Гэта старонка была вычытаная
НАСТА
Спытайцеся.
МІКІТА
(да немца)
Меджду протчым, гэр германіш, можа купіце германскія маркі?
НЕМЕЦ
(паказвае на мігі, што не разумее у чым рэч).
МІКІТА
(дастае портмонэ, а з яго грошы і на мігі паказвае немцу, каб купіў)
НЕМЕЦ
(тлумачыць на мігі, што яму грошы ня трэба, „бярэ пад казырок“ і выходзіць)
ЗЬЯВА XI
МІКІТА — НАСТА
МІКІТА
(палажыўшы, ня помнячы, портмонэ з грашыма на лаўку)
Ну і немец, меджду протчым! Сваіх-жа нямецкіх марак не хацеў купіць. Але што гэта — ці ён нямы, што ні слова не адказаў мне на запытаньне?
НАСТА
Не нямы, а толькі немец і панашаму не разумее.
МІКІТА
Гм! Цікава! А чаму той, што маніўся мяне ў палон, меджду протчым, узяць, як рэпу сек панашаму?
НАСТА
А гэта іншая рэч. У іх, як мне з пэўных крыніц вядома, ёсьць спэцы ад усялякіх языкоў, ну вы і нарваліся на гэткага спэца. (Пауза).
МІКІТА
(набок)
Страшэнна, меджду протчым, адпаведная хвіліна, каб паўтарыць мамзэль Насьце сваю адвечную пропозыцыю.
