Старонка:Янка Купала. Збор твораў (1925–1932). Том 6.pdf/166

ЗА ЎСЁ…

За ўсё, што сёньня маю,
Што даў мне мой народ:
За кут у родным краю,
За хлеб-соль без клапот, —

Я адплаціў народу,
Чым моц мая магла:
Зваў з путаў на свабоду,
Зваў з цемры да сьвятла.

Для бацькаўшчыны роднай,
Для ўпаўшых яе сіл
Складаў я гімн пабеды
Сярод крыжоў, магіл.

Змагаўшыся з напасьцяй
За шчасьце для людзей,
Ня раз пісаў ў няшчасьці
Крывёй з сваіх грудзей.

Уносіў гэтым долю
Сваю для ўсіх дабра,
А болей… Што-ж там болей
Жадаць ад песьняра?!

1926 г.

---