była patreba, to i pieremieniaili swaje imiony. Tak mała-pamału jany kłali asnowy Litoŭskamu kniažstwu, až pakul Rynhold, a paśla syn jaho — Mindoŭh nie sabrali silnaho hasudarstwa, złučyŭšy ŭ wadno jak połackich, tak i litoŭskich kniazioŭ. Stalicaj maładoha litoŭskaho karaleŭstwa staŭsia Nawahrudak (ciapier pawietowy horad Minsk. hub.).
ČASĆ DRUHAJA
ad pawarotu Połackich kniazioŭ (1132 h.) da śmierci Witoŭta (1430 h.).
Za try hody paśla chaŭrusnaho pahromu kijeŭskimi kniaziami biełaruskich ziamiel narod u 1132 hadu zbuntawaŭsia prociŭ čužyncoŭ i prahnaŭ s Połacka kniazia Światopołka, z rodu kniazioŭ Jarosławičoŭ kijeŭskich. Sabraŭšysia na wieče, narod uradziŭ wiarnuć swaich kniazioŭ, prawych dziedzičoŭ Połackaho pasadu. Wybor wieča paŭ na kniazia Wasilka Rohwołodwiča (ŭnuka Ŭsiesława wialikaho). Pry hetym daŭnyje damowyje wojny i swarki zacichli; drobnyje ŭdzielnyje kniazi ciapier pačali krapčej trymacca adzin druhoha, padtrymywali miež saboj zhodu i ład, a tolki wojnami ŭ čužych ziemlach staralisia rasšyrać swaju ŭłasć. Tak jany zawaładzieli pry-Dźwinskimi ziemlami Liwoncoŭ i Łatyšoŭ. Ŭłasć i pawaha narodnaj rady-wieča rasšyryłasia. Wybar kniazia na Połacki pasad zaležaŭ tolki ad wieča. Jano pa swajej woli pieramieniaje kniazioŭ. Tak u 1151 hadu wieče wysłało połackaho kniazia Rohwołoda ŭ Minsk, a na Połacki pasad pasadziło Roscisława; cieraz wosiem hadoŭ iznoŭ wiarnuło Rohwołoda, a ŭ 1162 h. iznoŭ skinuło jaho, wybraŭšy kniaziem Ŭsiesława Wasilkowiča.
Ŭsiesłaŭ Wasilkowič naležyć da ličby słaŭniejšych Połackich kniazioŭ. Ion kniažyŭ s 1160 da 1180 hodu. Narod i ŭdzielnyje kniazi jaho wielmi lubili, wysoka ceniučy jaho rozum i sprawiedliwasć; usie achwotna jaho słuchali i nazywali Wialikim kniaziem. Paśla śmierci Ŭsiesława Wasilkowiča wieče nie chacieło wybirać sabie druhoha kniazia, a zawiało respubliku, katoraj kirawało 30 wybranych starcoŭ, chacia ješče žyli syny i ŭnuki Ŭsiesłana Bračysławowiča. Respublikaj Połackaje kniažstwo było 9 hadoŭ: ad 1181 da 1190 hodu. U 1190 hadu
