заразливые выдавать, друковать, людей добрыхъ, а во имя Отца и Сына и Светого Духа въ церкви Божой вже окрещеныхъ, знову крестити, понурити; наконецъ другимъ до жидовства и до ярма старозаконого, съ которого насъ Христосъ Господь вже освободилъ, волно удаватися; коротко мовечы — найспроснѣйшымъ геретикомъ и блюзнерцомъ имени Божого вольно о порадку своемъ погибелномъ промышляти! А предся вси молчать, а не толко похвалокъ якихъ на здорове, але и злого слова на нихъ речы не смѣютъ!
А намъ, горкимъ часто епископомъ, которые власть не отъ посполитого человѣка, але отъ Бога и отъ порадныхъ пастырей въ церкви Божой постановленыхъ за рукоположенемъ ихъ маемо, не маеть быти волно о лѣпшомъ порадку въ церкви Божой и о направѣ старатися! И не жаль бы намъ тое кривды терпѣти, бысмы людей до чого нового и николи неслыханого вели! Але ижъ до оное стародавное згоды, которая первѣй, за единоцства, была въ церкви Божой, своихъ ведемо! Атоли за то—таковое преслядоване терьпимо, не отъ чужыхъ, не отъ поганъ, не отъ геретиковъ, але отъ своихъ, ркомо-то православныхъ - хрестиянъ! Нужъ, што тыхъ явныхъ потварей, и словныхъ, и на писмѣ выданыхъ насмотрѣлися есмо, которыми насъ не толко у своихъ гидечы, але и другихъ иновѣрцовъ, до которыхъ, яко мы до нихъ, такъ и они до насъ, ничого не мають, на насъ подбуряючы, дивные новины о насъ разсѣвають: яко быхмо хотѣли вѣру свою православную, а потомъ евангелицкую выгубить, вси обрядки церкви нашое и сакрамента светые, водлугъ стародавного порадку церкви Восточное-въ ни-во-што обернути, а праве—зовсѣмъ ничого своего вцалѣ не зоставившы, претворитисе въ ыное! Нужъ, што иншыхъ розмаитыхъ прычынъ, яко быхмо то для пожитковъ своихъ власныхъ, для мѣстецъ въ радѣ, для пыхи, для лакомства чинити мѣли-не воспоминаю фалшивыхъ потварей, которые и учтивости дотыкаютьсе, И иншыхъ розмаитыхъ прымовокъ, о которые мнѣй дбаемо, чуючысе быти невинными, и овшемъ нетолько то, але и што горшого, для правды Божое, терьпѣти есмо повинни, иле зъ стороны особъ нашихъ.
Але гдѣ идетъ о фалу Божію, а звласча же насъ до людей удають, яко быхмо хотѣли вѣру свою въ ни-во-што обернути и антихристови въ руки самыхъ предати, тутъ [в]же не годитсе намъ такое потвары явное терпѣти, але то всѣмъ ку вѣдомости ознаймити, же намъ въ томъ великую кривду и всему хрестиянству дѣлаютъ, зовучы пастыра видомого церкве. Божей — «анти[х]ристомъ» и «сыномъ д[ъ]яволскимъ», а царей и господарей хрестиянскихъ и народъ зацный хрестиянскій — «неволниками антихристовыми» и «сынами дъяволскими»!
Смотрижъ одно, хто то чинитъ, и хто таковые новины спросные розсѣваеть?! Певне, не станъ духовный, которымъ бы пристойнѣй людей остерегатися, але — людъ посполитый, простый, ремесный, который, покинувшы ремесло своє (дратву, ножыцы и шило) а привлащивши собѣ врадъ пастырскій, писмомъ
