Статут ВКЛ (1566)/2
| ← РОЗДѢЛЪ ПЕРВЫЙ О ПЕРСОНѢ ГОСПОДАРСКОЙ | РОЗДѢЛЪ ВТОРЫЙ О ОБОРОНѢ ЗЕМСКОЙ 1566 |
РОЗДѢЛЪ ТРЕТІЙ О ВОЛЬНОСТЯХЪ ШЛЯХЕЦКИХЪ И О РОЗМНОЖЕНЬЮ ВЕЛИКОГО КНЯЗСТВА ЛИТОВСКОГО → |
Прапануем да спампаваньня!
АРТЫКУЛЪ 1.
[правіць]О повинности яко вси обыватели Великого Князства литовского чынитъ мають.
Уставуемъ тежъ съ призволеньемъ радъ нашихъ зуполныхъ и всѣхъ становъ подданныхъ панства нашого Великаго Князства, ижъ кождый князь и панъ дховный и тежъ дворянинъ бояринъ и вдовы кождые и иные станы, и татарове наши, такъ мѣщане мѣстъ нашихъ, маючи земское имѣнье и лѣта зуполные маючы, часу потребы зъ нами и потомками нашими або при гетманохъ нашихъ винни будуть сами особами своими войну служыти и выправовати на службу военную, коли бы кольвекъ была потреба водлѣ уфалы земское соймовъ нашихъ Великаго Князства, якая на онъ часъ будеть потреба оказовати [1], то естъ и похожыхъ зъ имѣней зъ людей, яко будетъ потреба, отчызныхъ выслужоныхъ и купленныхъ. А вдовы и сироты и дѣти лѣтъ зуполныхъ не маючи мають выправовати водле важности имѣней своихъ, а тымъ обычаемъ; маеть быти выправа пахолка зо всимъ на добромъ кони, што бы конъ стоялъ наименшей осмъ копъ грошей литовскихъ, а на немъ сукня цвѣтная, панцеръ, прилбица, мечъ, павеза древо съ прапорцемъ цветнымъ. А который бы бояринъ або мѣщенинъ не мѣлъ въ своемъ имѣнью людей такъ много, яко устава будеть, тотъ самъ предсе маеть ѣхати и служити; такъ тежъ которій не маеть пѣшо ити зъ ручницою або зъ рогатиною, а на мѣстцу наименованомъ черезъ листы наши або гетмана нашого великого маеть ся очевисто каждый становити и датися написати и ошафовати гетману нашому великому на тотъ день, которій черезъ насъ або черезъ гетмана нашого къ тому попису будеть положонъ и выволанъ. А коли бы было колко братьи недѣленое; тогды братья мають межы себе годнѣйшаго лѣтъ дорослыхъ выбравшы послати, который зъ имѣнья недѣленого маеть войну служыти тымъ же обычаемъ, яко вышей описано. А хтобы отъ насъ Господаря держалъ якое имѣньѣ нашо въ заставѣ; тогды тотъ не повиненъ будеть выправовати на войну. Хочемъ тежъ мѣти и уставуемъ, абы подданые нашы вси мѣщане ку валной потребѣ зъ иншыми людьми нашими войну служили, або зъ дозволеньемъ нашимъ водлѣ постановеня нашого на войну выправовали. А хто бы кольвекъ съ тыхъ подданыхъ нашихъ шляхты и рыцерства всякаго стану, также маючы имѣнье земское, войны не служылъ, або пріѣхавшы на рокъ постановеный не пописалъ, а хотя бы и пописался, а шыфу не ждалъ, або и шыховавшы се безъ воли нашое або отъ гетмана нашого великого прочъ поѣхалъ; тотъ имѣнье свое все тратитъ подъ тымъ обычаемъ, яко бы войны не служылъ. И для того жъ кождого гетмана великого мы Господаръ обѣцуемъ тотъ урядъ (т.е. гетманство) годнымъ и досвѣдчонымъ людемъ народу шляхецкого родичомъ стародавнымъ тутошнего панстдемъ Великого Князства Литовскаго давати, и тое мѣстце засаживати.
АРТЫКУЛЪ 2.
[правіць]О постановеню обороны земское только на соймѣ.
Обѣцуем и уставуемъ вѣчными часы быти держано, ижъ кгды будеть потреба противко которого непріятеля нашого обороны земское сему панству нашому Великому Князству Литовскому, албо валка вести; тогды мы сами Господаръ або и съ паны радами нашими не маемъ ани будемъ мочы того учынити, ани серебщызны и поплату никоторую установляти, ажъ первей соймъ великій вальный зложывшы въ томъ панствѣ нашомъ Великомъ Князствѣ Литовскомъ, на которомъ за росказаньемъ и листы нашими будуть повинни вси княжата и панове рады духовные и свѣцскіе, маршалки и иные врядники земскіе и дворные, панове хоруговные, послы земскіе повѣтовые зъѣхатися; тежъ на онъ часъ на соймѣ великомъ валномъ зо всими радами нашими и зо всими княжаты и паняты и зо всимъ рыцерствомъ порядою а позволеньемъ ихъ маемъ таковые речы становити а не иначей. А вѣдьже гдѣ бы отъ котораго непріятеля нашого якое прудкое уторгненье было въ се панство наше Великое Князство; тогды и безъ сойму толко за листы нашими, а въ небытности нашой за листы пановъ радъ нашихъ гетмана нашого великого мають вси князи и панове подданые нашы, войны павинны, на часъ и мѣстце назначоное ѣхати, яко на кгвалтъ, и то зъ милости Речы Посполитое боронечы собѣ жоны и дѣтей маетности отчызны своее.
АРТЫКУЛЪ 3.
[правіць]О невызволенье листы нашими, и тежъ кого волно вызволити.
Тежъ уставуемъ, ижъ мы не маемъ жаднаго зъ войны отъ службы земское такъ словнымъ росказаньемъ яко и презъ листы наши вызволити изъ войска отпущати, такъ тежъ и гетманове наши не будутъ мочы вызволити и зъ войска отпущати, кромъ тыхъ врядниковъ нашихъ и слугъ, которихъ мы Гоеподаръ на онъ часъ для послугъ нашихъ и справъ земскихъ зоставимъ, а вѣдже и тые почты свои водле можности имѣней ихъ винны слати и выправовати. А што се дотычеть старостъ и державецъ украиныхъ, тые часу вальки также повинни зъ имѣней своихъ у войско, яко иншые шляхта, почты свои ку службѣ земской выправовати и становити. А сами они, звлаща тые, которіе быхмо у войско листы нашими и панове рады або гетманъ нашъ не казали ити, таковые почты свои, што зъ урядовъ своихъ новинни, становити мають.
АРТЫКУЛЪ 4.
[правіць]О имѣнья заставныя, хто зъ нихъ службу земскую служити маетъ.
Тежъ уставуемъ, если бы который шляхтичъ або панъ хто закупитъ и въ держанью будеть, службу земскую съ того заступовати маеть. Нижли если бы тотъ собѣ на записѣ заставномъ обваровалъ; а тотъ, хто заставитъ, тымъ описомъ своимъ въ то бы се подалъ, ижъ самъ съ того имѣнья службу земскую служыти маеть; а онъ хто закупилъ въ томъ воленъ будеть. А вѣдже хто за такимъ обычаемъ, естли бы тотъ, хто закупуетъ, мѣлъ оселости и можетъ службу земскую самъ служыти, а кгды бы оселости яковое и можности не могъ мѣти; тогды предсе тотъ, хто закупуетъ и вжываетъ, самъ съ тое закупли маеть службу земскую служыти.
АРТЫКУЛЪ 5.
[правіць]О Хоружыхъ.
Хоружества всихъ земляхъ и повѣтехъ Великого Князства тымъ радомъ и способомъ мають быти захованы, ижъ мы Господаръ хоружыхъ нашыхъ не маемъ уставляти толко людей зацныхъ добрыхъ ростропныхъ можныхъ и осѣлыхъ о повѣтѣ томъ. А хоружый, и гдѣ будеть хоруговъ держати, маеть на собѣ мѣти зброю добрую и гелмъ албо прильбицу и бронь, а конь абы былъ подъ нимъ добрій, а хоруговъ самъ хоружый въ гуфѣ своемъ на шыху и ку потребѣ маеть держати, и статечнѣ се въ томъ врядѣ на потребахъ нашихъ земскихъ маеть заховывати водлугъ цноты и повинности на хоружихъ належачое; а хорогвы мають имъ даваны быти за скарбу нашого подлугъ давного обычаю; а хоружые земскіе и дворные мають быти подлугъ стародавного обычаю захованы.
АРТЫКУЛЪ 6.
[правіць]О збиранью и тягненью шляхтѣ на войну.
Тежъ мы Господаръ для поряднѣйшаго тяготенья на войну, абы въ томъ шкода не была людемъ, такъ уставуемъ, ижъ гдѣ за потребою земскою будетъ отъ насъ и пановъ радъ албо гетмана всей земли росказано на войну ѣхати; и тогды хоружый, давшы вѣдомость о томъ шляхтѣ, каждый у своемъ повѣтѣ, маеть выѣхати самъ у поле и казати до себе всимъ повѣтикомъ своимъ за тры дни передъ тегненьемъ съ повѣту зъѣхатися; а они будуть повинни и до войска къ нему не вымовляючыся ѣхати въ томъ часѣ и на тое мѣстце, яко имъ отъ насъ дано и назначоно будеть, съ почты своими яко на войну служыти повинни зъѣхатися. И тамъ же хоружому собравшыся зъ ними и маючы о кождомъ зъ нихъ добрую вѣдомость и печу посполу маеть тягнути зъ ними до каштеляна, давшы о собѣ первей знати, гдѣ бы се мѣли ку нему стегнути; и тамъ съ каштеляномъ зъѣхавши се хоружый оный повѣтъ шляхту отдати и оповѣдати каштеляну и ознаймити маеть, если все сполна албо и хто есть... А гдѣ въ которомъ повѣтѣ каштеляна нѣтъ ино до маршалка, которій въ томъ таковую жъ моцъ мѣти будеть яко каштелянове. И кгды вжо и къ каштеляномъ стягнутца хоружыя и зъ шляхтою, тогды вси споломъ подъ каштеляновою або маршалковою справою тягнути мають до воеводы того воеводства; и тягнувшыся зъ нимъ кашталянъ або маршалокъ съ хоружымъ мають здати и оповѣдати шляхту воеводѣ, кого нѣтъ, а за чимъ гдѣ. Вже вси тые якъ панове воеводове и кашталянове и маршалкове и съ хоружими мають тягнути на мѣстце отъ насъ и пановъ радъ нашихъ назначоное, або гетману гдѣ росказано будеть, и у въ одномъ мѣстцу завжды при воеводѣ становитися а не порозну, будучы въ послушенствѣ и справѣ пановъ воеводъ своихъ. А въ томъ тягненью воевода маеть того съ пильностью стеречи и боронити повиненъ, абы повѣтники его никому никоторое шкоды въ дорозѣ и на станѣ стоечы ни въ чомъ не чынили, але собѣ и конемъ своимъ за пенези торгомъ а не уставою живность куповали; а который бы надъ заказъ смѣлъ кому которую шкоду учинити, тогды воевода або кашталянъ, поки до пана гетмана не дотягнуть, мають имъ съ таковыми справедливость учинити и отправу на винномъ и на маетности его самъ заразомъ не проволокаючы дѣлати, а повѣтники шляхта будеть у его повинни во всемъ томъ яко вышей описано послушни быти, а противъ непослушнымъ и противнымъ также повинни заховатися и карати ихъ мають, осадившы о немъ право, и што с права заслужытъ, то втерпитъ.
АРТЫКУЛЪ 7.
[правіць]Уси шляхта повѣтовые повинни становитися подъ хороговью повѣтовою.
Хочемъ тежъ мѣти и приказуемъ грозно, абы вси подданые наши будучы на войнѣ нигдѣ се индей не шыховали ани становили особами своими и съ почты, одно подъ хороговью своею повѣтовою, въ которомъ суть повѣтѣ осѣлыми, кромъ особного росказанья гетманского. А если бы которій зъ нихъ служылъ въ которого пановъ радъ, нашихъ, або до врядниковъ або, тежъ всякого иного; ино и тотъ будеть повиненъ подъ хороговью на мѣстцу установити брата або кревнаго своего або такъ добраго шляхту якъ самъ, абы съ тымъ мѣстца неопустилъ, а ни се омѣшкалъ, подъ страченьемъ имѣнья своего. А княжата, понята, хоруговные маршалки, врядники наши земскіе и дворные, тые маютъ се становити на мѣстцахъ своихъ подлугъ стародавного обычаю.
АРТЫКУЛЪ 8.
[правіць]О шляхтѣ, которые у разныхъ повѣтѣхъ имѣнья мають.
Уставуемъ, которые шляхта подданые наши мають въ розныхъ повѣтехъ имѣнья свои, таковый маеть въ томъ повѣтѣ, въ которомъ будеть наиголовнѣйшее имѣнье мѣти зо всихъ имѣней своихъ отчызныхъ выслужоныхъ купленыхъ и жониныхъ, самъ стати и почтъ своей ставити.
АРТЫКУЛЪ 9.
[правіць]О духовныхъ, якъ маютъ службу земскую служыти.
Уставуемъ тежъ и духовные зъ имѣней своихъ свѣцкихъ и костелныхъ наданыхъ, съ которыхъ служба земская военная бывала до сихъ часовъ, такжо зъ имѣней своихъ отчызныхъ купленыхъ и закупленыхъ шляхецскихъ, войнѣ повинныхъ, службу земскую служыти мають тымъ же обычаемъ, выправуючы съ тыхъ имѣней своихъ почетъ повинни при немъ слать за свою особу человѣка доброго шляхтича водлѣ уфалы земское сеймовое.
АРТЫКУЛЪ 10.
[правіць]Абы се по шыхованю не розъѣджали до домовъ своихъ.
Тежъ уставуемъ, ижъ кождый подданый иашъ пописавшысе, и по шыху обычаемъ вышей описанымъ съ тыми жъ конми и зброями, съ которыми се шыховалъ, при насъ або при гетманѣ нашомъ повиненъ будеть войну служыти а на тыхъ же коняхъ и съ тыми зброями, ажъ до зуполнаго роспусченя зъ войска нашого. А которій бы кольвекъ подданый нашъ, хотя и пописавшыся, а безъ воли и вѣдомости гетманское зъ войска прочъ отъѣхалъ або, што почту своего повинного отпустилъ до дому; таковый имѣнье тратитъ, яко бы войны не служылъ. А если бы тотъ што пенези бравшы, а былъ бы человекъ неосѣлый, а то тежъ учынилъ, таковый кождый честь свою тратитъ такъ, якобы зъ войны утекъ. А на пописѣ маеть кождого коня гетманъ нашъ въ шерсть написати и петно, которое будеть на кони, въ рестръ намалевати. А станъ свой павѣтники на войнѣ при хоружомъ у въ одномъ мѣстцу мають мѣти а не розно.
АРТЫКУЛЪ 11.
[правіць]Которіе для немоцы своее на войну ѣхати не могуть.
Уставуемъ тежъ, если бы которій шляхтичъ зъ Божъего допущенья былъ немоцъю обложоною хоръ, за которую на службу земскую ѣхати не могъ, а не мѣлъ бы сына дорослаго; тогды маеть ся оповѣдать хоружому своему, въ котораго есть повѣтѣ, а опричей трема шляхтычами, которые немоцы его очыма своими огледавшы и то маютъ намъ або гетману нашому оповѣдати подъ сумненемъ своимъ, а выздоровѣвшы тотъ немоцный предсе будеть повиненъ безъ отступу на потомъ передъ тымъ хоружымъ присягнути, ижъ для правдивое и обложное немоцы не могъ на тую послугу земскую ѣхати, а почотъ свой зъ имѣней на войну пред се послати повиненъ. А панове рады княжаты и панове иные вси врядники наши, которые подъ хороговью повѣтовою не стояли; таковые у форобѣ своей пред се тымъ обычаемъ водлѣ уфалы земское и важности имѣнья своего почотъ выправовати на войну, и по зъѣханью зъ войны безъ отпуску на томъ передъ гетманомъ присегнути повинни, яко были правдивыми. А вѣдже подъ часомъ войны таковый, хто обложною хоробою немоцонъ, маеть оповѣдатися намъ Господару, а въ небытности нашой и гетману нашому; а хто бы кольвекъ изъ становъ большихъ яко и меньшихъ въ таковой речи присегнути не хотѣлъ, тотъ имѣнье свое тратитъ на насъ Господаря.
АРТЫКУЛЪ 12.
[правіць]О сынехъ заступованъю войны одинъ за другого.
Тежъ уставуемъ, хто бы съ подданыхъ нашихъ изъ шляхтъ будучы самъ здоровъ, а мѣлъ сына дорослого лѣтъ осмнадцати а не нижей, а тотъ сынъ не былъ бы зъ нимъ дѣленый, або и подѣленый, а былъ бы годенъ ку службѣ военной; тогды таковый сынъ можеть за отца войну служыти съ почтомъ отца своего. А вѣдже то естъ и таковый отецъ сына своего весполокъ зъ сусѣды своими трема шляхтичами маеть привести до хоружаго своего, въ которомъ повѣтѣ есть, и ему оповѣдати; а хоружый, узнавшы его годного ку службѣ военной, при кашталянѣ маеть его гетману нашому оповѣдати; а гетманъ нашъ будеть повиненъ таковаго ку попису и ку службѣ нашой пріяти.
АРТЫКУЛЪ 13.
[правіць]Хто бы замѣшкалъ, на рокъ положоный до войска не пріѣхалъ.
Уставуемъ тежъ, если бы хто замѣшкалъ року отъ насъ, або отъ пановъ радъ нашихъ положоного, а до войска се не поспѣшалъ, або на року се гетмана нашого не постановилъ безъ слушное причыны; тогды таковыхъ огурныхъ и непоспѣшныхъ гетманъ великій у въ особливый реестръ маеть казати писати, и доложывшы того якъ который долго мѣшкалъ; а тые вси такимъ способомъ караны быти мають, ижъ панъ гетманъ маеть ихъ послати на границу, або тамъ гдѣ того потреба Речы Посполитое розумѣти будеть, а они тамъ совитымъ почтомъ, а ве двое такъ много яко змѣшкали, тамь заслуговати будуть повинни.
АРТЫКУЛЪ 14.
[правіць]О таквомъ, хтобы зъ битвы утекъ.
Уставуемъ тежъ, хто бы первей разъ зъ битвы утекъ, таковый имѣнье тратитъ; пакли тежъ и другій разъ зъ битвы утекъ, таковый за слушнымъ доводомъ отъ гетмана черезъ вырок нашъ господарскій почтивость свою тратитъ.
АРТЫКУЛЪ 15.
[правіць]О тыхъ, которые на войнѣ коней зброй и броней кому иному позычають.
Тежъ уставуемъ, хтобы кому на войнѣ будучы у войску позычылъ коня зброй торчы древа и всякое броны, а то бы на него переведено; отъ того таковый статокъ увесь черезъ гетмана нашого до рукъ нашихъ забранъ быти маеть. А кгды бы се тотъ же у другій разъ тогды пустилъ; таковый яко омылный слуга Речы Посполитое горло тратитъ.
АРТЫКУЛЪ 16.
[правіць]По чому отъ попису брати.
Уставуемъ, абы гетианове наши не казали болше брати отъ попису войска писаромъ своимъ, только по пол-грошу отъ коня, то за працу ихъ въ тотъ часъ коли войско наше зъѣжджается; а коли войско нашо маеть быти роспущоно, тогды не маеть гетманъ ани писаръ отъ попису ничого брати подъ ласкою нашою Господарскою. А панъ гетманъ зъ реестру войско роспустити маетъ.
АРТЫКУЛЪ 17.
[правіць]О старшыхъ, которые надъ людомъ войска нашого послани бывають
Тежъ уставуемъ, которые бы были послани отъ насъ Господара або отъ гетмановъ нашыхъ старшымъ надъ частью людей войска нашого въ розные стороны водлѣ потребы, абы тыхъ всихъ старшихъ вси кождого стану, которіе подъ чіею справою послани будуть, были послушни. А старшие оные справцы, роспущаючи людей, и такъ же ся яко панъ гетманъ заховывати мають.
АРТЫКУЛЪ 18.
[правіць]О хоружыхъ, абы земянъ дома не осажывали а ни отпущали.
Уставуемъ тежъ и приказуемъ, абы хоружые нашы не мѣли жаденъ зъ нихъ земенина дома осажывати и отпущати, а естли бы который земенинъ дома зосталъ, а хоружый бы того передъ гетманомъ не повѣдилъ и втаилъ, а то бы на него было переведено, ижъ то умыслнѣ оставилъ; тогды таковый хоружый врядъ свой тратить.
АРТЫКУЛЪ 19.
[правіць]О сторожы военной.
Тежъ уставуемъ, ижъ кгды бы жолнеровъ не было у войску нашомъ; тогды сторожу вси повинни держати войско Великого Князства Литовского, кгдыжъ то не чыя иншая потреба и безпечность, одно ихъ властная.
АРТЫКУЛЪ 20.
[правіць]О наѣздъ на домъ и гумна на войнѣ шляхецкіе.
Уставуемъ, хтобы на войнѣ будучы одинъ другому на домъ або на гумно наѣжджалъ, або ставы и сажовки волочылъ; тогды тотъ, который на домъ и на гумно будетъ поѣждчати, маеть кгвалтъ и шкоду платити зособна на кождое наѣханье. Такъ тежъ и по дорозѣ ѣдучы, хтобы кому на домъ и на гумно наѣхалъ, а бралъ, або ставы и сажовки выловилъ, або якіе шкоды починилъ; тогды маетъ кгвалтъ и шкоды платити за слушнымъ доводомъ.
АРТЫКУЛЪ 21.
[правіць]О стацыи, на войнѣ кому бы не доставало.
Уставуем, кому бы съ подданныхъ нашихъ будучы на войнѣ и лежечы войскомъ на одномъ мѣстцу стацыи на самого або на кони его не доставало; таковый маеть зъ вижомъ гетманскимъ ѣхати и взяти съ потребу жывности на себе и на кони, и заплатити водлугъ уставы отъ насъ або гетмана нашого на тотъ часъ положоное водлугъ урожаю; нижли дрова мають брати волно, гдѣ стояти будуть, але домовъ розбирати, плотовъ жечы, становъ и сажовокъ волочыти ани спущати, жытъ яринъ умыслнѣ не травити ани топтати не мають. А хтобы таковый шкоду учынилъ, тотъ шкоду совито маеть платити; а хтобы на збожьяхъ и на яринахъ обозомъ умыслнѣ положылъ и шкоду вчынилъ, такового маеть панъ гетманъ карати водлѣ шкоды и выступу его; а хтобы тежъ маючы стацыю у себе у въ обозѣ досыть, а предсе не вжываючы, иншое собѣ найдовалъ и за вижомъ бралъ, таковый то што озметъ, тому, у кого взялъ, совито ворочати або платити маеть.
АРТЫКУЛЪ 22.
[правіць]О бранью вижа на стацыю отъ гетмановъ.
Тежъ уставуемъ, хотечы мѣти [2] на войнѣ, кому бы для недостатку стацый вижа была потреба; тогды гетманъ нашъ виненъ будеть вижа придавати на скупованье стацый. А вижомъ его вижованое не маеть быти давано на милю по грошу, одно жъ на кгвалты бои и тому, хтобы на шкоду свою бралъ вижа, таковымъ вижованое маеть быти давано по грошу на милю, и если на мѣстцу не ѣдучы нигдѣ мили, также по грошу мають давати.
АРТЫКУЛЪ 23.
[правіць]О кгвалтъ або о находъ военный у въ обозѣ.
Тежъ уставуемъ, если бы хто будучы на службѣ нашой одинъ другого умыслнѣ або оборочаючы або обычаемъ звады наѣхалъ [3] або на станъ кгвалтомъ, кого забилъ або ранилъ, а было бы на него переведено; тотъ горло тратитъ. А если бы не ранилъ, але умыслиѣ своволиѣ нашедшы ударилъ, а хотя и не ударилъ [4]; такового панъ гетманъ карати маеть водлѣ баченья своего.
АРТЫКУЛ 24.
[правіць]О людехъ пенежныхъ, якъ маютъ съ имѣней своихъ службу земскую служыти.
Тежъ уставуемъ, хтобы кольвекъ съ подданныхъ нашыхъ пенези наши бралъ, таковые за пенези наши особами маютъ въ гуфѣ пенежномъ становитисе, а зъ особы своее людей годныхъ шляхецскихъ съ почты подъ хоруговью повѣтовою, або тамъ, здавна гдѣ мѣстце свое мають, становити; абы за тые пенези, которые въ ротмистровъ, служба земская зъ имѣней ихъ не гинула.
АРТЫКУЛ 25.
[правіць]О чужоземские прибылые люди, якъ се мають заховать въ тегненью.
Уставуемъ тежъ, ижъ людей прибылыхъ такъ обчыхъ яко и сусѣдныхъ заграничниковъ пріймовати и вести до панства нашого Великого Князства Литовского и черезъ тое панство маемъ, ижъ за вѣдомостью и радами радъ нашихъ Великого Князства. Вѣдже тые люди прибылые яко тежъ и тутошніе жолнере не мають иншыми дорогами и до иншого мѣстца стягнути и на лежахъ се роскладати, одно тамъ гдѣ мы Господаръ або гетьманъ великій тогожъ Великого Князства ознаймитъ, а лежу роспишетъ; а дорогъ изъ лежъ ихъ отъ насъ и отъ гетмана Литовского даныхъ и ознайменыхъ они ѣздити въ пицованье нигдѣ не мають, але тамъ въ дорозе на ночлегохъ и на лежахъ и зъ сторонъ жывность звезеную они торгомъ або уставою, яко мы зъ радами нашими уфалимъ або гетманъ въ небытности нашой установитъ, маютъ куповати. А порядокъ до данья тое живности и цѣну также мы зъ радами нашими сегожъ панства въ онъ часъ уфалимы водлѣ потребы.
АРТЫКУЛЪ 26.
[правіць]О шкоды въ тяненью о жолнеровъ такъ тубылцовъ яко чужоземцовъ.
Тежъ уставуемъ, ижъ гдѣ бы люди пенежные жолнерскіе драби прыбылые изъ иншихъ панствъ и тубылцы ку потребѣ нашой земской того панства нашого тягнули, которые спорные на мѣстца имъ зложоные и назначоные, або на земли нашой украйнной, тогды шкоды ни которіе никому не мають чинити ани на домъ ани на гуина и оборы шляхецскіе наѣжджати и собѣ зъ нихъ брати не мають; але жывность собѣ и всякіе потребы за пенязи купити мають цѣною, або водлугъ уставы, кгды быхмо уставу нашу таковымъ людемъ пенежнымъ учинили, а кгвалтомъ ничого ни въ кого не мають брати. Вѣдже въ таковомъ тягненью за вижы нашими або гетманскими або за врядовымъ, гдѣ бы ити, и зъ селъ подданныхъ своихъ духовные и свѣцскіе стацый на дорогѣ завозити и провадити не хотѣлъ; тогды уставою нашою платечы мають брати. А хтобы зъ нихъ на домъ або на обору и на гумна шляхецскіе такъ духовныхъ яко и свѣцскихъ для стоянья и для бранья стацый наѣхалъ, або нашолъ кгвалтомъ; таковые горло тратять, а шкода маеть быти плачона исъ статку его. И такъ о тотъ кгвалть яко и оные шкоды, которіе бы ся комужъ кольвекъ отъ жолнеровъ и отъ драбовъ въ тягненью безъ гетмана стали, рохмистрове и зъ старостами або державцами нашими, подъ которого повѣтомъ або врядомъ то ся станеть, мають справедливость и отправу каранье заразъ не откладаючи чинити, водле сего права и статуту тогожъ Великого Князства Литовского. Кгды бы ротмистръ таковыхъ збытныхъ и шкодниковъ за обсыланьемъ старость и державецъ не ставилъ и справедливости каранья и нагороженья вдѣлати не хотѣлъ; тогды тые врядники наши намъ Господару або гетману нашому мають оповѣдати або дати знати; а мы або въ небытности нашой гетманъ нашъ ротмистровъ таковыхъ, противныхъ статутови и уфалѣ земской, везеньемъ, а выступниковъ шкодниковъ таковыхъ водлѣ выступу ихъ карати маемъ, яко вышей есть о томъ написано. Вѣдже сесь артыкулъ и постановенье наше статутовое за границахъ або на мѣстцахъ при даванью пенезей маемъ казати служебнымъ, оповѣдати для того, абы се не вѣдомастью не вымовляли.
АРТЫКУЛЪ 27.
[правіць]О блудяги на войнѣ.
Уставуемъ о блудяги, абы кождый у войску нашомъ въ тегненью не смѣлъ коня блудяги держати въ себѣ только черезъ ночь а мѣстцу до третего дня, але тогожъ часу маеть его вести до гетмана нашого. А хтобы держалъ далѣй нижли черезъ ночь таковый конь за злодѣйство маеть быти поличонъ; такъ тежъ и кождую речъ знашодшы нести маеть до гетмана. А гетманъ нашъ не маеть казати отъ блудяги брати болшей толко отъ коня по грошу, а о иншые рѣчы, въ обозѣ закликати, а то, што нашолъ маеть, до пана гетмана отдавати.
АРТЫКУЛЪ 28.
[правіць]О указанью а пописованью шляхты повѣтовое у воеводствахъ або у староствахъ головныхъ.
Уставуемъ тежъ мы Господаръ и приказуемъ, всихъ радъ нашихъ Великого Князства Литовского, вѣдаючи того потребу часу покою, роскажемъ и рокъ листы нашими ознаймимъ всимъ обывателемъ Великого Князства всякого стану, яко хто водлугъ уфалы земское служыти войну повиненъ, абы оказывали и пописовалисе въ повѣтѣхъ судовыхъ оного дня. А мають ся оказовати и пописовати передъ воеводами, а въ земли Жомоитской ино передъ старостою Жомоитскимъ, а индей передъ головными старостами, а хто въ розныхъ повѣтѣхъ имѣнья маеть, тотъ при головнѣйшомъ имѣнью иншыхъ имѣней своихъ почотъ показовати и пописовати мають; а тые воеводове и старостове головные въ тотъ часъ свое почты показовати и пописовати мають, якъ которые се тамъ для попису и оказованья изъѣдуть, тые жывность собѣ не уставою але торгомъ куповати иають, а отъ того попису у тыхъ, которые се тамъ зберуть и укажугь, не мають ничого брати.
АРТЫКУЛЪ 29.
[правіць]Яко на войнѣ повинные у войску отъ гетмана далеко становитисе не мають.
Уставуемъ тежъ, абы нихто не смѣлъ далѣй мили отъ гетмана нашого у войску становитися, але такъ яко имъ водлѣ потребы часу панъ гетманъ раскажетъ.