Старонка:Янка Купала. Збор твораў (1925–1932). Том 6.pdf/59

∗
∗     ∗

Каб я меў загончык нівы,
Каб я меў кусочак, —
З каласоў-бы зьвіў вам, людзі,
Зьвіў-бы я вяночак.

Каб я меў лажок над рэчкай,
Каб меў сенажатку, —
Назьбіраў-бы вам букет я
З незабудкаў, браткаў.

Каб я меў сваю хаціну,
Каб я меў сялібу, —
Запрасіў-бы вас у госьці;
На кут пасадзіў-бы.

Дый ня мне вас так вітаці
Шчыранька, як дзеці, —
Крыў бог нівы, сенажаткі,
Хата — па ўсім сьвеце.

Хай хоць гэта мая думка
Ўспамін вам пакіне
Аб гаротным і маркотным
Беларускім сыне.

1910 г.

---