Гэта старонка не была вычытаная
ЖОНКА
Што ты там бурчыш пад нос?
Скрабеш каля вуха?
І ўдаеш паглядам косым
Вялікага зуха?
„Пагуляці… да карчомкі…“
Вось дык малайчына!
А дзе лапці ў тваёй жонкі?
Дзе дровы, лучына?
Трэба новае карыта,
Каптан Зосі трэба,
Просіць хвэльчара Мікіта —
Ўжо ня есьць і хлеба.
Не табе спачыць, хамуле,
Не табе сьпяваці,
Не да сьмеху, не да гуляў,
Калі бяда ў хаце.
СТАРАСТА
ўваходзіць трохі падпіўшы з нейкай сьмешнай важнасьцю і строгасьцю
Вось і трапіў к вам нарэшше…
Ну, рыхтуйся, братка!
Кішанёй мусіш патрэсьці:
Трэба нам падаткаў.
Трэба чыншу, трэба „пені“ —
Быў прыказ з павету,
Каб за тыдзень непраменна
Ўнесьці дробязь гэту.
Дык спраўляйся-ж і то лоўка!
Бо ня жыць і ў хатцы,
І з апраткай, і з кароўкай
Прыдзецца расстацца.