Старонка:Янка Купала. Збор твораў (1925–1932). Том 6.pdf/74

ЗА ШТО?..

Маці мая, маці,
Што ж ты мне зрабіла, —
За што гараваці
На сьвет парадзіла?

За што, за што
Твой сын бядак,
За што, за што
Ён плача так?
— Скажы!

Плача твой дзяціна,
Ты й сама ня скачаш, —
За сябе і сына
Плачаш маці, плачаш.

За што, за што
Твой сын бядак.
За што, за што
Ты плачаш так?
— Скажы!

Тваё гора знае
Сын твой ад пачатку.
Бядуе, ўздыхае
За сябе і матку.

За што, за што
Наш лёс такі,
За што, за што
Мы бедакі?
— Скажы!