Старонка:Янка Купала. Збор твораў (1925–1932). Том 6.pdf/87

ПАЛІЛІСЯ МАЕ СЬЛЁЗЫ

Паліліся мае сьлезы
На жывыя вербалозы,
На сухія ачароты,
На глухоты, на сьляпоты.

Паліліся мае сьлёзы
На сьпякоты, на марозы,
На глухія непагоды,
Маладыя мае годы.

Паліліся мае сьлёзы
На заломы, на дзярмёзы.
На надломленыя грудзі,
На ўсё, што было, ёсьць, будзе

Паліліся мае сьлёзы
На напасьці, на пагрозы:
З цяжкай думкай — пакарыся! —
Паліліся, паліліся.

Паліліся мае сьлёзы
На гасьцінцы, перавозы,
На крывавыя паляны,
На забытыя курганы.

21-XI-1909 г.

---