[митропо]литови зъ владыками, але и самого eго королевское милости росказанью и листомъ кгвалътъ и безъправье деело. A предься Ѳилялеть хвалить то особливе.
Пойдимъ же до поступку того соборыща ихъ противного: який былъ, где, и на которомъ мест[цу], и съ кимъ? Хочешь ли ведати, хрестиянъский [брате], чытай собе книжки Pyские, друкованые (у Вильни, въ року 1597), не тые, на которые Ѳилялеть о[дписъ] чынить, але другие, которымъ написъ: «СПРАВЕДЛИВОЕ ОПИСАНЬЕ ПОСТУПКУ И СПРАВЫ СЫНОД[У БЕРЕСТЕЙСКОГО]. Хотяжъ и то добре ведаемъ, ижъ прот[ивницы (на]шы) где-кольвекъ ихъ достати могуть, паля[ть], (а то,) жебы ся люде хитрости ихъ не доведали.
[Вшак]же и въ тыхъ моихъ книжкахъ на своемъ местъцу, кождое речи, яко ся што деяло, прыпомнети не пробачу. Только для Пана Бога прошу всихъ правоверныхъ хрестиянъ: уважъте то у себе-слушне ли [и] справедливе зъ митрополитомъ и зъ владыками [ст]орона противная поступовала, бы тежъ [и най]винънейшыми быти мели? Бо хотя теж Өи[ля]леть шыроко тую речь розъвелъ, листовъ и привильевъ въ книжки свое наклалъ, але на якомъ оунъдаменьте то збудовалъ - кождый бачьный розъсуди[ти] можеть. На што все, кгды
