шкоду платити, на што слушный доводъ учинитъ.

АРТЫКУЛЪ 51.

О свѣдкохъ, якіе мають быти у права пріймованы.

Уставуемъ тежъ, ижъ на всякую речъ въ кождого суда свѣдки мають быти вѣры хрестіянское и таковые, которые привильями нашими до того припущоны суть, люди добрые вѣры годные и неподойзреные. Вѣдже судья первей, нижли сторонъ або свѣдковъ ку свядецству припуститъ, маеть ихъ розважыти, абы паметали на Пана Бога и на справедливость его и почтивость свою.

АРТЫКУЛЪ 52.

О доводѣхъ и отводѣхъ.

Уставуемъ, ижъ кгды бы судья, выслухавшы жалобы и отпору сторонъ, скажетъ которой кольвекъ сторонѣ поводъ або отводъ, а оная сторона на оный часъ, которій мѣла доводити або отводити, не доводила або ся не отведетъ, таковая речъ свою тратить. А вѣдже если бы сторона заразомъ которого свѣтка ставити не могла, тогды судъ до завтрея отложити можетъ и маеть, а то вже будеть подъ страченьемъ права рокъ завитый. А доводъ и отводъ на всякую речь маеть быти наипервей черезъ письмо, черезъ свѣдки, а то суть наипевнѣйшые и накгрунтовнѣйшые доводы будуть, теды доводъ и отводъ черезъ присегу кому письма або свѣдковъ не достанетъ, такъ тежъ черезъ певные знаки, яко о кождомъ доводѣ таковомъ зособна естъ нижей описано.

АРТЫКУЛЪ 53.

Которые ку свѣдѣцству мають быти припущоны.

Уставуемъ тежъ, ижъ ку свѣдецству не мають быти прыпущоны тые, которые суть правомъ переконаны, што тамъ же передъ правомъ тотъ, хто ему наганитъ, доводити маеть, а если не доведеть, тогды ку доводу припущонъ быти маеть. Ку тому не мають свѣдчыти невольники слуги за пановъ ани тежъ противъ пановъ, шаленые, то естъ которые розуму не мають, потомужъ свѣдками быти не мають одинъ другому, которимъ сполнѣ вину дадутъ, або помочниками ихъ будуть.

АРТЫКУЛЪ 54.

О свѣдкохъ, которымъ бы хто што ку нимъ хотѣлъ мовити.

Если бы сторона противная хотела ку свѣдкомъ што мовити и ганити имъ, тогды тутъ же заразомъ передъ правомъ и первей нижли ихъ ку свѣдѣцству або ку присязѣ припустять, ку нимъ мовити и на ихъ доводити не уступуючы съ права то учынити. А гдѣ бы на которого свѣдка што велъ, а не довелъ; тогды маеть того свѣдка навезати водлугъ стану его; а переведетъ ли, тогды тотъ свѣдкомъ свѣтокъ быти не можеть, а сторона поводовая на того мѣстце иншого свѣдка маеть поставити; а пустившы свѣдковъ ку свядецству, тогды вже по свядецствѣ къ нимъ правнѣ ничого мовити не можеть.

АРТЫКУЛЪ 55.

На своихъ свѣдкохъ по правгь ни хто ничого искати не можеть.

Уставуемъ, хто бы въ якой кольвекъ речы передъ правомъ выдалъ свѣдковъ, а тые свѣдки противъ ему самому посвѣдчыли; тогды онъ на тыхъ свѣдкохъ по правѣ и свядецствѣ того поискивати и до права ихъ позывати не маеть.

АРТЫКУЛЪ 56.

Сведѣцствомъ двохъ або трехъ свѣдковъ маеть сторона речъ свою одержати, и хто бы тежъ оставившы доводъ, пустилъ стороне на присегу.

Тежъ уставуемъ, ижъ сторона поводовая речы своее маеть доводити трема або двома свѣдкома людьми вѣры годными а неподойзреными, бо если бы свѣдковъ не мѣлъ, тогды и зъ двома свѣдками вѣры годными и неподойзреными, при которыхъ двохъ свѣдкохъ въ недостатку третего самъ маеть присегнути, и тымъ речъ свою одержати, а вѣдже не о честь не о кгвалтъ а ни о наѣздъ домовый, и тежъ гдѣ бы не шло сторонѣ обжалованой о горло, такъ тежъ и о землю, на што особливе на мѣстцахъ своихъ доводы суть написаны. А хто бы оставляючы доводъ добровольнѣ, свѣдковъ пустилъ сторонѣ на присегу о которую кольвекъ речъ; тогды тая сторона, кгды се добровольнѣ за присегу возметъ и присягнетъ, маеть речъ свою одержати, а если присягнути не хочеть, речъ свою тратитъ.

АРТЫКУЛЪ 57.

О доводехъ листовныхъ.

Могутъ тежъ быти доводы листовные, то естъ записы на имѣнья и иные выписы, або оповѣданья съ книгъ канцляреи нашое, съ книгъ судовыхъ земскихъ замковыхъ, и черезъ церокграфы подъ печатьми и съ подписаньемъ руки власное, яко о томъ шырей нижей на мѣстцы своемъ естъ написано, бывають тежъ доводы черезъ певные и не отменные знаки, яко о томъ о кгвалтехъ и границахъ меновите и значнѣ нижей написано.

АРТЫКУЛЪ 58.

О коліисыяхъ нашихъ господарскихъ, въ которихъ речахъ мають быти даваны.

Уставуемъ тежъ, ижъ листы наши комисейные ко вчынкомъ справедливости только въ тыхъ речыхъ мають быти даваны, одно о границахъ межы имѣньями нашими шляхецскими и выкупованье имѣней нашихъ господарскихъ; а иншые речи вси яко шляхта межы собою, такъ и вси панове духовные и свѣцкіе мають ся справовати передъ судомъ нашимъ земскимъ.

АРТЫКУЛЪ 59.

О роки заплаттъ пенежной.

Тежъ уставуемъ, ижъ кождой заплатѣ пенежной съ права сказаной мають быти роки заплатѣ судовнѣ положоны: петма и десятма копамъ грошей чотыри недѣли, а петмадесятъ копамъ грошей шесть недѣль, а сту копамъ грошей дванадцать недѣль, а тисечы копамъ роки зложыти на кождую чверть лѣта по сту копъ грошей, поколь тую тисечу копъ грошей заплатитъ; а если бы на тые роки не заплатилъ, тогды въ той сумѣ маеть быти во имѣнье его увязованье дано, нижли если бы се хто листомъ своимъ записалъ, на который рокъ заплатитъ, тогды тотъ виненъ водлугъ листу своего на рокъ въ листѣ описаный платити, а судъ таковому жадныхъ роковъ складати не маеть.

АРТЫКУЛЪ 60.

О полюбовномъ суду.

Уставуемъ тежъ, кгды судьи полюбовные кому презыскъ судовъне взыскали и листы того взысканья сполу обѣ двѣ стороне подъ печатьми своими дали, а тотъ бы водлѣ суда ихъ того держати и тому досыть вчынити не хотѣлъ; тогды тотъ листъ маеть быть положонъ передъ судомъ земскимъ, а судья вгленувшы въ оный листъ маеть его заховати при моцы и отправу дати. А гдѣ бы се судъ полюбовный показалъ розный; а таковый судъ мають се припозвати передъ врядъ земскій, а тамъ на конецъ собѣ справедливости доходити.

АРТЫКУЛЪ 61.

О отзыванью изъ суда до насъ Господара.

Уставуемъ тежъ, коли бы ся кому съ подданныхъ нашихъ сказанье у суду земского або замкового або подкоморого не водлѣ права видѣло, такъ поводовой якъ и отпорной сторонѣ; тогды будетъ кождыи тыхъ сторонъ такъ поводовой яко и отпорной волно по сказанью судовомъ отозвати до насъ Господара. А вѣдже тотъ, хто отзываеть, не маеть суду словъ суровыхъ мовити при отозвѣ, одно тымъ словы: пане судья! тое сказанье твое видитъ ми се не водлѣ права, одзывамсе съ тымъ до Господара его милости. А по одзыванью поки ся передъ нами стороны правомъ розопруть, судъ отправы чинити не будеть; а мы Господаръ отозвы судити маемъ и будемъ съ паны рады нашими здѣшними Литовскими и въ границахъ того жъ панства нашого Великого Князства Литовского и въ земляхъ того панства будучы. А за границою яко нихто ни кого позывати не маеть такъ и апелевати не мають быти вольно; а хотя бы се и вызвали и апелевали за границы Литовскіе изъ земли того панства; тогды и мы Господаръ такихъ речей судити не маемъ и на врядѣ нашомъ не допустимъ отправовати, а тотъ, который вызоветъ сторону за границу заплатити маеть вызваному дванадцать рублей грошей.

АРТЫКУЛЪ 62.

О отозвехъ, гдѣ бы колько братьи або вчастниковъ позвали кому ку праву, а потомъ отозвавшысе отъ суду по сказаньи естли бы одинъ зъ нихъ зъедналсе, а другіе, которіе се не еднали, могуть отозву пильновати.

Тежъ уставуемъ, если бы колько вчастниковъ стороною поводовою або отпорною будучы мѣли съ нимъ право о якую кольвекъ речъ, а сказанье бы противъ нихъ вышло, въ чомъ бы они видечы собѣ кривду и до насъ Господара отозвавшысе, одинъ зъ нихъ або два зъ стороною зъедналисе кромъ участниковъ, а потомъ бы другая сторона отъ позву хотѣла тымъ быти права, отбиваючы тыхъ, съ которыми се не еднала, для того ижъ иншые вчастники ихъ зъедналися и зъ апеляцыи выступили; тогды таковый упоръ у права не маеть быти пріймованъ, одно тые, которые ся нееднали, могутъ отозву пильновати, и сказанье маеть быти чынено, бо тые, которые се зъеднали, зуполную моцъ отъ участниковъ ку тому праву ку еднанью мѣли.

АРТЫКУЛЪ 63.

О чомъ отозву судъ допустити не маеть.

Напередъ хтобы кому описался и обвезалъ въ чомъ листомъ своимъ або на врядѣ вызналъ, а таковый записъ найденъ бы слушный и врядовный, а тотъ, хто ся опишеть, не пріймуючы сказанья апелевати хотѣлъ, проволоку чынечы, тому отзовъ ити не маеть. А также тежъ нихто не маеть отзывати збиваючы позовъ скаженьемъ року и иными припалыми речами причынами, але по сказанью головное речы о што позвано маеть апелевати. Такъ тежъ и таковому не маеть быти допущоны отзовъ, хтобы ся ку чому самъ доброволнѣ зналъ.

АРТЫКУЛЪ 64.

За апеляцыями рокъ завитый маеть быти складанъ, и о томъ хто бы неслушнѣ апеловалъ.

Уставуемъ, ижъ отозвовъ або апеляцылмъ отъ уряду рокъ завитый маеть быти покладанъ, пры бытности нашой въ тутошнемъ панствѣ нашомъ Великомъ Князствѣ Литовскомъ чотыры недѣли, а въ небытности нашой въ здѣшнемъ панствѣ, ино по пріѣханью съ Коруны Польское а по въѣханью въ границы Великого Князства изъ земль ему належачыхъ, также чотыри недѣли, а кгды намъ будучы въ Корунѣ Польской отзовъ быти не маеть. А хто не слушнѣ противъ правъ отзоветца, а мы Господаръ сказанье судовое потвредимъ, тогды тотъ оному, противъ которому ся отозвалъ, маеть шесть копъ вины грошей заплатити, а платы пожытки або доходы, которые бралъ по отозвѣ, зъ навезкою маеть за слушнымъ доводомъ, въ томъ часѣ держачы тое, што право идетъ чинилъ и бралъ, маеть ускаржоному вернути для тое прычыны, абы ся нихто упорне и въ чужомъ корыстѣчы надъ право ку проволоцѣ сторонѣ своей противной не отзывалъ.

АРТЫКУЛЪ 65.

Которого часу отъ суду земского и замкового отзовъ до насъ Господара маеть быти.

Уставуемъ, естли бы ся кому сказанья отъ суду земского и замкового видѣла кривда; таковый маеть того жъ часу отъ суду не отходечы отозватися обычаемъ вышейменованымъ, нижли большей ку помоцы собѣ не брати ничого и прикладати не маеть, только тые што было передъ судомъ першымъ, отъ которого апеловалъ, а если бы того дня въ правѣ стоечы не отзывалъ, а хотѣлъ бы на завтрее въ томъ ся отозвати, такову апеляцыя не маеть быти допущона.

АРТЫКУЛЪ 66.

О давностяхъ земскихъ.

Хто бы о имѣне лежачое давность земскую десеть лѣтъ у молчанью былъ не позывалъ ани листовъ упоминальныхъ не бралъ, уставуемъ, ижъ таковый о то вѣчнѣ молчати маеть; а хотя жъ бы се и поминалъ и ку праву позывалъ и въ року стоялъ, а речы до конца не довелъ, а потомъ также отъ даты листовъ або позвовъ давность земскую десеть лѣтъ промолчалъ и не впоминался, таковый вжо о таковое имѣнье вѣчнѣ молчати маеть.

АРТЫКУЛЪ 67.

О отправахъ речей сужоныхъ.

Уставуемъ, ижъ кождоя отправа речы сужоное маеть быти плачона на роки земскіе, яко вышей описано, а по выйстью роковъ гдѣ бы ся заплата не стала; тогды судъ земскій маеть возного послати и при немъ двухъ шляхтичовъ земянъ, которые отправу вчинити мають на имѣнью его водлѣ статуту и шацунку нижей описаного, и положыти закладъ на листѣ увяжчомъ такъ великій, яко о самую речъ идетъ. А естлибы о тотъ урядъ дбалости мѣти увязанья поступити не хотѣлъ; тогды урядъ земскій маеть отослати до уряду замкового або дворного, а сторона поводовая маеть оного противного припозвати до уряду замкового на двѣ недѣли яко на завитой рокъ. И кгды доведетъ сторона поводовая такового впору и не послушенства его; тогды врядъ замковый, гдѣ воевода будеть, ино воевода, або стороста, або державца сами особами своими, а въ небытности ихъ, ино намѣстники ихъ зъ рамени нашого господарского винни будуть всю шляхту того повѣту обослати, и день зложывшы съ ними ся рушыти, и моцно яко што первей у суду земского сказано такъ и въ закладехъ у во имѣнья того непослушного увезати, которое заруки половица сторонѣ поводовой быти маеть, а другая половица на насъ Господара. А гдѣ бы еще повторе тотъ же за позваньемъ до кгроду а рамени и звирхности вряду нашого господарского спротивилсе; тогды врядъ замковый, того се всего достаточнѣ выведавши, намъ Господару листомъ своимъ маеть ознаймити, а мы Господаръ съ канцляреи нашое листы роскажемъ выдати по всему панству нашому Великому Князству Литовскому, и за горло его поймавшы, съ права гдѣ ся въ томъ виненъ покажетъ, ничымъ иншымъ только горломъ карати роскажемъ. О речъ сужоную о заруки тые жъ воеводове старостове и державцы судовые и ихъ врядники тымъ обычаемъ, яко вышей описано, на имѣньяхъ таковыхъ упорныхъ взрушеньемъ повѣту отправовати моцно мають; а шляхта за обосланьемъ старостинскимъ будуть повинни збройно яко на войну на таковое увязанье и за се на поиманье такового противника нашого ѣхати, выймуючы съ того пановъ радъ и врядниковъ нашихъ дворныхъ. А который бы шляхтичъ, будучи въ дому своемъ, а на таковую потребу нашу за старостою рушитися и ѣхати не хотѣлъ; тогды таковый за доводомъ слушнымъ старостинымъ виненъ будеть намъ Господару двадцать и чотыри рубли грошей заплатити, а за отправу возному, колько кроть поѣдетъ, отъ копы по пол-гроша яко вышей описано, а замковому увяжчому потому жъ, яко и передъ тымъ бывало, отъ кождое копы по шести грошей, которые увяжчое маеть быти взято на виноватомъ. А который бы врядъ такъ земскій яко и замковый по выстю року заплатѣ зложоного сторонѣ жалобливой отправы дати не хотѣлъ и зволокъ то до чотырохъ недѣль; тогды тотъ судъ будеть повиненъ сторонѣ жалобливой вси шкоды и наклады, што по выйстью року зложономъ въ томъ шкодовати будеть, на што слушный доводъ учынить, подлугъ права самъ платити и отправовати.

АРТЫКУЛЪ 68.

На имѣнью лежачомъ отправа сумы пензей.

Уставуемъ тежъ, кгды бы отъ суду нашого господарского або тежъ отъ суду замкового земского было послано увязати за якую суму присужоную; тогды возный зъ уряду приданый, маючы при собѣ шляхту и людей добрыхъ стороннихъ, маеть увезати за кождою двадцать копъ службу людей потому жъ и уволоку осѣлую, а за десеть копъ грошей въ пол-службы або въ пол-волоки, потомужъ и въ землю пустовскую, а за копу грошъ въ моркгъ земли погною, а простого поля тотъ же моркгъ за петдесятъ грошъ, а сеножати моркгъ, пол-копы грошъ ^[4], а земли лесное, которая бы се годила на пашню, за сорокъ грошъ моркгъ, а бобровое земли моркгъ за двадцать грошей, а пожытки пущы озера и рѣки водле важности ихъ. Шаблон:Примечания

АРТЫКУЛЪ 69.

О кгвалтовное выбитье спокойного держанья.

Тежъ уставуемъ, хтобы кого выбилъ съ спокойного держанья такъ изъ имѣня яко и отнятьемъ людей кгрунтовъ; тогды оный выбитый того жъ часу, а надалѣй въ чотырохъ недѣляхъ отъ выбитью, маеть припозвати того, хто выбилъ его, до вряду замкового на рокъ завитый на двѣ недѣли. А кгды доведетъ держанья своего оного кгвалтовного и упорного а безправного выбитья стороны своее противное; тогды врядъ замковый або дворный судовый маеть всказати ему кгвалтъ и шкоду зъ навезкою, и черезъ возного положывшы закладъ на листѣ своемъ, яко тая речъ, съ которою выбитъ, стоитъ, маеть за се выбитому пустить въ держанье. И пакли бы сьпротивилъ и не поступилъ возному увязанья и боронилъ самъ черезъ себе або черезъ врядниковъ и черезъ кого жъ кольвекъ; тогды врядъ противъ тому повиненъ самъ ѣхати, повѣтъ рушывшы, и далей поступовать, яко о томъ ширей у артыкулѣ шестдесятъ осмомъ вышей сего роздѣлу есть описано. Потомужъ хто бы се кому листомъ своимъ передъ врядомъ описалъ и обовезалсе, што колвекъ выполняти, а тому досыть не вчинилъ, увязанья моцно боронилъ, а было бы въ листѣ записѣ доложоно моцного увязанья за листы нашими або врядовыми; тогды такжо врядъ замковый зъ рамени нашого противъ таковому заховатися маеть.

АРТЫКУЛЪ 70.

О подкоморыхъ и о ихъ врядѣ.

Уставуемъ, ижъ въ кождомъ повѣтѣ подкоморый присяглый и осѣлый въ повѣтѣ томъ, которого мы Господаръ дамо, и маеть быти подкоморый на томъ урядѣ до живота своего, яко и иные врядники земскіе. А напервей нижли тымъ рядомъ справовати будеть, маеть присегу на тотъ врадъ свой учинити тыми словы: Я. Н. присегаю Пану Богу всемогущему въ Троицы Единому, ижъ на врядѣ томъ земскомъ подкоморскомъ, который зъ ласки изъ рукъ его королевское милости беру, его Королевской милости Господару своему милостивому вѣренъ буду, справуючи тотъ врядъ вѣрне и справедливе, такъ судъ моемъ подкоморскомъ, яко тежъ и при сыпованью границъ ничого большей на томъ врядѣ не постерегаючы одно справедливости светое, и не даючыся ни въ чемъ уводити а ни приязьнею ани даромъ, также справы мои подкоморскіе на всемъ вѣрне справуючы, и споры зъ обудву сторонъ зъ усказаньемъ черезъ мене учиненымъ пильнѣ до книгъ своихъ судовыхъ уписуючы, такъ ми Боже помози.

Врядъ подкоморого.

По всякихъ розницахъ земленыхъ и граничныхъ за одосланьемъ отъ суду земского маеть подкоморый моцъю звирхности нашое а владзы уряду своего давати позвы по стороны подъ именемъ и печатью своею, и рокъ завитый складати на выѣздъ на кгрунтъ за чотыри недѣли на всякіе розници земленые або граничные, и выѣхавшы и огледавшы выводовъ права листовъ и знаковъ граничныхъ и свѣдковъ, чіе листы лѣпшые и знаки граничные явнѣйшые и свѣдки слушнѣйшые будуть, тую сторону ку доводу маеть припустити, и выслухавшы доводу подлѣ статуту маеть кгрунтъ певный сказати, и границы копцы знаки граничные учинити, и на то листы суду своего подъ печатью и съ подписомъ руки своее дати. А гдѣ бы зъ обѣюхъ сторонъ вывода правного на письмѣ або тежъ и знаковъ граничныхъ явныхъ и слушныхъ не было; тогды поводовая сторона при жалобѣ своей маеть быти ку доводу припущона. Тежъ, абы право ведучы о кгрунтъ певный або о розницы граничные зъ однымъ, не мѣлъ отъ кого иного зъ стороны переказы въ томъ правѣ, яко се то придавати звыкло отъ околичныхъ сусѣдовъ границами и межами прилеглыхъ ку тоиу кгрунту, о который право идетъ, для того сторона поводовая або жалобная маеть околичныхъ сусѣдовъ на тотъ же выѣздъ позвы подкоморого притягнути ку пригледанью выводу при постановенью границъ, ку тому жъ ачъ кождый рокъ выѣзду подкоморого на кгрунтъ маеть быти завжды завитый. А вѣдже гдѣ бы которая сторона тотъ же часъ и рокъ або форобою правдивою зложона была, або иншую справу передъ инымъ врядомъ мѣла; тогды съ тыхъ прычинъ маеть быти вольна отъ того року, а вѣдже о форобѣ своей естли се передъ рокомъ придеть, маеть въ часъ урадови подкоморого и сторонѣ ознаймити, абы того року не пильновано; а подкоморій повиненъ будеть на иншый часъ переложыти, за которымъ переложенемъ на другомъ року сторона, которая на першомъ року не стала, повинна будеть наипервей водлѣ статуту сумнѣньемъ и присегою своею правдивое форобы довести, и потомъ зъ стороною противною росправу судовную наконецъ приняти, а около большое справы, которую бы передъ инымъ врядомъ мѣли, маеть довести свѣдецствомъ.

Справа Урядовая.

По суду подкоморого естли бы за присуженьемъ кгрунту и границъ шло о якіе колвекъ шкоды; тогды о то маеть быти отосланье за се до того жъ суду земского, отъ которого справа на судъ подкоморого пришла. А апеляцыя або отзовъ отъ подкоморого маеть быти до насъ Господара. А вѣдже ажъ по сконченью справы судовое за которымъ отозвомъ мають быти властные отъ насъ Господара на кгрунтъ комисаре въ ономъ же повѣтѣ осѣлые, а звлаща кашталянъ оного повѣту, а гдѣ бы оного повѣту каштеляна не было, тогды маршалокъ повѣтовый и зъ иными комисари, передъ которыми будеть повиненъ подкоморій справы суда своего оказати; а они моцни будуть судъ подкоморого и границы, естли бы въ чомъ выкрочилъ, поправити, або тежъ, если добрѣ судилъ, при моцы зоставати. А хто бы тежъ безъ причыны слушное отъ суду подкоморого отзовъ учынилъ, тотъ потомъ за высланьемъ комисаровъ нашихъ въ томъ дознаныхъ повиненъ заплатити вины на врядъ подкоморого двѣ копе грошей и шкоды сторонѣ нагородити подлѣ слушного доводу. Гдѣ бы тежъ розницы въ кгрунтахъ придалися на границы сполной дву повѣтовъ; тогды не одинъ который подкоморій але оба два зъ обудву повѣтовъ на такій кгрунтъ певный выѣхати мають. Заплата подкоморому маеть быти отъ кождого нарожного копца по двадцати и чотыри грошій Литовскихъ, а отъ посреднихъ копцовъ отъ кождого по дванадцати грошей. А вѣдже копцы одинъ отъ другого не мають близшіе чинены одно черезъ три шнури волочные, окромъ того гдѣ бы се граница закривеная придала и частыхъ копцовъ потребовала, а гдѣ бы тежъ копцовъ потреба не была, одно прогоненье межи было, тогды отъ таковое межи отъ кождыхъ трохъ шнуровъ волочныхъ дванадцать грошей.

О коморникохъ.

А ижъ бы отправа всякихъ справъ, вряду подкоморого належачыхъ, омѣшканья и затрудненья никоторого не пріймуючи, але тымъ снадней кромъ вшелякое проволоки и продолженья скутокъ, а конецъ свой пріймовала. Про то въ кождомъ повѣтѣ подкоморый ку помочи своей маеть обрати одного або тежъ и двохъ коморниковъ, шляхтичовъ въ повѣтѣ осѣлыхъ людей годныхъ и статечныхъ, которые на рокохъ судовыхъ передъ кашталяномъ або маршалкомъ повѣтовымъ и передъ врядомъ земскимъ або дворнымъ мають присегу таковую жъ, якую самъ подкоморій, на врядъ свой коморницкій учынити; а потомъ кождый зъ нихъ по особну за сланьемъ подкоморого, гдѣ бы самъ подкоморый на которой справѣ быти не могъ, тую всю моцъ и владность зуполную мѣти мають и будуть яко самъ подкоморый.

1. Замість слів «у мѣстныхъ» має бути «умѣстныхъ».
2. Въ трет. ред. стат. прибавлено: «Ведже и обмова тая, причинами статутовыми, хоробою, або службою нашою Господарскою и земскую, сторонѣ поводовой немаетъ большъ ити и служити, только на своихъ рокохъ. А если бы сторона» и пр.
3. Въ подлин. пропущено: заказъ.
4. Въ трет. ред. стат. «а сеножати моркгь пятдесятъ грошей».